Կարոտս ավելի շատ թատրոնի նկատմամբ է մեծ, ինչպես ասում են` բաժակս լցված է. Լիլի Միքայելյան

Life.panorama.am-ը գրում է.

Life.panorama.am-ի զրուցակիցն է դերասանուհի Լիլի Միքայելյանը, ով մայրանալուց հետո կարիերայում դադար էր հայտարարել: Լիլիի փոքրիկը` Արմինեն, արդեն 1.3 տարեկան է, դերասանուհին էլ պատրաստ է վերադառնալ աշխատանքային գործունեության, միայն թե դեռ իրեն գոհացնող առաջարկ չի ստացել:

«Բավականին երկար ժամանակ պարբերաբար առաջարկներ էի ստանում, սակայն մերժում էի դրանք, քանի որ ուզում էի ողջ ժամանակս բալիկիս տրամադրել: Հիմա էլ, իհարկե, առաջին տեղում աղջիկս է, սակայն արդեն պատրաստ եմ հետաքրքիր համագործակցությունների»,- նշեց դերասանուհին:

«Շատ եմ կարոտել նկարահանումներին, իմ ակտիվ աշխատանքային պրոցեսներին, սակայն ուզում եմ որակյալ գործերում մասնակցություն ունենալ, չեմ ուզում նկարահանվել, միայն նկարվելու համար: Միաժամանակ նշեմ, որ կարոտս ավելի շատ թատրոնի նկատմամբ է մեծ, ինչպես ասում են` բաժակս լցված է, հիմա կարիք ունեմ մեջս եղած էմոցիաները բեմում արտահայտել: Հիմա թատրոնից առաջարկներ ունեմ, սակայն ավելի շատ հակված եմ կոմերցիոն  ներկայացումներում խաղալ, քանի որ չեմ կարողանա երկար ժամանակ անցկացնել թատրոնում»,- նշեց Լիլին ու հավելեց.

«Շատ կցանկանամ աշխատել Նիկոլայ Ծատուրյանի հետ, ով իմ կուրսի ղեկավարն է եղել: Նրա հետ աշխատելը շատ ուրիշ հաճույք է: Կցանկանամ նաեւ Նարինե Գրիգորյանի հետ աշխատել»:

Մեր նկատառմանը, թե դերասանուհին հետեւո՞ւմ է արդյոք այսօրվա հեռուստաընկերությունների աշխատանքներին ու հատկապես սերիալներին եւ սիթքոմներին, պատասխանեց.

«Ոչ, ժամանակ չեմ գտնում, իսկ եթե այնուամենայնիվ ժամանակ ունենում եմ, փորձում եմ ավելի արժեքվոր բաների վրա ծախսել, օրինակ` դիտել հետաքրքիր ռեժիսորների ֆիլմեր, որոնցից ինչ-որ բան կսովորեմ: Չեմ  ուզում մեծամտություն թվա, բայց ինձ դուր չի գալիս, երբ տեսնում եմ, որ բոլորն են դերասանությամբ զբաղվում, այդ ժամանակ ասում եմ` լավ ես կման տանն ու բալիկիս հետ կզբաղվեմ»:

Առաջարկների դեպքում Լիլին կհամաձայնվի հետեւյալ պայմանների դեպքում.

«Կցանկանամ, որ նկարահանվեմ այնպիսի միջավայրում, որտեղ բոլորը լինեն պրոֆեսիոլաներ, որ իրենցից սովորեմ, աճեմ, այլ ոչ թե գնամ նկարահանման ու նայեմ, թե ինչպես են հինգ դուբլ փչացնում ու արդյունքում անորակ բան ստանում: Ինձ համար այնքան էլ ընդունելի չէ, երբ մեկը, ով դերասան չէ, նկարահանման հրապարակում ռեժիսորի նյարդերի հաշվին մի քանի դուբլից հետո ի վերջո խաղում է մի տեսարան, որի արդյունքում հեռուստադիտողն ասում, թե էս ինչ լավ դերասան է. Հեռուստադիտողը այդ ժամանակ չի՞ էլ պատկերացնում, թե այդ կադրը ինչքան տանջվելուց ու նյարդեր փչացնելուց հետո է ստացվել: Ես արվեստ եմ ուզում, թեկուզ սերիալ, բայց գեղարվեստորեն բարձր մակարդակով նկարահանված, որտեղ նկարահանվելն արդեն պատիվ կբերի, կսովորեցնի, ոչ թե ստից գնաս  ու 647 սերիա ունեցող սերիալում նկարվես»,- ընդգծեց Լիլի Միքայելյանը:

Դերասանուհին  նշեց նաեւ, որ հիմա, երբ մայրիկ է, առաջարկներն ընդունելու հարցում առավել բծախնդիր է. Այս առումով նա ամեն մանրուք ամուսնու հետ է քննարկում.

«Ամուսնուս հետ ամեն ինչ ենք քննարկում, մտածում` որքանով արժե տվյալ բանը, որքանով` ոչ: Հիմա անգամ չգիտեմ` առաջ էլ եմ արդյոք այսպես մտածել, թե ոչ, բայց բալիկիս ծնունդից հետո շատ բծախնդիր եմ դարձել: Վերջերս մի ներկայացման առաջարկ ստացա, որտեղ բաց տեսարաններ էին լինելու, ու հասկացա, որ դրան պատրաստ չեմ, երբեւէ չեմ անի մի բան, որ կողքից վատ աչքով նայեն ու մատնացույց անեն ինձ ու աղջկաս: Իհարկե, ես ունեմ սկզբունքներ, որոնց վրայով երբեք չեմ անցնի, սակայն միաժամանակ գիտեմ, որ եթե ռեժիսորը իսկական մասնագետ լինի, ամենագռեհիկ տեսարանն էլ կարող է արվեստի գործ դարձնել»,- հավելեց երիտասարդ դերասանուհին:

Վերջում խոսելով փոքրիկից` Լիլին ժպիտով պատմեց.

«Աղջիկս շատ ակտիվ ու չարաճճի է, վաղուց քայլում է, արդեն նաեւ խոսում: Ողջ օրս իր հետ եմ անցկացնում. նա անդադար քանդում է, ես անդադար հավաքում»: