Շարմազանովը խոսել է ՏԻՄ ընտրությունների ժամանակ ընտրախախտումների ահազանգերի մասին

Ազգային ժողովի փոխնախագահ Էդուարդ Շարմազանովն անդրադարձել է հոկտեմբերի 2-ին հանրապետության 6 մարզերի 377 համայնքներում կայացած տեղական ինքնակառավարման մարմինների ընտրությունների ընթացքում ընտրախախտումների մասին ահազանգերին և փաստերին: Ազգային ժողովում լրագրողների հետ զրույցում ԱԺ փոխնախագահն ընդգծեց, որ ահազանգերն ու խախտումները շատ ավելի փոքր ծավալի են եղել, քան նախորդ ընտրությունների ժամանակ: «Բացի այդ, չի եղել մի ահազանգ, որի հետևից իրավապահները չգնային ու չարձագանքեին: Իսկ ահազանգերի մի մասն ընդհանրապես կեղծ դուրս եկան»,- «Արմենպրես»-ի հաղորդմամբ՝ ընդգծեց նա:

ԱԺ փոխնախագահն այն կարծիքին չէ, որ խախտումներ ընդհանրապես չեն եղել, սակայն նկատում է, որ այդ խախտումները ոչ Գյումրիում, ոչ Վանաձորում, ոչ էլ այլ համայնքներում չեն ազդել ընտրությունների արդյունքների վրա:«Եվ ես այսօր լրատվամիջոցներից իմացա, որ կուսակցություններից մեկի ներկայացուցիչը, որը հավակնում էր դառնալ միակ ընդդիմությունը կամ ինստիտուցիոնալ ընդդիմությունը, ընդունել է իր պարտությունը: Այդպես է աշխարհում կարգը, ոչ թե պետք է քար շպրտել հաղթողի վրա, այլ պետք է պրոբլեմները տեսնել իր մեջ, վերլուծություն անել, ինչպես մենք ենք պարաստ վերլուծություն իրականացնել բոլոր այն համայնքներում, որտեղ խնդիրներ ենք ունեցել»,- ասաց նա:

Շարմազանովն ընդգծեց, որ չնայած ՏԻՄ ընտրություններում ՀՀԿ-ի արձանագրած հաջողությանը, կուսակցությունը չի առաջնորդվում «մեր դեմ խաղ չկա» սկզբունքով. նրա խոսքով` այդ սկզբունքը մնացել է 20-րդ դարում, իսկ ՀՀԿ-ն պատրաստ է համագործակցել բոլոր ուժերի հետ: