«Հրապարակ». ՀՀԿ-ի հին «գվարդիան» ցայտնոտի մեջ է. «Դե եթե Արգամիչին չխնայեցին, մեզ էլ չեն խնայի»

«Հրապարակ» թերթը գրում է. «Հանրապետական կուսակցության հին «գվարդիան» ցայտնոտի մեջ է: Նրանք մասնավոր զրույցներում նեղսրտած ասում են, որ որեւէ երաշխիք չկա հաջորդ խորհրդարանում հայտնվելու մասով, եւ, դատելով կառավարությունում կադրային փոփոխություններից, իրենց եւս չեն խնայի:

«Դե, եթե Բեգլարյան Գագո, Յոլյան Լեւոն, Հովիկ Արգամիչ, Սուրիկ Խաչատրյան հանում են, մեզ կհանեն՝ առանց աչք թարթելու, մոռանալով ընտրություններին փող ծախսելու ու ձայն բերելու մեր գործը: Գիտեն, թե իրենց բերած նոր մարդիկ կարան մեր պես աշխատեն»,- ասում է հին ՀՀԿ-ականը:

ԱԺ գեներալիտետին` Սեյրան Սարոյան, Մանվել Գրիգորյան, նրանց ընկեր Առաքել Մովսիսյան, արդեն հասկացրել են, որ մոտեցումներ, վերաբերմունք է փոխվել, հանգիստ նստեք տեղներդ:

Ի դեպ, ասում են, թե մեզանում բոլոր բարձրաստիճան պաշտոնյաները պաշտոնն զբաղեցնելուց առաջ նաեւ իրենց հրաժարականների դիմումներն են գրում: Դիմումները «ննջում են» Բաղրամյան 26-ի դարակներում եւ անհրաժեշտ պահի օգտագործվում` համապատասխան ամսաթվի մակնշմամբ: Այնպես որ՝ պաշտոնյաները չեն զարմանում, երբ, օրինակ, ծովափին հանգստանալիս իմանում են, որ իրենք հրաժարականի դիմում են գրել»:

Առավել մանրամասն՝ թերթի այսօրվա համարում