Արմեն Մարտիրոսյան. «Էլեկտրոնային գիրք ընթերցողների 60%–ը գնում է այդ գրքերը` տանն ունենալու համար»

INTERVIEW 24 November, 2016 20:37

«Անտարես» հրատարակչության տնօրեն Արմեն Մարտիրոսյանի հետ զրուցեցինք հրատարակչությունում տպագրվող գրքերի քանակի նվազման պատճառների, ընթերցողների գրքային նախասիրությունների և ընթերցանության վրա իշխանության անմիջական ազդեցության մասին:

– Պարոն Մարտիրոսյան, վերջին մեկ–երկու տարում հրատարակվող գրքերի թիվն աճե՞լ է, թե՞ նվազել:

– Անցյալ տարի ռեկորդ ենք սահմանել՝ 152 անուն գիրք ենք հրատարակել: Նախորդ տարիներին մոտ 100 է եղել, իսկ գրքերի տպաքանակն էլ 500–ից իջել է 300–ի, ամեն անուն գրքից մենք տարվա մեջ 40 հատ ենք վաճառում: Խորհրդային տարիներին ավելի շատ է եղել տպաքանակը, բայց մեզ ավելի շատ հուզում է ոչ թե տպաքանակը, անգամ ոչ էլ գնվող գրքերի քանակը, այլ ընթերցողների քանակը: Ես կարծում եմ այն տարիներին ոչ թե շատ էին կարդում, այլ շատ էին առնում: Գիրք գնելը ինտելեկտի հետ կապ ուներ: Եվ մարդիկ իրենց ինտելեկտի կապը փորձում էին արտահայտել իրենց դարակներում դրված գրքերի միջոցով: Հիմա մարդիկ մտածում են, թե` ինչի ես լինեմ ինտելեկտուալ, եթե ինտելեկտուալը հաջողության հասնելու ճանապարհ չէ: Եթե ես ունեմ լավ պաշտոն, դա հաջողության նշան է, բայց հիմա այդ պաշտոնին հասնելու համար պետք չէ ինտելեկտուալ լինել, դրան պետք չէ գիտելիքով հասնել: Ո՛չ գիտելիքով, ո՛չ դաստիարակությամբ, ո՛չ աշխատասիրությամբ այդ պաշտոնին չես հասնի:

Այսօր Հայաստանում պաշտոնը տրվում է զավակին, մենք առնվազն ունենք երկու վարչապետի դեպք, երբ նրանց տղաները դարձել են քաղաքապետ: Մենք ունենք նախարար, որի որդին փոխնախարար է աշխատում: Այս երևույթները հնարավորություն չեն տա տպաքանակը բարձրացնելու: Ինչի՞ ես սովորեմ կամ կարդամ, գիտելիքով զինվեմ, եթե այդ գիտելիքը ինձ խանգարելու է դառնալ «հաջողակ», այսօրվա հայաստանյան խեղաթյուրված հաջողակի մասին է խոսքը: Ես չեմ կարծում, որ նրանք, ովքեր այսօր իշխանություն են, հաջողակ են: Ինչի՞ ես հղկվեմ, դաստիարակվեմ, արժանիքներ ձեռք բերեմ, որպեսզի չկարողանամ «սապոնվեմ» այս կամ այն պաշտոնյային՝ այս կամ այն առավելությունը ստանալու համար: Բա ասում եք, ինչի՞ է տպաքանակը նվազել. քանի որ գրքերը մեր կյանքի կանոններին խանգարում են:

– Այս տարի հրատարակված գրքերի թիվը հասնո՞ւմ է հարյուրի:

– Ոչ, հարյուր չկա: Նախորդ տարի 152 գիրք հրատարակելը մեզ համար շատ ծանր եղավ, բավականաչափ հաստիքներ կրճատվեցին, բայց մենք դարձանք ավելի կուռ ու ճկուն: Պետք է հրատարակել ավելի քիչ գրքեր, բայց նպատակային, փորձել դրանց միջոցով Հայաստանում քաղաքացի դաստիարակել:

– Պարոն Մարտիրոսյան, էկեկտրոնային գրքերի առկայությունը և վաճառքը համացանցում չի՞ խոչընդոտում գրքերի տպագրությանը:

– Տեխնոլոգիաների զարգացումը միայն օգնում է գրքի համար ճանապարհ բացելուն: «Ֆորբսի» տվյալներով մարդկանց 60%–ը, ովքեր կարդացել են էլեկտրոնային գիրք, այնուհետև գնել են նույն գիրքը իրենց տանն ունենալու համար:

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ