Պարային ռիթմեր, դիսկո տրամադրություն, բռնցքամարտի ռինգ ու խաղադրույքներ. Նկարահանվել է Արամ MP3-իի նոր տեսահոլովակը (լուսանկար)

Life.tert.am-ը գրում է.

Արամ MP3-ին շուտով կներկայացնի նոր տեսահոլովակ: Տեսահոլովակը նկարահանվել է օրեր առաջ` բոլորովին նոր երգի հիման վրա:

«Մի ամբողջ օր նկարահանումներով ենք զբաղված եղել: Այն բավականին հետաքրքիր սցենարական լուծում է ստացել: Ըստ սցենարի` ես ու հոլովակի հերոսուհին,  բռնցքամարտի ռինգում կռվում ենք իրար դեմ: Հոլովակում կա հանդիսատես  և նրանք փորձում են խաղադրույքներ կատարել և գումար աշխատել մեր խաղի հաշվին»,- մեզ հետ զրույցում ասաց Արամը:

Երգիչը նկարահանման հրապարակից լուսանկարներ գրեթե չունի, քանի որ ինչպես ինքը նշեց` մի ամբողջ օր ռինգում է անցկացրել: Նկարահանումներից առաջ երգիչը հատուկ մարզումների է գնացել, սակայն վնասվածքներից խուսափել չի հաջողվել:

«Ես ու դերասանուհին, ում անունը դեռևս նշել չեմ ցանկանում, վերքոտվել ու արյունոտվել ենք: Վերջում նույնիսկ չէինք էլ պաշտպանվում: Մի պահ անգամ մոռացել էի, որ դիմացինս աղջիկ է ու հավասարապես պատասխանում էի նրա հարվածներին: Վերջում որոշեցի զոհ գնալ ու թողնել, որ աղջիկը սրտի ուզած հարվածները տա, բայց դրանից հետո հասկացա, որ «նոկաուդս» չի ուշանա և դադար վերցրի»,-պատմեց Արամ Mp3

 

Տեսահոլովակի և երգի մասին շատ մանրամասներ հայտնել երգիչը չցանկացավ, այլ խնդրեց, որ երկրպագուները սպասեն պրեմիերային, որը կլինի հոկտեմբեր ամսվա երկրորդ կեսին:

Հոլովակի ռեժիսորը  Մայիս Հայրապետյանն է, երաժշտության հեղինակը Հայկ Մանուչարյանն է, իսկ  խոսքերի հեղինակը Ավետ Բարսեղյանն է: Երգը  հայերեն լեզվով է և ինչպես երգիչն ասաց Tert.am Life-ի հետ զրույցում` երգչի առաջին հայալեզու տեսահոլովակն է ինելու:

 

Զրույցը՝Անահիտ Կասամանյանի։