Փնթփնթոցներ կառավարության հասցեին, ինչո՞վ են պայմանավորված դրանք

Նոր կառավարությանը քաղաքական ուժերի ներկայացուցիչներից շատերը ընդունեցին բավական ջերմ՝ ասելով, թե այն իր հետ կբերի կառավարման նոր մշակույթ: Սակայն այսօր արդեն քաղաքական կուլիսներում լսվում են փնթփնթոցներ ու դժգոհություններ: Թե ինչու անկախությունից մինչ վերջերս կիսախարխլված կառավարման համակարգով յոլա գնացողները որոշեցին բողոքել նաև Կարապետյանից ու նրա թիմից Past.am-ը հետաքրքրվեց նախ ԱԺ ՀՀԿ խմբակցության պատգամավոր Վահրամ Մկրտչյանից, ով խնդիրը դիտարկեց երկու հարթությունում. «Փոփոխություն իրականացնող մարդիկ հանդիպում են հների բուռն քննադատություններին ու դիմադրությանը, ինչպես նաև նորերին, որոնց ձեռնտու է այդ փոփոխությունը: Սակայն նրանք արժանանում են նորերի սառը վերաբերմունքին, քանի որ նորերը չեն հավատում, որ որևէ փոփոխություն կլինի»,– ասաց պատգամավորը՝ հավելելով. «Ցանկացած փոփոխություն ենթադրում է, որ նախկինում եղածներից ինչ–որ բան պետք է մերժենք: Մերժվում է վատ աշխատելը, թերանալը, բյուջեն լափելը, ստվերը, կոռուպցիան: Այդ փնթփնթացողների մեջ կարող են նաև իշխանականներ լինել, դրանք այն մարդիկ կլինեն, որոնց ձեռք չի տալիս կառավարման նոր մոդելը, դեպի դրական փոփոխությունները»,– նկատեց Վ. Մկրտչյանը:

 

Ըստ պատգամավորի՝ մինչ օրս կառավարության կողմից իրականացված քայլերը շոշափելի չեն, սակայն պատճառը կարճ ժամանակն է, պետք է սպասել գոնե 100 օր հստակ արդյունքներ գրանցելու համար:

 

ԱԺ ՀԱԿ խմբակցության պատգամավոր Լյուդմիլա Սարգսյանն էլ կարծում է, որ դժգոհելն արդեն սովորույթ է դարձել և՛ քաղաքական դաշտում, և՛ հասարակության մեջ. «Մի կողմից չի կարելի մեղադրել հասարակությանն ու քաղաքական գործիչներին, քանի որ մենք ունեցել ենք բազմաթիվ տապալված կառավարություններ: Եղել են կառավարություններ, որոնք որդեգրել են մի քաղաքականություն, որը պարզապես չեն կարողացել լիարժեք իրականացնել: Դրա բացատրություններն էլ շատ տարբեր են եղել. մի կողմից իշխող քաղաքական ուժի քաղաքական կամքի բացակայությունն է, մյուս կողմից էլ՝ ակնհայտ էր, որ իրական կառավարության տերը ոչ թե վարչապետն է, այլ երկրի նախագահը:

 

Բոլոր դեպքերում այս կամ այն քաղաքական կուրսը, որը վերցնում էր կառավարությունը, այսպես թե այնպես, տարբեր թելերով կապված են իրար ու շատ դժվար է նաև այդ կուրսն իրականացնել, քանի որ միշտ ինչ–որ մեկի ոտքը սեղմում ես այդ ընթացքում: Եվ վերջին հաշվով, կառավարությունը պետք է ունենար այդ թույլտվությունը, որպեսզի կարողանար որևէ մեկի ոտքը կոխ տալ»,– ասաց Լ. Սարգսյանը՝ հավելելով, որ Կարեն Կարապետյանի հետ կապված հասարակությունը հույսեր ունի. «Կառավարությունը պետք է կարողանա փոփոխություն իրականացնել, իսկ մարդիկ էլ պետք է հույսով ապրեն և իմանան, որ մոտ ապագայում կյանքը կբարեփոխվի: Ես հակված չեմ նրան, որ ամեն ինչ պետք է սևացնել ու ոչնչացնել:

 

Երբ կառավարությունը չի անի այն, ինչ պահանջվում է, այդ ժամանակ նոր բոլորս կքարկոծենք: Կառավարությունը որդեգրել է պայքար ստվերի ու կոռուպցիայի դեմ, ժողովուրդն էլ սպասում է արդյունքներին, ու դրանք չպետք է ուշանան, որովհետև կոռուպցիայի աղբյուրները մենք շատ լավ գիտենք, գիտենք նաև թե որ հատվածում է ստվերը: Պետք է սկսել աշխատել, որ մարդիկ էլ տեսնեն, որ, օրինակ, տվյալ կաշառակեր չինովնիկին հանում են մեջտեղից, այն օլիգարխին, որը ստվերում է աշխատում բերում են հարկային դաշտ: Պետք է լինեն շատ կոնկրետ ու առարկայական օրինակներ, որ ժողովուրդն իր հավատը պահպանի ու հույսով սպասի նոր բարեփոխումների»: