6/8-ը եղել է մեծ նախագծի մի փոքր հատվածը միայն. Հ1-ից արձագանքում են «Ամենակարող երգիչ»-ը քննադատողներին

Life.panorama.am-ը գրում է.

 

Շուրջ մեկ շաբաթ է՝ ողջ համացանցը քննարկում է Հանրային հեռուստաընկերությամբ հեռարձակվելիք «Ամենակարող երգիչ» նախագիծը:  Հ1-ին անճաշակ երաժշտություն մատուցելու մեջ մեղադրում են ոչ միայն հեռուստադիտողները, այլև արվեստի վաստակավոր գործիչները: Հանրայինի հիմնադրամ 60-ամյակի առթիվ հեռուստաընկերություն կատարած այցի ժամանակ անգամ ՀՀ նախագահ է հորդորել Հ1-ի ղեկավարությանը նախագծեր պատրաստելիս հաշվի առնել հեռուստադիտողի սպասելիքներն ու կարծիքը:

Բարձրացված աղմուկի շուրջ Life.panorama.am-ը փորձեց մեկնաբանություն ստանալ հեռուստաընկերությունից, որտեղից տեղեկացրեցին, թե  «Ամենակարող երգիչ» նախագծի հիմնական նպատակը հեռուստադիտողներին նոր անուններ բացահայտելու հնարավորության ընձեռումն է: 
 

«Հեռուստատեսային տվյալ հարթակում մրցում են ակումբային և ռեստորանային երգիչները, ովքեր, ըստ հաղորդման ձևաչափի, յուրաքանչյուր շաբաթ ներկայանալու և իրենց ուժերը փորձելու են տարբեր ժանրերում և թեմատիկ ուղղություններ ունեցող երգերի միջոցով: 
 

Հաղորդման առաջին եթերի ընթացքում  մասնակից երգիչներին հնարավորություն է տրվել երգել իրենց նախընտրած ստեղծագործությունները, իսկ երկրորդ թողարկման թեման ընտրվել է 6/8-ը` հաշվի առնելով այն հանգամանքը, որ տվյալ ստեղծագործությունները առավելագույնս մոտ են մասնակից երգիչ-կատարողներին: 6/8-ը եղել է մեծ նախագծի` վերոնշյալ ժամանցային հաղորդման, մի փոքր հատվածը միայն: 
 

Հաջորդող շաբաթների ընթացքում մասնակիցները ներկայանալու են այլ ոճերում. հեռուստադիտողները նրանց տեսնելու է ժողովրդական ժանրում, գնահատելու նրանց կատարմամբ երևանյան երգերը, հայրենասիրական կատարումները, հայ կոմպոզիտորների ստեղծագործությունները, միջազգային հիթերը, դուետները և այլն»,-նշված է հեռուստաընկերության պարզաբանման մեջ: