Բլից–հարցազրույց ԾԻԳ–ի արդեն նախկին ղեկավարի հետ

INTERVIEW 11 November, 2016 22:55

Հոկտեմբերի 25–ին պարզ դարձավ, որ նոյեմբերի 1–ից աշխատանքից ազատվելու է ՀՀ ԳՆ «Գյուղատնտեսական ծրագրերի իրականացման գրասենյակի» երկարամյա ղեկավար Գագիկ Խաչատրյանը: Նա, իհարկե, ժամանակ ունեցավ մինչև նոյեմբերի 1–ը ավարտին հասցնել «կիսատ» մնացած գործերը, բայց թե ով պետք է նրան փոխարինի, մինչ օրս պարզ չէ: Գ. Խաչատրյանի հեռանալուց հետո անցել է արդեն 10 օր, բայց մինչ օրս այդ պաշտոնը թափուր է:

Ի դեպ, Past.am-ի հետ զրույցում Գ. Խաչատրյանն ասաց, որ մինչ իր ազատման մասին լուրն իմանալը, նա նորանշանակ գյուղնախարար Իգնատի Առաքելյանի հետ այցելել է ծրագրի շրջանակներում իրականացված տարբեր ձեռնարկություններ, բայց օրեր անց նախարարն իր հետ հանդիպել և ասել է, որ Գ. Խաչատրյանը պետք է հեռանա պաշտոնից:

– Ես իմ դիմումի համաձայն եմ հեռանում այս պաշտոնից:

– Իսկ Ձեզ չե՞ն տեղեկացրել, թե ինչն է նման որոշում կայացնելու պատճառը:

– Ոչ: Ինձ ասել են, որ լավ կլինի, որ ես ազատվեմ և իմ փոխարեն այլ մարդ գա:

– Ձեր կարծիքով պատճառն անվստահությո՞ւնն է եղել Ձեր անձի հանդեպ:

– Չեմ կարծում, որ անվստահության հարց կա: Պարզապես, իմ կարծիքով, նոր պահանջներ, նոր մոտեցումներ են դրվելու, և դա է հիմնական պատճառը:

– Իսկ Դուք չէիք կարո՞ղ նոր պահանջներին համահունչ աշխատել, որ դրա համար որոշում կայացվեց Ձեզ ազատել աշխատանքից:

– Չէ, խնդիրը դա չէ, պարզապես, իմ կարծիքով, նույն մարդը պետք չէ, որ երկար տարիներ նույն պաշտոնում աշխատի:

– Քանի՞ տարի է այդ պաշտոնն էիք զբաղեցնում:

– Արդեն 10 տարին լրացել է:

– Իսկ Ձեր կարծիքով հնարավո՞ր է, որ օպտիմալացման պատճառով ԾԻԳ–ն ընդհանրապես փակվի:

– Չեմ կարծում, քանի որ սա այն ԾԻԳ–երից չէ, որ փակվի, քանի որ այստեղ սկսված ծրագրերը շատ կարևոր են ֆերմերային տնտեսությունների կայացման և զարգացման համար:

– Նոր աշխատանքի առաջարկ ստացե՞լ եք:

– Ոչ:

– Իսկ մտածե՞լ եք, թե ինչով եք շարունակելու զբաղվել:

– Դա ամենադժվար հարցն է:

– Իսկ հնարավո՞ր է, որ Դուք էլ ֆերմերային տնտեսություն հիմնեք և գյուղատնտեսության ոլորտի բիզնեսով զբաղվեք, քանի որ բավականին մոտիկից տիրապետում եք բոլոր ծրագրերին և հնարավորություններին:

– Չի բացառվում, եթե կառավարությունը գյուղատնտեսությամբ զբաղվելու համար արտոնյալ վարկեր տրամադրելու ծրագիր սկսի: Այդ ժամանակ հնարավոր է, որ որևէ նման բան մտածեմ:

Արմինե Գրիգորյան