Վիգեն Հակոբյան. «2017–18 թթ. Կարեն Կարապետյանի համար ռիսկային կլինի»

ECONOMICS 30 November, 2016 21:41

Քաղաքական տեխնոլոգ Վիգեն Հակոբյանի կարծիքով, թեև ՀՀԿ–ի 16–րդ համագումարը շատերի համար ձանձրալի էր, բայց նրա ընթացքում հնչեցին այն բոլոր հիմնական ուղերձները, որոնց սպասում էր քաղաքական դաշտը և որոնցից էլ բխելու է մնացած քաղաքական դերակատարների մարտավարությունը: Դրանցից երեքի մասին խոսեց քաղտեխնոլոգը «Նովոստի Արմենիա» մամուլի ակումբում տեղի ունեցած ասուլիսի ընթացքում:

«Դրանցից առանձնացնեմ երեքը: Նախևառաջ, Կարեն Կարապետյանի հետ կապված ուղերձը. եթե ՀՀԿ–ն հաջողության է հասնում, նա մնում է վարչապետ: Երկրորդ ուղերձն այն էր, որ Կարեն Կարապետյանին շնորհվեց հատուկ կարգավիճակ, ստեղծվեց առաջին տեղակալի պաշտոն, և ես կարծում եմ, որ կուսակցության գերագույն մարմնի առաջիկա նիստում Կարապետյանին կհաստատեն այդ պաշտոնում: Իսկ երրորդ ուղերձն այն էր, որ հեղափոխություն կուսակցության ներսում գոնե այս փուլում տեղի չունեցավ: Հիմնականում այն ֆինանսատնտեսական ազդեցության խմբերը, որոնք գոյություն ունեն հանրապետական կուսակցության վերնախավում իրենց մասնաբաժինը, կարծես թե, պահպանեցին, ավելացան նոր մարդիկ՝ Կարեն Կարապետյանն ու Վիգեն Սարգսյանը»,– նշեց նա:

Վիգեն Հակոբյանի խոսքով՝ Կարեն Կարապետյանի նշանակումը ներքին և արտաքին քաղաքական շահերի համադրում էր: «Բոլորս հասկանում ենք, որ «Գազպրոմի» բավական բարձր պաշտոնից մարդուն հենց այնպես չեն բերի այստեղ, դա չէր լինի առանց որևէ երաշխիքի և հեռանկարի»,– հավելեց նա:

Past.am-ի այն հարցին, թե որոնք են այդ ակնկալիքները՝ Հակոբյանը պատասխանեց, որ տնտեսական այսպիսի կատաստրոֆիկ պայմաններում վարչապետ նշանակելը ռուսերեն ասած՝ расстрельная должность է: «Ժամանակին Հովիկ Աբրահամյանն ավելի շատ ամբիցիաներ ուներ, նրան վարչապետ նշանակելով երևի թե ասացին՝ «եթե ստացվի կշարունակես»: Ես կարծում եմ, որ նման մի բան այս դեպքում էլ է ասվել, ուղղակի Հովիկ Աբրահամյանին նշանակեցին ընտրություններից երեք տարի առաջ և այդ երեք տարվա ընթացքում կարելի էր շատ հեշտ տապալվել, վեց ամսվա ընթացքում կարելի է չհասցնել տապալվել: 2017–18 թթ. Կարապետյանի համար ռիսկային է լինելու»,– հավելեց նա:

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ