Գյումրիում սեպտեմբերի 21-ը սկսվեց «Ազատամարտիկների պանթեոն»-ից

Մարզային ու քաղաքային իշխանությունների ներկայացուցիչները, երկրապահներն ու ազատամարտիկները Գյումրիում սեպտեմբերի 21-ին իրենց օրը սկսեցին «Շիրակ» գերեզմանատան «Ազատամարտիկների պանթեոն»-ից: Սա բոլորի համար ևս մեկ առիթ է հիշելու զինակից ընկերների անցած հերոսական ճանապարհն ու դերն անկախ Հայաստանի ձևավորման գործում: «Ցանկնում եմ, որ այս 25 տարիների ձեռքբերածը պահենք ու պահպանենք մեր զավակի պես: Անկախությունը մեզ հզոր բանակ ու ազատ ապրելու իրավունք տվեց»,-«Արմենպրես»-ի հետ զրույցում նշեց Երկրապահ կամավորների միության Շիրակ մարզային մասնաճյուղի ղեկավար Յուրա Ալեքսանյանը:

Տարիներ անց որդու արյան գնով ձեռքբերված ցանկացած թիզ հողը գնահատելու կոչով «Արմենպրես»-ի հետ զրույցի ժամանակ հանդես եկավ ազատամարտիկի մայր Ազգուշ Ստեփանյանը, ում որդին՝ Հայկ Ստեփանյանը, 1994 թվականին է զոհվել Մարտակերտում: «Ուզում եմ շնորհավորել Հայաստանի անկախության տոնի առթիվ հայ ազգին ու հատկապես  ազատամարտիկներին, ովքեր իրենց արյան գնով են այս ազատությունը ձեռք բերել՝ խոնարհվելով բոլոր զոհված տղաների շիրիմների առաջ: Պետք է պահենք այս թանկ գնով ձեռք բերած ազատությունը»,-նշեց  Ազգուշ Ստեփանյանը՝ բոլորին մաղթելով աղաղ երկինք ու որ ոչ մի մայր այլևս արցունք չթափի:

 Գյումրիում Անկախության 25-ամյակին նվիրված տոնական միջոցառումները չեղյալ էին համարվել, այդ թվում՝ Գյումրիի «Վարդանանց» հրապարակում նախապես ծրագրված անկախության 25-ամյակին նվիրված տոնական համերգն ու Գյումրու կայազորի զինվորական շքերթը: Միայն երեկոյան Գյումրու Վ. Աճեմյանի անվան պետական դրամատիկական թատրոնում տեղի կունենա հանդիսավոր նիստ՝ Անկախության 25 ամյակի առթիվ:

 Ինչպես հաղորդում է «Արմենպրես»-ը« Գյումրիի քաղաքապետարանի պաշտոնական կայքը հաղորդում է« որ սեպտեմբերի 21-ի համար նախապես հայտարարված միջոցառումները չեղյալ են համարվում՝ սեպտեմբերի 20-ին գրանցված դեպքի պատճառով:

 Գյումրիում քաղաքապետի ԲՀԿ թեկնածու Վարդևան Գրիգորյանի որդու` Արշակ Գրիգորյանի մահվան դեպքով քրեական գործ է հարուցվել: Քննչական կոմիտեի մամուլի խոսնակ Սոնա Տռուզյանն «Արմենպրես»-ին հայտնել է «որ քրեական գործ է հարուցվել քրեական օրենսգրքի 110 հոդվածով (ինքնասպանության հասցնելը) և 235 հոդվածով (ապօրինի կերպով զենք, ռազմամթերք, պայթուցիկ նյութեր ձեռք բերելը, իրացնելը, պահելը, փոխադրելը կամ կրելը):

 Արշակ Գրիգորյանը թափանցիկ-միջանցիկ գլխի հրազենային վնասվածքով Գյումրիի բժշկական կենտրոն է տեղափոխվել սեպտեմբերի 20-ին 13:20-ից 13:30-ի սահմաններում: Գրիգորյանը մահացել է հիվանդանոց տեղափոխվելուց 15 րոպե անց: