Վրաստանի ընտրություններ. ՆԳՆ-ն քրեական գործ է հարուցել ընտրատեղամասերը ավերելու համար

Վրաստանի տարբեր շրջաններում ընտրատեղամասերն ավերելու փաստով երկրի ՆԳ նախարարությունը մի շարք քրեական գործեր է հարուցել:

Միանգամից երկու գործ է հարուցվել Զուգդիդի շրջանի Ջիխաշքարի գյուղում տեղի ունեցածի առիթով: Ոստիկանության տեղեկություններով՝ հոկտեմբերի 9-ի գիշերը մի քանի մարդ թիվ 79 ընտրատեղամաս են ներխուժել ձայները հաշվելու ժամանակ: Նրանք կոտրել են քվեատուփը, պատուհանների ապակիներն են ջարդել, իսկ հարձակվողներից մեկը ծեծել է միջազգային դիտորդի: Վրաստանի ՆԳՆ-ից հայտարարել են, որ ավերածության կազմակերպչի ինքնությունը պարզվել է, նա ձերբակալված է: Այս մասին հայտնում է «Նովոստի-Գրուզիա»-ն:

Գերատեսչության տեղեկություններն արմատապես տարբերվում են տեղի բնակիչների, դիտորդների եւ ընտրատարածքային ընտրական հանձնաժողովի անդամների հայտարարություններից: Նրանք հայտնում են, որ ավերածությանը իշխող «Վրացական երազանք» կուսակցության ակտիվիստների հետ միասին մասնակցել է գյուղապետը:

Նույն գյուղում եւս մեկ միջադեպ է տեղի ունեցել թիվ 108 ընտրատեղամասում: Այնտեղ նույնպես վնասել են քվեատուփը, ապակիներ են ջարդել եւ վնասել գույքը: Այս ավերածությունը հետաքննվում է «ընտրական հանձնաժողովների կամ հանրաքվեի անցկացման հանձնաժողովների աշխատանքի խոչընդոտման» հոդվածով:

Քաշքշոց է տեղի ունեցել Քութաիսի քաղաքի թիվ 90 ընտրատեղամասի մոտ: Այստեղ իշխող «Վրացական երազանք» կուսակցության ակտիվիստները ծեծել են «Միասնական ազգային շարժում» կուսակցության մեծամասնական թեկնածու Գիգի Ծերեթելիին: Վրաստանի ՆԳՆ-ն չի հայտնում միջադեպի մանրամասները. գերատեսչության հայտարարության մեջ նշված է, որ ծեծին մասնակցել են երկու կուսակցությունների ներկայացուցիչները:

Կռվի ընթացքում վնասվել է «Ռուսթավի-2» հեռուստաընկերության տեսանկարահանող խմբի սարքավորումը: Այս կապակցությամբ քրեական գործ է հարուցվել «իրի վնասում կամ ոչնչացում հոդվածով:

Ամենախոշոր ավերածությունը կազմակերպվել է Մառնեուլի շրջանի Կիզիլաջլո գյուղում:

Գյուղի թիվ 48 ընտրատեղամասի մոտ հարձակում կատարած մի խումբ մարդիկ փորձել են գողանալ քվեատուփը. դիմակայությանը մասնակցել են հարյուրավոր բնակիչներ, դեպքի վայր է ժամանել հատուկ նշանակության ջոկատ: Վրաստանի ԿԸՀ-ն պնդում է, որ քվեատուփը չի վնասվել: Լրատվամիջոցների տեղեկություններով՝ կռիվը սկսվել է իշխող կուսակցության եւ Պաատա Բուրչուլաձեի դաշինքի համախոհների միջեւ: Վրաստանի ՆԳՆ-ն պնդում է, որ քվեատուփը փորձել են հափշտակել «Միասնական ազգային շարժման» եւ «Պաատա Բուրչուլաձե-Պետությունը ժողովրդի համար» դաշինքի  կողմնակիցները: