Լևոն Զուրաբյանը վաղ է համարում նորանշանակ վարչապետի աշխատանքը գնահատելը

Ազգային ժողովի ՀԱԿ խմբակցության ղեկավար Լևոն Զուրաբյանը վաղ է համարում գնահատական տալ նորանշանակ վարչապետ Կարեն Կարապետյանի աշխատանքին: Խորհրդարանական ճեպազրույցների շրջանակներում լրագրողների հետ հանդիպմանը նա, ընդգծեց, որ, սովորաբար, նման դեպքերում 100 օր ժամանակ են տալիս կ առավարությանը, որից հետո միայն կարելի է գնահատականներ տալ: «Այնուամենայնիվ, ես կարող եմ ասել, որ մենք սպասելիքներ չունենք, քանի որ միշտ ասել ենք, որ հարկավոր է փոխել ոչ թե անձերին, այլ քաղաքական ու տնտեսական համակարգը, որը գոյություն ունի Հայաստանում»,-«Արմենպրես»-ի հաղորդմամբ՝ նշեց Զուրաբյանը:

Պատգամավորն անդրադարձավ նաև ՀՀ վարչապետի այն հայտարարությանը, թե մենաշնորհները վատ են, երբ ձևավորվում են ադմինիստրատիվ որոշումներով: «Այստեղ մենք խորը մտահոգություն ունենք, և այդ մտահոգությունն ունեցել ենք նաև նախորդ կառավարության գործունեության ժամանակ: Մենք կարծում ենք, որ անգամ մրցունակ միջավայրում ձևավորված մենաշնորհը չպետք է լինի»,- ասաց ընդդիմադիր պատգամավորը:

Զուրաբյանը խոսեց նաև վարչապետ Կարեն Կարապետյանի հայտարարության մասին, ըստ որի Հայաստանի տնտեսության վիճակը շատ ծանր է: Նրա խոսքով՝ ՀԱԿ-ն այդ մասին անընդհատ խոսել է, սակայն քաղաքական մեծամասնությունը իրենց միշտ մեղադրել է չափազանցնելու, իրականությունը խեղաթյուրելու մեջ: «Այսօր, փաստորեն, վարչապետը մեր տնտեսությանը տալիս է նույն գնահատականը, որը մենք տվել ենք երկար տարիներ շարունակ»,- եզրափակեց ԱԺ ՀԱԿ խմբակցության ղեկավարը: