Life.panorama.am-ը գրում է.
Ժողովրդական երգերի կատարող Գուրգեն Դաբաղյանն այսօր հանդիսատեսի դատին է հանձնել իր նոր տեսահոլովակը: Life.panorama.am-ի հետ զրույցում երգիչը պատմել է «Հայն է գալիս» երգի ընտրության, տեսահոլովակի ստեղծման ու առաջիկա աշխատանքների մասին:
«Այս երգը շուրջ 25 տարվա պատմություն ունի: Այն գրել է Արտակ Օհանյանը՝ Գուսանը, ով Արցախյան պատերազմի մասնակից է եղել: Չնայած երգը երկար տարիներ է, ինչ գոյություն ունի, բայց ես հեղինակի կատարմամբ տարբերակը շատ պատահական լսեցի ընդամենը մի քանի ամիս առաջ՝ յութուբի միջոցով ու որոշեցի այն իմ տեսակով ներկայացնել հանդիսատեսին»,- պատմեց Գուրգենն ու շարունակեց.
«Երբ որոշում կայացրեցի, որ երգն ունենալու է տեսահոլովակ, որոշեցեի նաեւ, որ պետք է համագործակցեմ ռեժիսոր Հրանտ Մովսիսյանի հետ: Նրան վստահում եմ ու գիտեմ՝ յուրաքանչյուր պարագայում երգին համահունչ տեսահոլովակ կստեղծի»:
Եթե վերջին շրջանում Գուրգենը տեսահոլովակիների տեսքով համամետաբար դանդաղ էր աշխատում, ապա առաջիկայում այդ առումով ակտիվություն կցուցաբերի.
«Այս պահին արդեն իսկ նոր երգ կա, որի վրա աշխատում ենք: Այն եւս շատ շուտով տեսահոլովակ կունենա, սակայն աշխատանքները դեռ խմորման փուլում են, ու ինքս էլ շատ մանրամասներ չգիտեմ այս պահին հայտնելու համար: Միայն խոստանում եմ՝ հաջորդ տեսահոլովակն իրեն երկար սպասեցնել չի տա»,- նկատեց նա:
Գուրգեն Դաբաղյանը վերջին տարիներին հաճախ է մեկնում արտերկիր՝ հյուրախաղերի: Հարցին, թե երգիչն ինչի՞ հետ է կապում արտերկրում ավելի շատ համերգներ ունենալը, քան Հայաստանում, պատասխանեց.
«Իհարկե, ինքս էլ ուրախ կլինեի, եթե Հայաստանում եւս հաճախ համերգներով հանդես գայի, սակայն համերգների կազմակերպումն այնքան էլ երգչի ձեռքերում չէ, պետք է լինեն կազմակերպիչներ, ովքեր կհրավիրեն այս կամ այն համերգին մասնակցելու: Այնպես է ստացվել, որ արտերկրի մեր հայրենակիցները այս առումով ավելի ակտիվ են, ՌԴ-ի տարբեր քաղաքներում ու Եվրոպայում հաճախ են համերգներ կազմակերպում ու հրավիրում: Տասը օր է, ինչ վերադարձել եմ Հայաստան ու շատ շուտով պետք է կրկին մեկնեմ համերգների, ուրախ եմ, որ սփյուռքի մեր հայրենակիցները սիրով սպասում են մեզ»:
Վերջում անդրադառնալով շուրջ մեկ տարուց ավել քննարկվող Գուրգեն Դաբաղյանի եւ Քարդաշյանների ընտանիքի համագործակցությանը՝ երգիչը նշեց.
«Այդ մասով դեռեւս նորություններ չկան, երբ լինեն հստակ անելիքներ, ինքս կհայտնեմ բոլորին»:
