Հ1–ը բրազիլական սերիալներից չի հրաժարվում

Լատինամերիկյան հեռուստասերիալները վերադարձել են Հանրային հեռուստաընկերության եթեր, տարիներ առաջ Հ1–ի ղեկավարությունը հայտարարել էր դրանք եթերից վերջնականապես դուրս մղելու մասին: Նման հայտարարություն արել էր Հանրային հեռուստառադիոընկերության խորհրդի նախկին նախագահ Ալեքսան Հարությունյանը 2010թ.–ին՝ հայտարարելով, որ իրենք այլևս ձերբազատվել են էժանագին հումորներից, լատինամերիկյան սերիալներից ու կրիմինալից: 

Իսկ Հանրային հեռուստաընկերության կայքի «Մեր մասին» բաժնում, որտեղ վերջին թարմացումը կատարվել է 2008 թ.–ին, գրված է, որ այդ տարի նվազեցին, այնուհետև եթերից դուրս եկան լատինամերիկյան սերիալները: Այդ թվականից հետո Հեռուստաընկերության որդեգրած նոր քաղաքականության կամ եթերացանկի փոփոխության մասին բաժնում ոչ մի նշում չկա: 

Հանրային հեռուստաընկերության հասարակայնության հետ կապերի բաժնի պետ Արուսյակ Զախարյանը Past.am-ի հետ զրույցում ասաց, որ Հ1–ը տարիներ առաջ մի քաղաքականություն էր որդեգրել, ըստ որի տեղական բազմասերիանոց սերիալները ամբողջովին դուրս կմղվեն եթերից՝ իրենց տեղը զիջելով որակյալ ու հետաքրքիր ֆիլմաշարերին: Սակայն արդեն քանի շաբաթ է՝ երկրի միակ պետական հեռուստաալիքը եթեր է հեռարձակում «Բուգի–վուգի» վերնագրով բրազիլական բազմասերիանոց ֆիլմ։ 

– Տիկին Զախարյան, չէ՞ որ որոշում կար՝ վերանայել Հ1–ի քաղաքականությունը և լատինամերիկյան սերիալներ չցուցադրել։ Ի՞նչ է տեղի ունեցել։ Հիմա Հ1–ի ղեկավարությունը փոխե՞լ է իր մոտեցումները։

– Մոտավորապես 3–3,5 տարի առաջ, որպես Հանրային հեռուստաընկերության քաղաքականություն՝ որոշում էր ընդունվել այն մասին, որ տեղական արտադրության բազմասերիանոց ֆիլմեր չպիտի ցուցադրվեն և որպես այլընտրանք մենք մեր հեռուստադիտողներին կառաջարկենք 24 մասից բաղկացած ֆիլմաշարեր, այլ ոչ թե 200 կամ 300 սերիաներից բաղկացած հեռուստանովելներ: Մեր հիմնական նպատակը այդ ֆիլմաշարերի միջոցով հերոսներ դաստիարակելն էր: Դրանց թվում էին «Շտապ օգնություն» 3D, «Մեր գյուղը» ֆիլմերը: Նպատակ էր եղել ստեղծել այնպիսի ֆիլմաշարեր, որոնք Հանրային հեռուստաընկերության հեռուստադիտողին հնարավորություն կտային ևս մեկ անգամ վերարժևորելու մեր իրականությունը: Սերիալները մինիմալիզացվեցին Հանրայինի եթերում: Եթե տարիներ առաջ դուք կտեսնեիք 1–ից ավելի սերիալ, ապա հիմա ընդամենը մեկ բրազիլիական սերիալ կա, օրվա մեջ մեկ անգամ ցուցադրվող: Այն ցուցադրում ենք տնային տնտեսուհիների համար, ովքեր իսկապես սիրում են այն: Չէ՞ որ Հանրային հեռուստաընկերությունը պիտի մաքսիմալ կերպով ապահովի հանրության ամենատարբեր շերտերի հեռուստատեսային պահանջմունքները: 

– Ասվածից հետևում է, որ լատինամերիկյան սերիալների մուտքը Հ1՝ հանդիսատեսի պահանջարկի արդյունք է:

– Ոչ, առաջնայինը հեռուստադիտողին կրթելու պահանջմունքն է, ինչի համար էլ մենք հանեցինք բազմասերիանոց սերիալները՝ դրանք փոխարինելով մշակութային, կրթական, հայրենասիրական ու ճանաչողական հաղորդումներով, այսինքն՝ հանելով դրանք մեր եթերացանկից, կարողացանք որակյալ հաղորդումներ մատուցել հեռուստադիտողին: Իսկ վերջին 3 տարիներին անընդմեջ ցուցադրել ենք բրազիլիական սերիալներ, և երբ վերջինն ավարտվեց, սկսեցինք եթեր տալ «Բուգի–վուգին»:

– Որքանո՞վ է գնվել սերիալը:

– Դա կոմերցիոն գաղտնիք է: Հանրային հեռուստաընկերությունն իր գործունեության մասին հաշվետվությունները ներկայացնում է Ազգային ժողով, դուք դա կարող եք տեսնել ԱԺ–ի կայքում: Բայց այն, թե ֆիլմը կամ սերիալը որքանով է գնվել, չենք կարող հրապարակել: 

– Բրազիլական սերիալների համար վճարած գումարը գանձվում է պետբյուջեի՞ց, թե՞ այլ միջոցներից, եթե այո՝ որո՞նք են դրանք:

– Հանրային հեռուստաընկերությունն ինքն է որոշում, թե իր ֆինանսներն ինչպես բաշխի, այլ բան չեմ կարող ասել:


ՔՐԻՍՏԻՆԱ ՏԵՐ–ՄԱԹԵՎՈՍՅԱՆ