Ճեմարանի խմբավարը մասնակցել է միջազգային փառատոնի

Բուլղարիայի Կամչիա քաղաքում ավարտվեց «Միասին 21-րդ դարում» միջազգային ստեղծագործական մրցույթ-փառատոնը, որին մասնակցում էին ստեղծագործական խմբեր և անհատներ Ռուսաստանից, Բուլղարիայից, Վրաստանից, Մոլդովայից, Իտալիայից, Իսրայելից, Ռումինիայից, Ուկրաինայից, Հայաստանից:

«Արմենպրես»-ի փոխանցմամբ՝ Հայաստանի պատվիրակները ութերորդ անգամ անցկացվող այդ փառատոնին մասնակցում էին առաջին անգամ: Մեր երկրի ստեղծագործական կյանքը ներկայացնելու պատիվը տրվել էր Հայ երգչախմբային դիրիժորների ասոցիացիայի խորհրդի անդամ, Անանիա Շիրակացու անվան ճեմարանի երաժշտական ստուդիայի ղեկավար խմբավար Նարինե Դավթյանին, Հայ լուսանկարիչների ասոցիացիայի անդամ,  լուսանկարիչ Էդգարդ Մարտիրոսյանին և պատանի ջութակահար, Ավետ Գաբրիելյանի անվան արվեստի դպրոցի սան  Արայիկ Գասպարյանին:

Բուլղարիայից վերադառնալուց հետո Նարինե Դավթյանը մեր թղթակցի հետ զրույցում ասաց.

-Փառատոնը, որը տևեց շուրջ տասը օր, բավական հետաքրքիր էր ու նաև ուսանելի, քանի որ այն տարբեր երկրների ներկայացուցիչներին հնարավորություն էր տալիս ոչ միայն ցուցադրել իրենց երկրի արվեստը, այլև փորձի փոխանակում կատարել արտերկրի իրենց գործընկերների հետ, նոր ծանոթներ ձեռք բերել, ինչու չէ, նաև պայմանավորվել ապագա համագործակցության հեռանկարների վերաբերյալ:

-Դուք՝ որպես խմբավար ինչպե՞ս ներկայացաք այդ փառատոնին, որը մեծ հեղինակություն է վայելում, ի՞նչ խմբի հետ էիք այնտեղ ներկայացնում հայկական արվեստը:

-Պետք է ասեմ, որ Բուլղարիայում տեղի ունեցած փառատոնն իր նախապատմությունն ունի: Հայ երգչախմբային դիրիժորների ասոցիացիայի և «Խուրտովինա»  հիմնադրամի նախաձեռնությամբ, ապրիլի 29-ից մայիսի 2-ը կազմակերպել էր   «Խաղաղություն մոլորակին»  միջմշակութային երգչախմբային նախագիծը, որն իր մեջ ներառում էր երգչախմբային համերգներ, տարբեր ազգային երաժշտության թեմաներով բաց դասեր, փորձի փոխանակում: Այդ միջոցառումների շրջանակներում նախապես Հայաստան էին հրավիրվել «Խուրտովինա»   հիմնադրամի նախագահ Յուստինա Դյուման և Բո ւլղարիայում անցկացվող «Միասին 21-րդ դարում» փառատոնի գեղարվեստական ղեկավար Նատալյա Բարաբանշչիկովան: Երգչախմբային  համերգներին մասնակցում էր նաև իմ ղեկավարած «Նարեկ» երգչախումբը: Այդ համերգից հետո Նատալյա Բարաբանշչիկովան մեզ հրավիրեց մասնակցելու մրցույթ-փառատոնին: Շնորհակալությամբ ընդունեցինք հրավերը, բայց նյութական դժվարությունների պատճառով ես մեկնեցի առանց երգչախմբի: Ի դեպ, վերը հիշատակված պատանի ջութակահար Արայիկ Գասպարյանն իմ որդին է:

«Միասին 21-րդ դարում» փառատոնի մի օրը նվիրված էր Հայաստանին: Այդ օրը ցուցադրվեց «Արտույտների ագարակը» գեղարվեստական ֆիլմը, որը Հայոց մեծ եղեռնի մասին մի բարձրարժեք պատում է: Դրանից բացի փառատոնի մասնակիցներին ցուցադրվեց Հայաստանին նվիրված վավերագրական ֆիլմ, որը ներկաներին հնարավորություն տվեց ծանոթանալու մեր պատմական հուշարձաններին, մեր հոգևոր մշակույթին:

Պետք է ասեմ, որ բուլղարները ջերմությամբ էին վերաբերում մեզ` հայերիս: Եղբայրական այդ երկրում մինչև օրս սիրում են Անդրանիկ զորավարին:

Բուլղարիայում եղան նաև ստեղծագործական հանդիպումներ, վարպետաց դասեր: Ես պատիվ ունեցա վարպետաց դաս անցկացնել մոլդովական «Ռապսոդիա» երգչախմբի հետ:   Սովորեցինք Կոմիտասի «Անձրևն եկավ», «Էսօր ուրբաթ է»,  «Ջուր կուգա»  երգերը: Կոմիտասի ստեղծագործությունները հիացրեցին և՛ երգչախմբի անդամներին, և՛ պարզապես երաժշտասերներին: Այդ փառատոնի շրջանակում անցկացվեց նաև մրցույթ, որի ժամանակ մեր պատանի ջութակահար Արայիկ Գասպարյանը փայլեց երկու անգամ: Նախ, «Միասին 21-րդ դարում» մրցույթի շրջանակում Արայիկն արժանաց ավ բարձր պրոֆեսիոնալիզմի համար սահմանված առաջին կարգի դիպլոմի, ապա «Կամչիայի աստղեր» մրցույթում արժանացավ «Կախարդական երաժիշտ» մրցանակին և ոսկե մեդալի:

Նարինե Դավթյանը Անանիա Շիրակացու անվան ճեմարանում աշխատում է երկու տարուց մի փոքր ավելի: Սկզբում նա երաժշտության ուսուցչուհի էր, իսկ 2015 թվականից ճեմարանի երաժշտական ստուդիայի ղեկավարն է ու  նաև երկու երգչախմբերի ղեկավարը: Այո, նա հասցրել է ճեմարանում ստեղծել երկու երգչախումբ, մեկը մանկական, մյուսը` ուսուցչական, որում, ի դեպ մասնակցում են նաև ծնողներ: