Հայաստանը հանրակրթության ոլորտում ունի լուրջ ձեռքբերումներ. Լևոն Մկրտչյան

 Հայաստանն ունի միջին եվրոպական մակարդակի հանրակրթական համակարգ և լուրջ ձեռքբերումներ։ «Քվանտ» վարժարանում ՀՀ Նախագահ Սերժ Սարգսյանի կատարած շրջայցից հետո լրագրողների հետ զրույցում այս մասին ասաց ՀՀ կրթության և գիտության նախարար Լևոն Մկրտչյանը: «Օրինակ, վերջերս Հայաստան այցելած ԵՄ հանձնակատար Կարլոս Մոեդաշը «Թումո» կենտրոնում լինելուց հետո ասաց, որ մենք Հայաստանում ունենք 21-րդ դարի ապագա դպրոց։ Այսինքն, մենք ունենք պիկեր, ունենք նաև միջին մակարդակ և պետք է փորձենք հնարավորինս մեր հիմնահարցերը լուծել՝ հաշվի առնելով մեր առանձնահատկությունները, ինչպես, օրինակ, ներկայումս անում են Ֆինլանդիայում։ Ոչ մի այլ երկրում 1380 դպրոցի մեջ չեք գտնի 850 դպրոց, որոնք ունեն 300-ից քիչ աշակերտ։ Հայաստանում կա 100-ից պակաս աշակերտ ունեցող 400 դպրոց։ Մեր գյուղական դպրոցների երկկոմպլեկտ ու եռակոմպլեկտ խնդիրները պետք է լուծենք, ինչպես լուծել են ֆինները, կամ այլ ժողովուրդներն՝ իրենց առանձնահատկություններով։ Մենք պետք է կարողանանք օգտագործել առաջավոր տեխնոլոգիաները և հասնել նրան, որ հանրակրթության մեջ ներառված մեր երեխաներն, անկախ նրանից՝ որտեղ են սովորում, ունենան նույն հնարավորությունները։ Սա մեր հիմնական խնդիրն է։ Իսկ այն, թե ինչպես պետք է այս ամենը ձևակերպել, կերևա նախարարության առաջիկա ծրագրերում»,- «Արմենպրես»-ի հաղորդմամբ՝ ասաց Լևոն Մկրտչյանը։

Ֆինլանդիայում իրականացվող կրթական բարեփոխումների մասին խոսելով՝ նախարարը տեղեկացրեց, որ այնտեղ խոսքը գնում է ոչ թե հանրակրթությունից հրաժարվելու, այլ ավագ դպրոցը՝ «ցիվիլիզացիոն» ուսուցման սկզբունքի անցնելու մեջ։ Այսինքն՝ վերցնում են կոնկրետ խնդիրն ու դրա շուրջ բարձրացնում են երեխաների մակարդակը։ Դրա համար պետք է ունենալ շատ լուրջ հանրակրթություն, իրենք շատ մշակված են իրականացնում այդ ծրագիրը։ «Ինչ վերաբերում է այս կոնտեքստում Հայաստանում անհրաժեշտ բարեփոխումներին, ապա մեր խնդիրն ավագ դպրոցն է, բակալավրիրատն ու մագիստրատուրան․ այսինքն, այն պահից, երբ մենք սկսում ենք մասնագիտական կողմնորոշվածություն կյանքի կոչել, այդ պահից ճիշտ կլինի ձերբազատվել այն կառուցվածքից, որ մենք ունենք։ Հիմա մենք 10-12 դասարաններն ուղեկցում ենք 15 առարկաներով, իսկ դա երեխաների համար ծանրություն է»,- հավելեց նախարարը։

 

Խոսելով քննարկման առարկա դարձած թեմաների մասին՝ նախարարը, որպես օրինակ, նշեց մասնավոր դպրոցական համակարգի զարգացման հեռանկարները, ուսուցիչների կատարելագործման ու վերապատրաստման գործընթացները, նրանց մոտ մոտիվացիա առաջացնելու հիմնախնդիրը, երբ լավ աշխատող ուսուցիչը նույն «քանոնով» չգնահատվի, ինչպես նաև երեխաների ծանրաբեռնվածության հիմնահարցերը։ Քննարկվել է նաև ավագ դպրոցը, որում շուրջ 15 առարկաների ծանրությունը շատ աշակերտների հնարավորություն չի տալիս ունենալ ավելի մասնագիտական կողմնորոշվածություն։ «Այդ իմաստով այս տա րի առաջին քայլն արել ենք, դեկտեմբերին կանցկացվեն քննությունները և կընտրվի երեք առարկա։ Տեսնենք, թե դա ինչ արդյունք կտա։ Այդ ամենը, երևի թե, կամփոփենք առաջիկայում հանրապետության նախագահի մոտ»,- ասաց նախարարը։

Նախարարը հավելեց, որ «Քվանտ» վարժարանը հանրակրթության գրեթե բոլոր ուղղություններով ունի հաջողված ծրագրեր․ դա վերաբերում է թե երեխաներին դեպի գիտություն ու հետազոտություն ուղղորդելուն, թե միջազգային բակալավրիատին, ավագ ու կրտսեր դպրոցներին։ «Այս իմաստով «Քվանտ» վարժարանը մոդելային է։ Մենք առիթ ունեցանք նախագահին ներկայացնելու առաջիկայում մեր կողմից իրականացվելիք խնդիրները, և հանձնարարական հնչեց հանրակրթության մասնագետների հետ նախապատրաստել հիմնահարցերը, ինչից հետո դրանք կներկայացնենÖ „ հանրապետության նախագահին։ Կներկայացվի հանրակրթությունում առկա իրավիճակը, մեր անելիքները։ Բավականին լուրջ ծրագրային, չափորոշիչային բարեփոխումների ընթացքի մեջ ենք, հետևաբար անհրաժեշտ է հստակեցնել քաղաքականությունը»,- «Արմենպրես»-ի հաղորդմամբ՝ նշեց նախարարը։

Խոսելով  «Քվանտ» վարժարանի խնդիրների մասին՝ նախարարը նշեց, որ կրթահամալիրն իր խնդիրները հաճույքով, հանգիստ ու աշխատասեր ձևով հաղթահարում է։ «Իսկ մենք հնարավորինս պետք է չխանգարենք, թողնենք, որ իրենք իրենց ծրագրերով աշխատեն և բարձրացնեն իրենց որակը, ինչպես և անում են։ Կրթահամալիրի մոտ խնդիրների առկայության դեպքում պետությունը կօգնի, ինչով կարող է։ Վարժարանի տնօրենը, լինելով գիտնական և անկեղծ մարդ, նախագահին հստակ ներկայացրեց ոչ միայն այս դպրոցի, այլև հանրակրթության նկատմամբ իր վերաբերմունքը և ա ռկա հիմնահարցերը։ Որովհետև այստեղ հավաքվել է համալսարանական այն թիմը, որը հանրակրթություն մտավ՝  մտահոգվելով կրթության որակի անկմամբ։ Այսինքն, իսկապես մոտիվացված կազմ ունի «Քվանտ» վարժարանը և դրանով էլ հասարակության մոտ առկա է այն գնահատականը, որ այն մեր լավագույն դպրոցներից է»,- եզրափակեց Լևոն Մկրտչյանը։