51 կիլոգրամ նիհարած դերասան Աշոտ Մելոյանը՝ առողջ ապրելակերպի, սեփական բիզնեսի և առաջիկա ծրագրերի մասին

Life.panorama.am-ը  գրում է.

Life.panorama.am-ը զրուցել է դերասան Աշոտ Մելոյանի հետ` սեփական օրգանիկ հացերն արտադրելու իր աշխատանքի, այդ հացերի օգնությամբ մարդկանց առողջացնելու և ներկայումս նախագծերում նկարահանվելու առաջարկ չստանալու մասին:

-Արդեն երկու տարի է, ինչ օրգանիկ հացեր եք արտադրում: Հետաքրքիր է, գո՞հ եքարդյունքից և բավականաչափ գնորդներ ունե՞ք:

-  Երբ ես սկսեցի հաց արտադրել, ոչ բիզնես ունենալու ծրագիր և ոչ էլ հացով գումար աշխատելու նպատակ չեմ ունեցել: Պարզապես, երբ ժամանակին կշռում էի 147,5 կգ (Աշոտը նիհարել է 51կգ.) պետք է հրաժարվեի սպիտակ հացից և օգտվեի միայն տարեկանի հացից: Նշեմ, որ խանութներում ես այդպիսի հաց չգտա, բոլոր հացերը, որոնք որ ներկայացված են խանութներում, պատրաստված են քիմիական նյութերով: Հենց այդ ժամանակ էլ որոշեցի ինքս հաց պատրաստել: Դրանից որոշ ժամանակ հետո, երբ ընկերներս փորձեցին իմ պատրաստած հացը, շատ հավանեցին և միտք տվեցին ինձ, որն էր` տարեկանի հաց պատրաստել նաև ցանկացողների համար և դրանով առողջացնել նրանց: Այդպես սկսեցի ընկերներիս, ծանոթներիս առողջացնել իմ հացով, քանի որ պատրաստում եմ էկոլոգիապես մաքուր օրգանիկ հաց: Իհարկե, պատվերներ երբեմն լինում են նաև իրենց առողջությունը գնահատող անծանոթ մարդկանցից, ովքեր որ հետևում են ֆեյսբուքյան իմ էջին և տեղեկանում են այդ հացերի մասին:

-Իսկ ինչպե՞ս է պատրաստվում Ձեր նշած բացառապես մաքուր օրգանիկ հացը:

-  Այս հացը բացառիկ հաց է: Այն չի հնանում 40 օր և ավելի: Այն ունի բոլորովին այլ համ և բույր: Ես ինքս փորձ եմ կատարել. գնել եմ խանությում առկա ամենթանկ հացը և համոզվել, որ այնուամենայնիվ, դրանում քիմիական նյութեր կան: Ինձ մոտ նույնիսկ հացը պատրաստելու համար ջրում առկա քլորն է հանված, բացառապես մաքուր մեղր և ծովի աղ է օգտագործված: Իմ հացերը խմորվում են երկու անգամ, այսինքն` 4,5 ժամ ֆերմենտացիա են անցնում, հետո նորից հունցվում, այնուհետև կրկին ֆերմենտացիա են անցնում, ինչից հետո էլ 8-ից 12 ժամ հասունանում: Այնպես չէ, որ եթե ինչ-որ մեկն ինձ հաց պատվիրի, ես կարող եմ նրան մի քանի ժամից վաճառել այդ հացը: Առնվազն մեկ օր հետո գնորդը կարող է ձեռք բերել այն: Ասեմ նաև, որ այս հացը, որն ամբողջական ցորենի թեփով է, շատ հագեցնող է, երկու կտորից ավել մարդ չի կարող այն ուտել:

-Դուք հացերը պատրաստում եք Ձեր տանը: Արդյոք մտադրություն չունե՞ք Ձեր սեփականխանութը բացել, որտեղ կվաճառվեն միայն Ձեր պատրաստած օրգանիկ հացերը:

-  Գիտեք, դա լավ միտք է, պարզապես ինքս համադամասեր եմ և դժվարանում եմ իմ պատրաստած հացերի գաղտնիքը փոխանցել ինչ-որ մեկին: Այս օրգանիկ հացերից յուրաքանչյուրն անհատական ձեռքի աշխատանք և յուրահատուկ մոտեցում է պահանջում: Այդ պատճառով չեմ կարողանում պատկերացնել, որ մեկ այլ մարդ պետք է իմ հացի խմորի մեջ լցնի բաղադրիչները, խառնի այն, ապահովի անհրաժեշտ ջերմաստիճանը և այլն: Ինքս շատ բծախնդիր եմ սննդի առումով:

-Կարծում եմ` շատերին կհետաքրքրի Ձեր հացի գնային քաղաքականությունը:

- Իմ հացի գնային քաղաքականությունը փոքր ինչ այլ է: Քանի որ այն իսկապես բացառապես մաքուր բաղադրիչներից է պատրաստվում, ավելի թանկ է, քան խանութներում վաճառվող հացերը: Գուցե շատերի համար այն մատչելի չլինի, բայց որակյալ արտադրանքը դա է պահանջում: Պատրաստում եմ 4 տեսակի օրգանիկ հացեր, դրանք քաշով ծանր են`550-650գ., արժեքն էլ տատանվում է հազարից մինչև հազար երկու հարյուր դրամ: Հստակեցնեմ նաև, որ մեկ հացը մեկ անձին բավական է 6 օր:

-Իսկ հատկապես ի՞նչ հիվանդություն ունեցող մարդկանց խորհուրդ կտաք օգտվել Ձերհացերից:

-  Նորություն չեմ ասի, եթե նշեմ, որ առհասարակ, ցանկացած մարդու մասնագետները խորհուրդ են տալիս օգտվել սև տարեկանի հացից: Այստեղ ամենաշատն ամբողջական ցորենի գաղափարն է: Կլինի տարեկանի հաց, թե սպիտակ, կարևորն ամբողջական ցորենն է: Օրինակ, ես ունեմ մի կին պատվիրատու, ով իր փոքրիկ երեխայի համար միայն ամբողջական ցորենի ալյուրով պատրաստված հաց է գնում: Այս հացերը` հատկապես տարեկանի հացը, շատ օգտակար են շաքարային դիաբետով հիվանդներին:

-Անցում կատարենք դեպի Ձեր դերասանական գործունեություն: Տևական ժամանակ է,ինչ հանդես չեք գալիս որևէ նախագծում, քանի որ առաջարկներ չկան: Հետաքրքիր է, այսպահին էլ նույն կարգավիճակո՞ւմ եք:

- Բոլորովին վերջերս Հանրային հեռուստաընկերությունից ինձ կանչեցին, որպեսզի կարճ դերով հանդես գամ մի նախագծում և վերջ: Իսկապես, շատ եմ կարոտում իմ մասնագիտությանը: Երբ շուրջս եմ նայում, տեսնում եմ, որ շատ նախագծեր կան, բայց չգիտես ինչու դրանցից և ոչ մեկում ինձ չեն հրավիրում նկարահանվելու: Անկեղծ՝ մեկ-մեկ զարմանում եմ, որ անգամ իմ ընկերներն են այս առումով ինձ աչքաթող անում: Ինքս էլ չգիտեմ, թե որն է պատճառը: Մինչ այսօր շատ են ժողովրդի կողմից խոսակցությունները, որ Հայկոն և Մկոն իրենց տեղն ունեն, ես էլ իմ, որ չեմ զիջում նրանց և այլ նմանատիպ բաներ: Օրինակ, շուտով Մկոն իր առանձին նախագիծն է ներկայացնելու, որտեղ միայնակ է հանդես գալիս, երևի թե այդպես է պետք, տեղեկացա, որ նաև Հայկոն է պատրաստվում նոր նախագծով հանդես գալ: Ժամանակին եղել է, որ նրանք կանչել են ինձ իրենց ֆիլմերում նկարհանվեմ, իսկ այժմ ոչ: Երբ հետևում եմ, տեսնում եմ, որ հայկական շոու բիզնեսի մեծ մասը մասնակցություն են ունենում նրանց նախագծերում, իսկ իրենց մոտ ընկերը, ով կարող է ինչ-որ հետաքրքիր բան ցույց տալ, չկա: Գուցե տարիներ առաջ գեր էի, հետաքրքիր էի, հիմա նիհարել եմ, այլևս հետաքրքիր չեմ: Նույնիսկ ականջիս խոսակցություններ են հասել, որ Աշոտը նիհարել ա, էլ խնդալու չի: Ստացվում է, որ նիհար մարդիկ, երբ հանդես են գալիս հումորային որևէ նախագծում, այլևս ծիծաղելի չե՞ն: Նման դեպքերում իրավիճակը պետք է ծիծաղելի լինի:

-Իսկ Դուք ինքներդ փորձե՞լ եք անձամբ դիմել Ձեր ընկերներին և ծանոթ մարդկանց:

-  Այո, ժամանակին շատ-շատ եմ դիմել: Հետաքրքիր մի բան ասեմ, նույնիսկ եղել է դեպք, երբ ինձ շատ մտերիմ մարդկանցից մեկը, ում հետ մենք միասին ենք սկսել աշխատել, ով այսօր աշխատում է հայկական հեռուստաընկերություններից մեկում, աշխատանքի ընդունման համար ինձանից ռեզյումե է ուզել: Ես գոռոզ մարդ չեմ, ուղարկել եմ ռեզյումե, ինչից հետո, սակայն, մինչ այսօր ոչ մի լուր չունեմ իրենից: Պարզապես իմ երիտասարդ տարիներն եմ ափսոսում: Գուցե, որ թատրոնից դուրս չգայի, այսօր արդեն մեծ արդյունքների հասած կլինեի, իսկ թատրոնից դուրս եկա, որովհետև «Կարգին հաղորդման»-ը զուգահեռ ժամանակային առումով չէի հասցնում: Բացի դա, այդ ժամանակ գումարը ևս նշանակություն ունեցավ ինձ համար: Եթե թատրոնում ես ստանում էի 15.000 դրամ, տղաների մոտ ստանում էի 150.000 դրամ, այսինքն` տասն անգամ ավելի: Այդ տարիներին 150.000 դրամը չասեմ գայթակղիչ, բայց շատ պահանջված աշխատավարձի չափ էր:

Հեղինակ՝ Անուշիկ Մելքոնյան