Ռուսաստանի ու արևմուտքի համար գերխնդիր չէ մեր խորհրդարանի ձևավորմանը միջամտելը

Մեր հյուրն է քաղաքագետ Ստեփան Գրիգորյանը.

– Պարոն Գրիգորյան, ինչպե՞ս կմեկնաբանեք ԱՄՆ կառավարության պատրաստակամությունը` միանալ Եվրամիության, մասնավորապես Մեծ Բրիտանիայի ու Գերմանիայի նախաձեռնություններին և գումար հատկացնել Հայաստանի խորհրդարանական ընտրությունների համար սարքավորումներ ձեռք բերելու նպատակով:

– Կարծում եմ, որ դա շատ դրական նախաձեռնություն է, քանի որ Ամերիկայի Միացյալ Նահանգներն ու Եվրոպական Միությունը ուզում են, որ Հայաստանում անցկացվեն արդար և թափանցիկ ընտրություններ: Օրինակ, ի տարբերություն արևմուտքի, ռուսական Գազպրոմը երկու անգամ թանկ է ծախում գազը հայ ժողովրդի վրա:
Դուք կարող եք ասել` սրանք ի՞նչ կապ ունեն իրար հետ: Բայց ուղղակի իրար հետ կապված հարցեր են: Միացյալ Նահանգները ֆինանսավորում է մեր ընտրական համակարգը, տեխնիկապես աջակցում է, որպեսզի ընտրություններն արդար լինեն: Հասկանալի է`այդ սարքավորումների շնորհիվ հնարավոր է ուղղակիորեն ընտրությունների դիտարկումն անել: Այսինքն` դրանք կապահովեն դեմոկրատական ընտրությունների առավել մեծ շանս մեր երկրում:

– Իսկ ինչո՞ւ հենց հիմա ԱՄՆ–ը հանդես եկավ այդ հայտարարությամբ:

– Դժվարանում եմ ասել: Ի վերջո, Հայաստանի կառավարությանը օգնելու մասին վաղուց է խոսվում: Երբ այս տարվա ապրիլից սկսվեցին իշխանություն–ընդդիմություն բանակցությունները` կապված ընտրական օրենսգրքի հետ, և պարզվեց, որ օրենսգրքով նախատեսվող քայլերի համար անհրաժեշտ են գումարներ, իրենք ասում էին, որ այդ հարցում կաջակցեն մեզ: Բայց մի բան է, խոստումը, մեկ այլ բան պաշտոնապես որոշում կայացնելը:

Կարծում եմ, որ իրենք շատ ժամանակին ու շատ տեղին ասացին: Քանի որ տեսնում ենք, թե զուգահեռ ինչ է անում Ռուսաստանը: Միացյալ Նահանգներն ու Եվրոպան օգնում են, որպեսզի մեզ մոտ կայանան արդար ընտրություններ և ձևավորվի ժողովրդավարական համակարգ: Իսկ Ռուսաստանը ցանկանում է ուժեղացնել իր ռազմական ներկայությունը Հայաստանում:

– Շատ փորձագետներ կարծում են, որ նախապես արևմուտքն ու Ռուսաստանը համաձայնության կգան Հայաստանի խորհրդարանական տեղերը բաշխելու համար: 

– Նախ ես համաձայն չեմ, որ Ռուսաստանը և ԱՄՆ–ը ուզում են այդպես ակտիվ միջամտել խորհրդարանական մեր ընտրություններին: Նույնիսկ` Ռուսաստանը, որն այստեղ շահեր ունի: Չեմ կարծում, որ իրենց համար դա գերխնդիր է: Ու մեր ապագա խորհրդարանում էլ արդեն իսկ տեղերը բաշխված են, ամեն ինչ որոշված է:

Հենց դա է սխալը, որին հաճախ տրվում են քաղաքական մեր տարբեր ուժերը, թե ընդդիմությունից, թե իշխանությունից: 

Նաև այսպիսի մտածողության պատճառով է, որ չի կայանում մեր քաղաքական դաշտը: Մենք պետք է համոզված լինենք, որ մենք ենք որոշողը: Որոշումը լինում է մեր երկրի ներսում, ընտրությունների միջոցով:

– Ի՞նչ եք կարծում, երբ արդեն ֆինանսավորումն էլ լինի նրանց կողմից, արևմուտքը կկանգնի՞ ընդդիմության թիկունքին և այլևս աչք չի՞ փակի ընտրական կեղծիքների վրա:

– Նախ, եթե այդ սարքավորումները բերվեն, նույնականացման քարտերը հասցնեն բաժանել ժողովրդին, ուղղակի կեղծելու հնարավորությունը լրջագույնս կնվազի: Ի վերջո, մաքրվելու են նաև ցուցակները:

Այս ամենը կարող է շանս ընձեռել մեր երկրին, որ իրականացվեն արդար ընտրություններ: Այլ հարց է` այդ շանսը մենք կօգտագործե՞նք, թե` ոչ: Բայց ինչ էլ լինի, ցանկացած դեպքում այս նոր նախաձեռնությունները` ընտրական պրոցեսի տեսագրումը, նույնականացման քարտերի ներդրումը, ցուցակների մաքրումն ու հրապարակումը ինքնաբերաբար կհանգեցնեն դրական տեղաշարժերի` առավել թափանցիկ դարձնելով ընտրական գործընթացը:

Իսկ կլինե՞ն խախտումներ, թե` ոչ: Ես համոզված եմ, որ այնուամենայնիվ կլինեն: Պարզապես մենք խախտումների մի մասը տվյալ քայլերով կչեզոքացնենք:

Գոհար Սարդարյան