Խախտվել է Զարզանդ Նիկողոսյանի աշխատանքային իրավունքը

Չնայած Սյունիքի մարզպետ Սուրիկ Խաչատրյանի այն պնդմանը, թե իր օգնական Զարզանդ Նիկողոսյանի՝ Կապանի թիվ 6 միջնակարգ դպրոցի փոխտնօրեն նշանակվելու մասին լուրերն իրականությանը չեն համապատասխանում, ակնհայտ է, որ նա նշանակվել է փոխտնօրեն: Դա են վկայում դպրոցի տնօրեն Մարինե Դավթյանի՝ «Ազատության» հետ զրույցում արված հայտարարությունն այն մասին, որ Նիկողոսյանին ինքն է նշանակել փոխտնօրեն:

«Զարզանդ Նիկողոսյանն անձամբ իմ հրավերով, իմ հրամանով, իմ անմիջական պատասխանատվությամբ նշանակվել է տնօրենի տեղակալ՝ մասնագիտացված կրթական աջակցությունների գծով»,- ասել է Մարինե Դավթյանը:

Ստացվում է, որ Զարզանդ Նիկողոսյանը օրենքով սահմանված կարգով՝ հրամանով է նշանակվել փոխտնօրեն, այլ ոչ թե սոսկ նրան փոխտնօրեն նշանակելու մասին դեռևս ի կատար չածված որոշում է եղել:

Ինչպես հայտնի է, երեկ հասարակության կողմից Նիկողոսյանի նշանակման կապակցությամբ բարձրացված աղմուկից հետո ՀՀ Կրթության և գիտության նախարարի կամ Սյունիքի մարզպետի հրամանով Զարզանդ Նիկողոսյանն ազատվել է զբաղեցրած պաշտոնից:

Մի կողմից ստացվում է, որ կրթության և գիտության նախարարությունն ու Սյունիքի մարզպետ Սուրիկ Խաչատրյանը Զարզանդ Նիկողոսյանին զբաղեցրած պաշտոնից ազատելու համատեղ կամ ոչ համատեղ որոշում կայացնելով՝ լուծում տվեցին այն զավեշտալի պատմությանը, որի մեջ հայտնվել էին, սակայն մյուս կողմից՝ խախտվել է Զարզանդ Նիկողոսյանի աշխատանքային իրավունքը:

Մասնավորապես, ՀՀ աշխատանքային օրենսգրքի 113-րդ հոդվածը սահմանում է, որ
1. Գործատուն իրավունք ունի լուծելու անորոշ ժամկետով կնքված աշխատանքային պայմանագիրը, ինչպես նաեւ որոշակի ժամկետով կնքված աշխատանքային պայմանագիրը նախքան դրա գործողության ժամկետի լրանալը`
1) կազմակերպության լուծարման (անհատ ձեռնարկատիրոջ գործունեության դադարման) դեպքում.
2) գործատուի սնանկ ճանաչվելու դեպքում.
3) արտադրության ծավալների, տնտեսական, տեխնոլոգիական եւ աշխատանքի կազմակերպման պայմանների փոփոխման, ինչպես նաեւ արտադրական անհրաժեշտությամբ պայմանավորված` աշխատողների թվաքանակի կրճատման դեպքում.
4) աշխատողի զբաղեցրած պաշտոնին կամ կատարած աշխատանքին չհամապատասխանելու դեպքում.
5) փորձաշրջանի անբավարար արդյունքի պատճառով.
6) աշխատողի կողմից իր պարտականությունները չկատարելու կամ ոչ պատշաճ կատարելու դեպքում.
7) աշխատողի նկատմամբ վստահությունը կորցնելու դեպքում.
8) աշխատողի երկարատեւ անաշխատունակության հետեւանքով (եթե աշխատողը ժամանակավոր անաշխատունակության պատճառով աշխատանքի չի ներկայացել ավելի քան 120 օր անընդմեջ կամ վերջին տասներկու ամսվա ընթացքում` ավելի քան 140 օր, եթե օրենքով եւ այլ նորմատիվ իրավական ակտերով սահմանված չէ, որ որոշակի հիվանդությունների դեպքում աշխատատեղը եւ պաշտոնը պահպանվում են ավելի երկար ժամանակով).
9) աշխատողի կենսաթոշակային տարիքը լրանալու պատճառով.
10) սույն օրենսգրքով նախատեսված այլ դեպքերում:

2. Սույն հոդվածի 1-ին մասի 1-ին, 3-րդ, 4-րդ եւ 9-րդ կետերով նախատեսված հիմքերով որոշակի ժամկետով կամ անորոշ ժամկետով կնքված պայմանագիրը լուծելիս գործատուն պարտավոր է այդ մասին աշխատողին ծանուցել սույն օրենսգրքի 115-րդ հոդվածով նախատեսված ժամկետներում:

3. Սույն հոդվածի 1-ին մասի 3-րդ եւ 4-րդ կետերով նախատեսված հիմքերով գործատուն աշխատանքային պայմանագիրը կարող է լուծել, եթե իր մոտ առկա հնարավորությունների սահմաններում աշխատողին առաջարկել է նրա մասնագիտական պատրաստվածությանը, որակավորմանը, առողջական վիճակին համապատասխան այլ աշխատանք, իսկ աշխատողը հրաժարվել է առաջարկված աշխատանքից:

Հաշվի առնելով, որ Զարզանդ Նիկողոսյանն ընդամենը մեկ օր էր աշխատանքի անցել, անհնար է պատկերացնել, որ նրա՝ աշխատանքից ազատման պատճառը կարող էր լինել նրա՝ իր զբաղեցրած պաշտոնին համապատասխան չլինելը, իսկ վերը նշված հոդվածի մյուս բոլոր կետերը ևս, գոնե այս պահի դրությամբ Նիկողոսյանին աշխատանքից ազատման պատճառ լինել չէին կարող:

Բացի այդ՝ աշխատանքային օրենսգիրքը սահմանում է նաև որոշակի ժամկետներ աշխատողին՝ իրեն աշխատանքից ազատելու վերաբերյալ որոշման մասին հատնելու համար, բայց այդ ժամկետները ևս չեն պահպանվել:

Մասնավորապես, ՀՀ աշխատանքային օրենսգրքի 115-րդ հոդվածը սահմանում է, որ օրենսգրքի 113-րդ հոդվածի 1-ին մասի 1-ին եւ 3-րդ կետերով նախատեսված հիմքերով աշխատանքային պայմանագիրը լուծելու դեպքում գործատուն պարտավոր է աշխատողին գրավոր ծանուցել ոչ ուշ, քան երկու ամիս առաջ, իսկ օրենսգրքի 113-րդ հոդվածի 1-ին մասի 4-րդ եւ 9-րդ կետերով նախատեսված հիմքերով աշխատանքային պայմանագիրը լուծելու դեպքում գործատուն պարտավոր է աշխատողին գրավոր ծանուցել ոչ ուշ, քան երկու շաբաթ առաջ:

Փաստորեն ստացվում է, որ խախտվել է Զարզանդ Նիկողոսյանի աշխատանքային իրավունքը:

Արաքս Մամուլյան