Ինստիտուցիոնալ ընդդիմության կայացման աստիճանից է կախված իշխանափոխության հնարավորությունը

2017 թ. կայանալիք խորհրդարանական ընտրություններին ընդառաջ հնարավոր է մի շարք դաշինքներ ձևավորվեն։ Այս մասին են փաստում մի շարք կուսակցությունների կողմից կա­տարված նախնական հայտարարությունները։ Հնարավոր համագործակցության վերաբերյալ Past.am-ը զրուցեց «Քաղաքացիական պայմանագիր» կուսակցության վարչության անդամ Արայիկ Հարությունյանի հետ։

– Պարոն Հարությունյան, լուրեր կան, որ նոր խորհրդարանական ընտրություննե­րում դուք դաշինքով հանդես կգաք, բայց մինչ Վանաձորի և Գյումրու ՏԻՄ ընտրու­թյունները դեմ էիք նման քայլերին, ի՞նչն է հիմա փոխվել։

– Ոչինչ չի փոխվել, «Քաղաքացիական պայմանագիրը» նույնիսկ Վանաձո­րի և Գյումրու ընտրություններից առաջ էր հայտարարել, որ պատրաստվում է մեկ ընդ­դիմություն ձևավորելու շուրջ բանակցու­թյուններ և քննարկումներ սկսել այն ուժերի հետ, որոնք շահագրգռված կլինեն նման ֆորմատների ձևավորմանը և պատրաստ կլինեն նման ձևաչափերի գնալ։ Այն ժամա­նակ մենք Գյումրիում «ԳԱԼԱ» կուսակցությանը առաջարկեցինք ընտրություններին մաս­նակցել դաշինքով՝ հետագայում մեկ կուսակցության, մեկ քաղաքական ուժի մեջ միա­վորվելու հեռանկարով։ Հիմա այդ նույն տրա­մաբանությամբ մենք շարունակում ենք մեր քաղաքականությունը և շփումներ ունենք որոշ քաղաքական ուժերի հետ՝ հասկանալու, թե ի վերջո, ինչ ֆորմատով ենք մասնակցելու ընտրություններին։

– Արդեն որոշե՞լ եք, թե որ կուսակցության կամ կուսակցությունների հետ կհամագործակցեք:

– Հիմա որոշ ուժերի հետ շփումներ կան, բայց դրանց հետ գործնական և որոշակի արդյունք դեռևս չունենք։ Պարզապես շփում­ներ են հնարավոր համագործակցության վերաբերյալ։ Ֆորմատները և անունները հայտ­նի կդառնան, երբ որ դրանք միս ու արյուն ստանան։

– «Քաղաքացիական պայմանագիրը» ինքնուրույն հանդես գալու դեպքում չի՞ կա­րողանա ապահովել իրեն անհրաժեշտ մանդատների թիվը խորհրդարանում։

– «Քաղաքացիական պայմանագիրը» պատրաստ է ցանկացած կերպով պայքարե­լու իշխանափոխության համար։ Հիմա քննարկվում են բոլոր արդյունավետ տարբե­րակները, որպեսզի այդ հնարավորություննե­րը է'լ ավելի մեծանան։ Մենք հայտարա­րել ենք, որ իշխանափոխությունը Հայաստա­նում հնարավոր է այն դեպքում, երբ ձևավոր­վի մեկ միասնական ընդդիմադիր ուժ՝ իր ինստիտուցիոնալ բոլոր օղակներով ու կա­ռույցներով։ Միայն այս դեպքում հնարավոր կլինի իշխանափոխություն իրականացնել։ Մենք այս բոլոր ուղղություններով մեր աշխա­տանքը շարունակում ենք և փորձում ենք պայքարի ավելի արդյունավետ միջոցներ գտնել։

– Իսկ մտավախություն չունե՞ք, որ կա­րող է այնպես լինել, որ ձեզ օգնելու փոխա­րեն նաև խանգարեն։

– Մենք մեր բոլոր շփումների ժամանակ նախկինում դաշինքային տրամաբանության բոլոր խնդիրները հաշվի ենք առնում, փոր­ձում ենք այնպիսի մթնոլորտ ձևավո­րել և հնարավոր համագործակցության մա­սին խոսակցություններն ու պայմանավոր­վածությունները այնպես տանել, որպեսզի բացառենք նախկինում այլ քաղաքական ուժերի կողմից թույլ տրված սխալները։ Իհարկե, դրա հնարավորությունը կա, բայց այսպես մենք կփորձենք մաքսիմալ նվազա­գույնի հասցնել դրանք։

– Դուք գնում եք իշխանափոխության, համոզվա՞ծ եք, որ դրան կհասնեք։

– Գիտեք, այն ուժը, որը չի ձգտում իշխա­նափոխության և պարզապես մասնակցում է մասնակցության համար, գոյություն ունենա­լու իրավունք չունի։ Իհարկե, ցանկացած քաղաքական ուժ փորձում է առավելագույնը ստանալ տվյալ ժամանակահատվածում, թեև իր կարճաժամկետ կամ երկարաժամկետ ծրագրերում ունենալով նաև իշխանափոխու­թյան ծրագիրը։ Հիմա որքանով մեզ կհաջող­վի հասնել իշխանափոխության կետին, այդ մասին մենք կհայտարարենք ավելի ուշ։ Մեր կողմից հռչակված ինստիտուցիոնալ ընդդի­մության կայացման աստիճանից է կախված իշխանափոխության հնարավորությունը։

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ