Թափանցիկ աշխատելն այլևս հանձնարարական է
ԲԼՈԳՄանե Զաքարյանը ֆեյսբուքյան իր էջում գրում է.
Ցանկացած ժողովրդավար պետության համար չափազանց կարևոր է գերատեսչությունների աշխատանքների թափանցիկությունը: Սովորաբար կառույցների բաց աշխատանքներին նպատասում են բազմաթիվ գործոններ, որոնց մասին կարելի է անվերջ խոսել, սակայն ոչ պակաս կարևոր է ընդգծել լրատվամիջոցների դերն ու նշանակությունն այս գործում: Պետական մարմինները պետք է հաշվետու ու բաց աշխատեն ԶԼՄ-ների հետ, քանի որ հանրության և պետության միջև տեղեկատվական հիմնական կոմունիկացիան հանդիսանում են լրատվամիջոցները:
Այս համատեքստում կարևոր է ուշադրություն դարձնել կառավարության այսօրվա նիստի ժամանակ վարչապետի հնչեցրած խոսքին: Մասնավորապես գործադիրի ղեկավարը նշել է.«Առաջարկում եմ բոլոր գերատեսչությունների ղեկավարներին՝ մաքսիմալ թափանցիկ և բաց աշխատել մամուլի հետ,պարբերաբար հասարակությանը տեղակացնել մեր աշխատանքների մասին, որպեսզի նրանք տեղյակ լինեն, ինչ ենք անում, ինչի համար ենք անում և ուր ենք գնում»:
Թեման Հայաստանում մշտապես քննարկումների առիթ է եղել, ու, ենթադրում եմ, դեռ երկար կլինի: Թե ինչպիսի՞ արդյունք կունենանք մենք ապագայում, ցույց կտա ժամանակը, բայց փաստենք, որ վարչապետի մակարդակով բարձրաձայնվում է լրատվամիջոցների հետ թափանցիկ աշխատանքի թեման: