ԱՄՆ-ն հորդորել է Թուրքիային հարգել Իրաքի ինքնիշխանությունը

Միացյալ Նահանգները հորդորել է Թուրքիայի և Իրաքի կառավարություններին կենտրոնանալ ընդհանուր թշնամու` «Իսլամական պետություն» ահաբեկչական խմբավորման դեմ պայքարի վրա: Ինչպես հաղորդում է «Արմենպրես»-ը, այս մասին լրագրողների հետ ամենօրյա ճ եպազրույցի ժամանակ խոսել է ԱՄՆ պետդեպի խոսնակի տեղակալ Մարկ Թոները:

«Մենք հստակորեն աջակցում ենք Թուրքիայի և Իրաքի կառավարությունների միջև կառուցողական երկխոսությանը, որը կօգնի թուլացնել լարվածությունը և լուծել ցանկացած տարաձայնություն»,- ասել է Թոները: Նա ընդգծել է, որ Իրաքի տարածքում ԻՊ դեմ իրականացվող ցանկացած գործողություն պետք է համաձայնեցվի իրաքյան կառավարության հետ: Պետդեպի խոսնակի տեղակալը հայտարարել է, որ պետք է հարգել այդ երկրի ինքնիշխանությունը:

Թուրքիայի և Իրաքի միջև հարաբերությունները լարվել են այն բանից հետո, ինչ Թուրքիայի մեջլիսը կողմ է քվեարկել Իրաքում շուրջ 2 հազարանոց զինված ուժերի տեղակայման ժամկետի երկարաձգմանը` պատճառաբանելով դա «ահաբեկչական խմբավորումների դեմ պայքարելու անհրաժեշտությամբ»:

Իրաքը դատապարտել է պաշտոնական Անկարայի նման որոշումը: Պաշտոնական Բաղդադը կատարվածն անվանել էր Իրաքի ինքնիշխանության իրավունքի ոտնահարում` պահանջելով դուրս բերել զորքերն իր տարածքից: Թուրքական կողմը, սակայն, մերժել է այդ պահանջը:

Հոկտեմբերի 5-ին Անկարան և Բաղդադը կանչել էին հակառակ երկրի դեսպաններին` հայտնելու իրենց մտահոգությունը խնդրի առնչությամբ: Իրաքը հոկտեմբերի 6-ին Միավորված ազգերի կազմակերպության Անվտանգության խորհրդից պահանջել է արտակարգ նիստ գումարել` կապված իր տարածքում թուրքական զինված ուժերի ներկայության անօրինականության հետ:

Թուրքական զորքերը տեղակայված են Մոսուլի Բաշիքայի ռազմաբազայում: Դրանք այդտեղ են հաստատվել դեռևս 2015 թվականից` «Իսլամական պետություն» ահաբեկչական խմբավորման դեմ պայքարում իրաքցի զինվորներին և քրդական փեշմերգային վարժեցնելու հիմնավորմամբ: