Վաղուց անցել եմ այն շրջափուլը, որ կարդալով վատ մեկնաբանություններ՝ տրամադրությունս ընկնում էր. Վարդան Բարսեղյան

Հաղորդավար Վարդան Բարսեղյանը, որն իր քայլերն է անում նաև երգարվեստում, մի քանի նորություն ունի:

Past.am-ի հետ զրույցում Վարդանը տեղեկացրեց, որ շուտով հանդիսատեսին կներկայացնի «Կորցրած պատկեր» երգի հիման վրա նոր տեսահոլովակ:

Երգի հեղինակը Նունե Ջանիկյանն է, տեսահոլովակի օպերատորը՝ Հայկ Ալեքսանյանը: Ռեժիսորի բարդ ու պատասխանատու աշխատանքը ստանձնել է հենց ինքը՝ Վարդան Բարսեղյանը: Տեսահոլովակում նկարահանվել են Գրիգ Գզրարյանն ու Ինգա Աբաջյանը: Հաղորդավարը նաև հայտնեց, որ շուտով կվարի նոր հեղինակային հաղորդում, որն իր առաջին՝ «Բանավիճի՛ր ինձ հետ» հաղորդումից կտարբերվի ավելի ժամանցային բնույթով:

«Նաև կան տեսահոլովակներում նկարահանվելու առաջարկներ: Մի քանի օրից եթերում կլինի մի տաղանդավոր երիտասարդի տեսահոլովակ, որտեղ մարմնավորում եմ գլխավոր կերպարին: Կան նաև այլ առաջարկներ, որոնք դեռ քննարկման փուլում են»,- հավելեց մեր զրուցակիցը:

Անդրադառնալով իր հասցեին հնչող քննադատություններին՝ Վարդանն ասաց. «Ցավոք, վերջերս հասկացա, որ մեր հանրապետությունում շատ են պարապ ու իրենցից ոչինչ չներկայացնող մարդուկները, որոնք օրվա մեծ մասն անցկացնում են համակարգիչների առաջ ու ինքնահաստատվում են ուրիշներին քննադատելով: Վաղուց անցել եմ այն շրջափուլը, որ կարդալով վատ մեկնաբանություններ՝ նեղվում էի, տրամադրությունս ընկնում էր: Հիմա ամեն ինչին նայում եմ թեթև: Եթե մարդկանց դուր է գալիս ինքնահաստատվել ուրիշներին քննադատելու հաշվին, խնդրեմ, մենք տալիս ենք այդ հնարավորությունը: Միևնույն ժամանակ, հաճելի է լսել քննադատություններ, սակայն այն մարդկանցից, որոնք ունեն համապատասխան գիտելիքներ և անցած ճանապարհ, իսկ մնացածին ուղղակի արհամարհում եմ»:

Հաղորդավարն անկեղծացավ՝ մեզ հետ կիսվելով մարդկային շփումների մասին իր վերջին դատողություններով:

«Վերջերս հասկացա, որ մարդկանց չափից շատ վստահելն ու նվիրվելը ևս ունի իր բացասական հետևանքները: Ու հարվածն ավելի ցավոտ է, երբ մտերիմ մարդու կողմից ես ստանում: Չգիտեմ՝ գուցե իրականում սխա՞լ եմ, բայց վերջերս սովորել եմ մարդկանց չվստահելով ապրել: Հասկանում եմ, որ վատ է, բայց իմ մեջ հիմա կա բնավորության մի գիծ, որ յուրաքանչյուր նոր մարդու հետ ծանոթանալիս ինձ համոզում եմ ու ներշնչում, որ այդ մարդուց պետք է սպասել ամենավատը: Այդպես ավելի հեշտ է լինում դիմանալ հետագա հիասթափությանը: Բայց ամեն դեպքում ես ուժեղ տեսակի եմ: Գուցե լինում են պահեր, որ նեղվում եմ, հիասթափվում, բայց, միևնույն ժամանակ, շարունակում եմ պայքարել ու փոքր քայլերով հասնել իմ երազանքներին: Ամեն դեպքում հպարտանալու տեղ ունեմ, որ ի տարբերություն շատերի, ես իմ երազանքերին հասնում եմ արդար ճանապարհներով, ոչ թե ուրիշներին իրենց երազանքերից զրկելով»,- ասաց նա:

Լևոն Փանոսյան