Լատինամերիկյան ձախակողմյանների համագումարում բարձրացվել է ԼՂՀ և Հայոց ցեղասպանության խնդիրների մասին

Էկվադորում ավարտվել է Լատինամերիկյան ձախ ուժերի համաժողովը՝ ELAP-ը, որին մասնակցել է ավելի քան 200 պատվիրակ 23 երկրներից,- հայտնում է Orer.am-ը:

 

Համաժողովին մասնակցել են Էկվադորի նախագահ Ռաֆայել Կոռեան, Արգենտինայի նախկին նախագահ Քրիստինա Ֆերնանդեսը, Ուրուգվայի նախկին նախագահ Խոսե Մուխիկան, Վենեսուելայի արտգործնախարար Դելսի Ռոդրիգեսը, Իսպանիայի «Podemos» կուսակցության նախագահ Պաբլո Իգլեսիասը, Բոլիվիայի փոխնախագահ Ալվարո Գարսիա Լիներան, Չինաստանի ԱԳՆ ներկայացուցիչ Լիու Հոնկայը և այլ բարձրաստիճան պաշտոնյաներ:

 

Համաժողովի ընթացքում բարձրացվել են մի շարք խնդիրներ, որոնցից առանցքայինը երեքն են եղել՝ Լատինական Ամերիկայում ձախ ուժերի դեմ սկսված նոր հալածանքները, Կոլումբիայի խաղաղության գործընթացը և օֆշորային ֆինանսական հնարավորությունները:

 

Համաժողովին Էկվադորի իշխող «Alianza PAIS» շարժումը ներկայացրել է 2017 թ կայանալիք նախագահական ընտրությունների իր թեկնածուին՝ Լենին Մորենոյին:

 

Հայաստանի կողմից համագումարին մասնակցել է պատվիրակություն՝ «Հայ-էկվադորական բարեկամություն» ՀԿ նախագահ Վարդան Հարությունյանի ղեկավարությամբ: Պատվիրակության կազմում են եղել նաև կազմակերպության անդամներ Զորիկ Բազինյանն ու Մեհմեդ Դոգանը:

 

Վ. Հարությունյանը նշեց, որ իրենց պատվիրակությունը ևս ելույթ է ունեցել, որի ընթացքում բարձրաձայնել է Լատինական Ամերիկայի պետությունների ու կազմակերպությունների կողմից Հայոց ցեղասպանության դատապարտման անհրաժեշտության մասին: Հայկական պատվիրակությունը, պատմելով Լեռնային Ղարաբաղի Հանրապետության և նրա խնդիրների մասին, նաև առաջարկել է ստեղծել առանձին հանձնաժողով՝ աշխարհում չճանաչված պետությունների խնդիրներին անդրադառնալու համար: Թեև ելույթը ողջունվել է պատվիրակների կողմից ծափահարություններով և այլ մասնակիցներ ևս խոսել են նման հանձնաժողով ստեղծելու կարևորության մասին, այդուհանդերձ համաժողովը հանձնաժողովի ստեղծման քննարկումը հետաձգել է: