Բացարձակ չեմ համարում, որ «ռեյտինգային» եմ. Լիլիթ Մուրադյան (ֆոտոշարք)

Tert.am Life-ը գրում է.

Հանրային հեռուստաընկերությունը շուտով կսկի նոր եթերաշրջան: Նոր եթերաշրջանում հեռուստադիտողները Առաջին ալիքի հաղորդավարներ Լիլիթ Մուրադյանին և Վահե Խանամիրյանին կտեսնեն բոլորովին նոր ձևաչափում: Հաղորդման մանրամասների մասին Tert.am Life-ը զրուցեց Լիլիթ Մուրադյանի հետ:

Ինչո՞ւ էին հաղորդավարները ամիսներ շարունակ բացակայում եթերից, ի՞նչ նոր նախագծի մասին է խոսքը, ինչո՞ւ են լրագրողները  պարբերաբար անդրադառնում Լիլիթ-Վահե ամուսնական զույգին, այս և մյուս հարցերի պատասխանները զրույցում:

 

-Որքա՞ն ժամանակ է եթերում չեք: Հավանաբար եթերը կարոտած կլինեք:

-Արդեն 9 ամիս է ինչ եթերում չենք: Այս ընթացքում անգործ նստած չենք եղել, զբաղվել ենք նախապատրաստական աշխատանքներով: Դրա համար եթերային կյանքին առանձնապես չենք հասցրել կարոտել, իսկ ինչ վերաբերվում է հեռուստադիտողներին, ապա շատ կարոտել ենք ու ըստ նրանց փոխանցած նամակների՝  կարող եմ ենթադրել, որ իրենք էլ մեզ են կարոտել: Վերադառնում ենք նոր լիցքերով, գաղափարներով ու սիրով:

-Կարող ենք ենթադրել, որ այդ դադարը անհրաժեշտ էր բալիկին ժամանակ տրամադրելու, հեռուստաէկրաններին քիչ երևալու համար:

-Ցանկացած դադար օգտակար է: Բալիկիս հետ կապված թեմաներին անդրադառնալ չեմ ուզում: Ցանկացած դադար ունի իր նպատակը: Եթե անգամ «Առավոտ Լուսո»-ից դուրս գայինք և այս նախագիծը լիներ միևնույնն է պետք էր, որ մեկ եթերաշրջան էկրանին չլինեինք:

 

-9 ամիս է եթերում չեք, բայց  լրատվամիջոցները չեն զլանում  շարունակ անդրադառնալ  Ձեզ  ու ձեր ընտանիքին: Ինչո՞վ եք շարունակ արժանանում շատերի ուշադրությանը:

-Ինձ թվում է, որ պետք է այդ լրագրողներին հարցնել, որոնք այդ անհասկանալի նյութերի հեղինակներն են: Իսկապես չգիտեմ, թե ինչու են մեզ այդքան անդրադառնում:

-Հավանաբար շատ «ռեյտինգային» կերպար եք ու դա է ստիպում, որ պարբերաբար անդրադառնան ձեր անձին ու ընտանիքին:

- Ես բացարձակ չեմ համարում, որ ռեյտինգային եմ, որ աստղ եմ: Չեմ համարում, որ մեր հանրության մեջ այնպիսի մեկն եմ, ով արժանի է քննարկման կիզակետում լինելուն:  

-Ինչպե՞ս առաջացավ նախագծի գաղափարը:

-Մոտ երկու տարի առաջ անհագ ցանկություն ունեի նոր նախագիծ սկսելու: Ինչ-որ չափով պատկերացնում էի, թե ինչպիսին պետք է լինի: Այս երկու տարիների ընթացքում, թե՛ Վահեի հետ ամուսնությունը, թե՛ մեր համատեղ աշխատանքի արդյունքում գաղափարս մի քիչ փոփոխվեց: Նախագիծ, որը անդրադառնալու էր տարբեր ճակատագրեր ունեցող մարդկանց վերափոխվեց և դարձավ նախագիծ, որի խնդիրը երեխաների ճակատագրերն են: Հաղորդումը չափազանց ծավալուն է, թե՛ հոգեբանական տեսակետից, թե՛ աշխատանքային տեսակետից: Սա շատ պատասխանատու աշխատանք է, որովհետև ոչ ոք իրավունք չունի խաղալ այդ մարդկանց ճակատագրերի հետ:

 

-Հաղորդման նպատակներից խոսենք:

-Այս ծրագրի հիմքում համոզմունքն է, որ որևէ խնդիր անլուծելի չէ, երբ համախմբվում են բոլորը: Իսկ երբ խոսքը վերաբերվում է երեխաներին փրկելու փորձին, օգնելու պատրաստակամությանն ու բարի գործ անելուն, ապա բոլոր պայմանական եթե-ները վերածվում են գործի:  Հատկապես, երբ խոսում ենք երեխաների մասին: Մենք մեզ վրա չենք վերցնելու մարդկային կյանքեր փրկելու առաքելությունը: Մենք փորձելու ենք մարդկանց ուշադրությունը մի պահ գրավել, որովհետև մենք բոլորս տարված ենք մեր առօրյա խնդիրներով: Ծիծաղելի են դառնում մեր բոլոր այն խնդիրները, որոնց մենք հանդիպում ենք օրվա ընթացքում և դարձնում մի կաթիլ մեղրի պատմություն: Երբեմն մոռանում ենք, որ կյանքում կան շատ ավելի սարսափելի երևույթներ: Նախագիծը միտված է ինչ-որ չափով փոխել հայ հասարակության մտածելակերպը:

-Հաղորդումը դեռ եթեր չի գնացել, բայց գաղափարի մասին լուրեր կան: Հետաքրքիր է ի՞նչպես են  մարդիկ արձագանքում:

-Հաղորդման վերաբերյալ մի քանի մեկնաբանություն եմ կարդացել: Թե ինչու պետք է պետությունը չաջակցի այդ երեխաներին, որ դուք եք դրամահավաք սկսում: Պարզապես ուզում եմ մի փաստ նշել` ամբողջ աշխարհում այնքան նմանատիպ նախագծեր կան: Աշխարհում մեկ հաղորդման շրջանականերում այնքան գումար կարող են հավաքել, որ ոչ միայն այդ օրվա հերոսին բավարարի, այլ մի քանի երեխաների ևս: Սա դրամահավաք չէ, սա նախագիծ է, որը ցույց է տալիս մարդկանց ու երեխաների կյանքեր, որոնք ինչ-ինչ պատճառներով մնում են մեր իրականության հակառակ կողմում: Նպատակը հետևյալն է՝ օգնել մարդկանց:

 

-Որքանո՞վ եք հետամուտ լինելու, որ տրամադրված գումարները ծառայեն նպատակին:

-Ծրագրի յուրաքանչյուր թողարկման շրջանակում հայտարարված դրամահավաքի արդյունքները կուղղվեն երեխաների բուժմանը: Իսկ արդեն բուժում ստացած երեխաների օրինակները կստիպեն երբեք չհանձնվել ու շարունակել պայքարը` հանուն ապագա ժպիտների:  Այո, մարդիկ պարբերաբար հարցնում են, թե ո՞ւր է գնալու իրենց տված գումարները: Սա Հանրային հեռուստաընկերությունն է: Այստեղ ոչ մեկ դիլետանտությամբ չի զբաղվում: Յուրաքանչյուրս գիտենք մեր անելիքը: Գումարները բացառապես գնալու են այնտեղ, որտեղ պետք է գնան: Նախագծի հետևում կանգնած են շատ պատասխանատու մարդիկ: Հեռուստադիտողը եթերում էլ կտեսնի, թե ինչպես ենք որոշ ժամանակ անց հետևելու, թե արդյոք հասել է տեղ գումարը, որը կարող է տրամադրել  յուրաքանչյուր մարդ:

-Ի՞նչ հաճախականությամբ է եթեր գնալու հաղորդումը և ե՞րբ:

-Նախագիծը եթեր է հեռարձակվելու ամեն ուրբաթ օր: Երեկոյան լրատվական թողարկումից առաջ՝ 20:20-ին: Առաջին եթերը կլինի սեպտեմբերի 16-ին:

-Եվ վերջում

-Եվ վերջում խնդրանք ունեմ բոլոր մարդկանց: Խնդրում եմ, որ անտարբեր չմնան: Եթե մեզանից ամեն մեկը չշարժվի, այն մտածելակերպով, որ իմ 500 դրամը ոչինչ չի փոխելու, այլ  հենց իմ 500 դրամն է իրավիճակ փոխելու, ապա մենք հարցին լուծում կգտնենք:

Հարցազրույցը՝ Անահիտ Կասամանյանի