Ֆիյոնը դարձյալ վստահ հաղթանակ տոնեց

Եվ այսպես՝ նախկին վարչապետ, ներկա խորհրդարանական Ֆրանսուա Ֆիյոնը, որին այս պահին Եվրոպայի ամենառուսական թեկնածուն են համարում՝ ակնարկելով ՌԴ նախագահ Պուտինի հետ ունեցած հրաշալի հարաբերությունները, կիրակի օրը վերջնականապես հաղթանակ տարավ նախնական քվեարկությունների ընթացքում: Այսինքն, առաջիկա գարնանը հանրապետական Ֆիյոնը Ֆրանսիայի նախագահի միասնական թեկնածուն կլինի միաժամանակ աջերի ու ցենտրիստների համար, ինչը, եվրոպական քաղաքական էլիտայի տեսանկյունից, ամենևին էլ ուրախալի փաստ չէ՝ հասկանալի՛ պատճառներով:

Բայց դա Ֆիյոնին առանձնապես չի վշտացնում: Նա շատ հանգիստ պարզաբանեց, թե նախ՝ այդքան թմբկահարվող Պուտին–Ֆիյոն հարաբերությունները ժամանակին վարչապետական–գործընկերային նորմալ հարաբերություններ են եղել ընդամենը, և հետո՝ Ֆրանսիան ի՛նքը պիտի ընտրի իր նախագահին, ելնելով թեկնածուների խարիզմայից և առաջարկվող ծրագրերից: Իսկ առաջարկվում են, ինչպես միշտ, բարեփոխումներ: Ընդ որում՝ ամենուր. սոցիալական ոլորտից մինչև ֆինանսական կառավարում: Եվ, հավանաբար, սոցիալիստ Օլանդի գործունեությունից դժգոհ աջերը Ֆիյոնին ընտրեցին միայն այն պատճառով, որ ի տարբերություն ավելի կոնսերվատիվ Ժյուպպեի՝ առավել հակված է բարեփոխումների, բոլոր առումներով հարձակողական է և, այսպես ասած, ամենաբրուտալը թեկնածուներից:

Ֆիյոնն, օրինակ, խոստանում է իր երկրի շահերն ավելի բարձր ձայնով ներկայացնել Բրյուսելում, ավելի լրջմիտ լինել միգրացիոն քաղաքականության հարցում, առաջիկա մի քանի տարում 6,5 մլն հաշվվող պետական ապարատը կրճատել 500000–ով, եղածների ծախսերն էլ նվազեցնել՝ ազատ միջոցները ավելի արդյունավետ գործածելով: Արդեն 2017–ին խոստանում է անցնել շաբաթական 39–ժամյա աշխատանքային ռեժիմի, 20%–ով ավելացնել երկրի ՀՆԱ–ն և 110 մլն եվրոյով նվազեցնել երկրի պետական պարտքը:

Ինչ վերաբերում է արտաքին քաղաքականությանը՝ Ֆիյոնը հայտարարում է, թե անհրաժեշտ է վախենալ չգործելուց, ոչ թե, իբր, անցանկալի անձանց հետ դիալոգից: Օրինակ, նա Սիրիայի նախագահ Ասադին ավելի մեծ չարիք չի երևակայում, քան Իսլամական պետությանը և վերջինիս ոչնչացնելու համար պատրաստ է Ասադի հետ երկխոսության գնալ: Կամ, միջազգային ահաբեկչության դեմ պայքարը չի պատկերացնում առանց Ռուսաստանի և այդ նպատակով դարձյա՛լ պատրաստ է ամենասերտ կերպով համագործակցել Պուտինի հետ: Ավելին, Ֆիյոնը կործանարար է որակում Օլանդի քաղաքականությունը, որն ամերիկյան սերտ գործընկերությունը շփոթել է ամեն բանում նրան ենթարկվելու և Ռուսաստանին տեսակ–տեսակ պատժամիջոցներով ավելի կատաղեցնելու հետ: Դե իսկ Ղրիմի անեքսիան էլ նույնքան անթույլատրելի է համարում, որքան Պորոշենկոյի՝ Մինսկի համաձայնագրին չհետևելն ու Դոնբասին հատուկ կարգավիճակ տալու նպատակով կազմակերպվելիք հանրաքվեի չկայացումը: Կամ, Կոսովոյի անկախությունը, որ պակաս անեքսիա չէր նրա տեսանկյունից: Պարզապես՝ միջազգային համախմբմամբ էր իրականացված…

Ֆիյոնն, ի դեպ, համոզված կաթոլիկ է: Այսպես կոչված՝ մաքուր ֆրանսիացի, որը համարում է, թե Ֆրանսիա եկած միգրանտները նույնպես պարտավոր են իրենց գույնն ավելացնելով հանդերձ՝ ֆրանսիացի դառնալ: Ընտանեկան պահպանողական արժեքների կրող է և անչափ բարձր է գնահատում այն ամենը, ինչն ընդունված է կոչել ֆրանսիական: Արվեստից մինչև խոհանոց: Չորս որդիների և դստեր հայր է, տասնամյակներ շարունակ ապրում է Սարտ արվարձանի խստաշունչ և հին առանձնատանը: Պաշտում է մեքենաներն ու դրա հետ կապված ցանկացած բան: Շարժիչ հավաքելուց մինչև Ֆորմուլա–1: Բայց թե այդ կիրքը ուր կհասցնի Ֆրանսիան՝ այն կառավարելու ընթացքում, դեռ անորոշ է: Դրա համար Ֆիյոնը նախ պիտի հաջորդ տարի Ֆրանսիայի նախագահը դառնա: