Իտալիայում երկրաշարժից 16 օր հետո ավերակներից կատվի են փրկել

 Իտալիայի Ամատրիչե քաղաքում, որը գրեթե ամբողջովին ավերվել Է օգոստոսի 24-ին տեղի ունեցած երկրաշարժից, երկրի ազգային հրշեջ ծառայության աշխատակիցները, որոնք որոնողափրկարարական գործողություն են իրականացնում եւ հավաքում փլվածքները, շարունակում են գտնել ու փրկել կենդանիների. տարերային աղետից 16 օր հետո նրանց հաջողվել Է փլատակներից դուրս բերել ողջ մնա ցած կատվի, տեղեկացնում Է «Արմենպրես»-ը:

Ինչպես հայտնել Է Il Sole 24 Ore թերթը, Պիետրո անունով կատուն ավելի քան երկու շաբաթ փլատակների տակ Է անցկացրել  առանց ուտելիքի, ջրի ու թարմ օդի եւ փրկվել Է սեպտեմբերի 8-ին: Երբ հրշեջները դուրս են բերել կենդանուն, նրա վիճակն օրհասական Է եղել, ուստի կատվին տեղափոխել են Ռիետի քաղաքի անասնաբուժական կլինիկաներից մեկը:  

Ավելի վաղ Ամատրիչեում փրկվել Էին Ռոմեո անունով ոսկեգույն ռետրիվերը, որը փլվածքների տակ մնացել Էր ինն օր, Ջիջա կատուն, որին ավերակներից դուրս Էին բերել երկրաշարժից հինգ օր հետո, եւ այլ չորքոտանիներ: Իսկ ընդամենն ավերված քաղաքում փրկվել են շուրջ 200 կենդանիներ:

6,0 մագնիտուդով հզոր երկրաշարժը լույս օգոստոսի 24-ի գիշերը տեղի Է ունեցել Իտալիայի կենտրոնական մասում: Ավերածություններ են գրանցվել երեք մարզերում՝ Լացիոյում, Մարկեում եւ Ումբրիայում: Քաղաքացիական պաշտպանության ծառայության տվյալներով՝ տարերային աղետի զոհ Է դարձել 295 մարդ, ավելի քան 3 հազար բնակիչներ անօթեւան են մնացել, հաղորդել Է ՌԻԱ Նովոստին: