Հարավային Կովկասում մեր բանակը լավագույնն է. մշակութային գործիչները գնահատում են զորահանդեսը

Հայաստանի մտավորականները Հայոց բանակը բարձր արժեք են համարում և երկրի 25-ամյա պատմության ամենամեծ ձեռքբերումը: Հայաստանի Հանրապետության անկախության 25-ամյակին նվիրված զորահանդեսին ներկայացվեց ծանր սպառազինություն՝ «Սմերչ» համազարկային կրակի ռեակտիվ համակարգ, «Իսկանդեր» օպերատիվ մարտավարական հրթիռային համալիր, «Գրադ» համազարկային կրակի ռակտիվ համակարգ և այլ զենքեր: Շքերթի մասին իրենց կարծիքներն ու տպավորությունները «Արմենպրես»-ի հետ կիսեցին ՀՀ մշակութային գործիչները:

«Կարծում եմ՝ բանակը բարձր արժեք է և մեր երկրի ամենամեծ ձեռքբերումը: Այն մեր ժողովրդի գոյատևման կարևորագույն երաշխիքն է: Թե՜ հայաստանաբնակ, թե՜ օտար երկրներում ապրող հայերի համար նման միջոցառումն անհրաժեշտ է և նշանակալի: Հարավային Կովկասում մեր բանակը լավագույնն է, և դա պետք է փաստել: Զորահանդեսը բոլորիս է ոգևորել : Թշնամին միայն կուրախանա, երբ մտածի, որ Հայաստանի Հանրապետությունը միջոցներ չունի շքերթ անցկացնելու համար: Միջոցառմանը արվեստագետի հայացքով նայելիս՝ եկա այն եզրահանգմանը, որ ամեն ինչ ճաշակով էր արված, համահունչ: Նկատեցի , որ զրահամեքենաները ռետինե անիվներով քարշակների վրա էին դրված ասֆալտը չփչացնելու համար, այսինքն ամեն ինչ հաշվի էին առել: Կրկին փաստեցի, որ հզոր երկրում եմ ապրում, չնայած սոցիալական բարդ խնդիրներին»,-նշեց գրող, սցենարիստ, երգահան Քրիստ Մանարյանը: 

«Ռազմական շքերթը ժողովրդին ցույց է տալիս իր բանակի հզորությունը: Այն երկրի անվտանգության տեսանելի պատկերն է: Հատկապես քառօրյա պատերազմից հետո երկրի անվտանգության հետ կապված բազմաթիվ հարցեր առաջացան: Ոմանք գերագնահատում էին մեր ուժերը, ոմանք էլ՝ թերագնահատում: Այսօրվա շքերթը ցույց տվեց, որ մեր բանակը ամուր է և հզոր: Այն համալրվում է նորանոր զենքերով՝ մեր երկրին սպառնացող վտանգներն ի չիք դարձնելու համար: Հայ զինվորները ակտիվ էին, պատրաստակամ. դա խոսում էր մեր բանակի կառուցվածքի, հայ զինվորի հոգու մասին»,-ընդգծեց բանաստեղծ, ՀՀ գրո ղների միության նախագահ Էդվարդ Միլիտոնյանը:

Երևանի Հանրապետության հրապարակում սեպտեմբերի 21-ին կայացավ ՀՀ անկախության 25-ամյակին նվիրված ամենանշանակալի իրադարձությունը` տոնական զորահանդեսը: Զորահանդեսի ընթացքում հանդիսավոր երթով անցան ՀՀ Զինված ուժերի հետեւյալ ստորաբաժանումները. Մ.Մելքոնյանի անվան ռազմամարզական վարժարանի սաների ստորաբաժանումը, ազատամարտիկներից, հոգևորականներից` գնդերեցներից կազմված զորախմբերը, Վ.Սարգսյանի անվան ուսումնարանի կուրսանտները, Մարշալ Ա.Խամփերյանցի անվան ռազմաավիացիոն ինստիտուտի կուրսանտները, Մ.Հերացու անվան Երևանի պետական բժշկական հաալսարանի ռազմաբժշկական ֆակուլտետի շրջանավարտները, ԼՂՀ Պաշտպանության բանակի մարտիկները, Առաջին, Երկրորդ, Երրրորդ, Չորրորդ եւ Հինգերորրդ բանակային կորպուսների ստորաբաժանումներ, ՌԴ 102 ռազմաբազայի զինվորները, Առանձին հատուկ նշանակության բրիգադը, ՀՀ ոստիկանության զորքերի ստորաբաժանումները, ՀՀ ԱԱԾ սահմանապահ զորքերի ստորաբաժանումները, խաղաղապահ բրիգադը, Ռազմական ոստիկանության ստորաբաժանումները: