Կայացրել եմ իմ գործունեության ամենահանգրվանային որոշումներից մեկը
ԲԼՈԳՎարուժան Բաբաջանյանը ֆեյսբուքյան իր էջում գրում է.
Ցանկանում եմ տեղեկացնել, որ կայացրել եմ իմ գործունեության ամենահանգրվանային որոշումներից մեկը: Այս պահին ընթանում են են տպագիր թերթ հիմնադրելու և հրատարակելու աշխատանքները: Խմբագրակազմը ձևավորման փուլում է, եփվում են թերթի տեսլականն ու ուղենիշները:
Համացանցային ինֆորմացիոն հեղեղի այս դարում միգուցե ցնդաբանություն թվա թերթ հրատարակելու որոշումը, սակայն այդ որոշումը կայացնելուն ինձ դրդել են մի քանի պարզ հանգամանքներ:
Թերթը ունի հրատարակման հստակ պարբերականություն, ինչը հնարավորություն է տալիս մանրամասն մշակել նյութը, առավել համակողմանի ուսումնասիրել թեման և ավելի հստակ ասելիք ձևակերպել: Կայքային լրատվությունը առավել շատ մրցավազք է հիշեցնում, քան բուն լրատվություն, ինչը արդյունք է նաև այն երևույթի, որ լրատվական դաշտում աստիճանաբար պակասում է թերթային լրագրողների` գազետչիկների թիվը, ինչի արդյունքը կայքերում առկա իրավիճակն է: Թերթը փորձելու ենք դարձնել նաև դպրոց մեր կայքերում աշխատող լրագրողների համար, ովքեր որոշակի պարբերականությամբ թերթում աշխատելու և վարպետանալու հնարավորություն կունենան:
Այս պահին ընթացքի մեջ են խմբագրակազմի ձևավորումն ու ֆունկցիոնալ բաժանումը, ընթանում են բանակցություններ գովազդային բլոկի հետ կապված, լուծվում են տեխնիկական խնդիրները: Պատրաստ եմ լսել և քննարկել յուրաքանչյուր առաջարկություն և դիտողություն:
Առաջին փուլում թերթը կլինի շաբաթաթերթ, այնուհետ անցում կկատարենք օրաթերթի ռեժիմի: Թերթը կունենա իր համացանցային տարբերակը, ինչպես նաև, բնականաբար, լավագույն նյութերը կտարածվեն մամուլի տեսությունների միջոցով, ինչպես ընդունված է ամբողջ աշխարհում:
Մյուս մանրամասների մասին` առաջիկայում: