«Իրատես». Վիկտոր Դալլաքյանը կարող է ԱԺ նախագահ դառնալ. ինտրիգը պահպանվում է

«Իրատես» թերթը գրում է. «ՀՀ նախագահի աշխատակազմի ղեկավարի նախկին տեղակալ Վիկտոր Դալլաքյանի հրաժարականներն ու հայտարարությունները քաղաքական օրակարգի ամենաքննարկվող թեմաներից են։ Ձեւավորման փուլում գտնվող նրա հիմնած քաղաքական ուժի ու ենթադրյալ համախոհների առնչությամբ հարցականները շատ են, այլ խոսքով, ինտրիգը պահպանվում է։ 

Վիկտոր Դալլաքյանը գլխավոր անակնկալը պահել է հաջորդ ասուլիսի համար, որի ընթացքում նաեւ կբացահայտվի, թե ինչ կուսակցություն է ստեղծում։ Մեր տեղեկություններով, խոսքը նոր քաղաքական ուժի մասին չէ, իսկ թե ինչ լուծում է գտել նախկին խորհրդարանականը, ինչպես ինքն է ասում, հաջորդ ասուլիսի թեմա է։ Որ թիմն է միանում նրան, կամ ինչ ուժի է ինքը միանում, չհաջողվեց ճշտել, բայց որ հետաքրքիր զարգացումներ են լինելու, կասկած չունենք։ Մինչ այդ, մեկ ինտրիգային «տեսլական» եւս։

Լուրեր են շրջանառվում, թե Ազգային ժողովի ապագա նախագահը Վիկտոր Դալլաքյանն է լինելու, լրագրողներս էլ, փաստորեն, զրկվելու ենք «նյութի» անսպառ աղբյուրից՝ Գալուստ Գրիգորիչի դարակազմիկ մեկնաբանություններն «ըմբոշխնելու» հաճույքից։ Բայց կա մի «սփոփանք». եթե այս լուրն իրականություն դառնա, ԱԺ նախագահ է լինելու 83 օրենքների հեղինակ, համարյա «կոմսոմոլ», «սպորտսմեն» եւ, վերջապես, «սիրուն տղա» Վիկտոր Դալլաքյանը։ Տեսնես՝ խորհրդարա՞նն ինչ պատկեր կունենա»:

Առավել մանրամասն՝ թերթի այսօրվա համարում