Աբխազական ընդդիմությունը հեղաշրջու՞մ է պատրաստում

Արդեն երկու օր է ռուսական լրատվամիջոցները քննարկում են Աբխազիայի հատուկ ծառայություններից ստացված մի լուր, ըստ որի՝ այդ երկրի ընդդիմությունն այսօր պետական հեղաշրջում է պատրաստվում իրականացնել: Ընդ որում, ինչպես միշտ, փորձագետներն էլ իրենց հերթին են բաժանվել երկու խմբի. մի մասը հեգնում է ամիս ամսաթվով հաղորդված տեղեկության հավաստիության աստիճանը և նույնիսկ ստույգ ժամ է պահանջում աբխազական հատուկ ծառայություններից՝ ակնկալելով, թե նման աշխատանքի պարագայում, ենթադրվում է, այդ ճարպիկները պիտի դրան էլ տիրապետեն, իսկ ահա մյուս խումբը բացառապես արևմտյան հետք է տեսնում գործընթացներում՝ լիովին հնարավոր համարելով աբխազական խժդժությունները: 

Ըստ այդ տեսակետի՝ Արևմուտքին, բնականաբար, դուր չի գալիս ռուս–աբխազական խորացող ինտեգրացիան, և ահա որոշվել է, այսպես ասած, գահընկեց անել պրոռուսական Ռաուլ Հաջիմբային՝ իշխանության բերելով Աբխազիայի ընդդիմադիր բլոկին, իշխանության բերելով դրա մաս կազմող և հատկապես Բրիտանիայից ֆինանսավորվող Ամցախարա կուսակցության ղեկավար Բժանիային: 

Ի դեպ, չճանաչված հանրապետության ղեկավար Հաջիմբան էլ է օրերս հայտարարել, թե ընդդիմությունն իր դեմ շատ կոնկրետ և դավաճանական քայլեր է ձեռնարկել դեռ այս տարվա ամռանը, ինչին, իբր, իրենք խոհեմորեն են արձագանքել՝ համաձայնելով նախագահական արտահերթ ընտրությունների անցկացման համար անցկացվելիք հանրաքվեին: Մի բան, որ, թվում է պիտի հանդարտեցներ նրանց, որովհետև հուլիսի 10–ին հանրաքվեն կայացավ և ապացուցեց, որ ընդդիմությունը հազիվ մի տոկոս է հավաքել՝ հօգուտ արտահերթ նախագահական ընտրությունների: Այլ կերպ ասած՝ Աբխազիայի նախագահը ակնարկել է, թե հանրային օժանդակություն չունենալու պայմաններու՛մ է ընդդիմությունը նոր խժդժություններ փորձում հրահրել երկրում և միաժամանակ հաստատել է այն վարկածը, որ հենց Արևմուտքի պատվերով է իր դեմ հեղաշրջում նախապատրաստվում: 

Ի դեպ, նախագահի այս հայտարարությանը հետևեցին նաև զանգվածային լրատվամիջոցներում հրապարակումներ, ըստ որոնց՝ հայտնի էր նաև խժդժությունների պատվիրատուն, և այն, իբր, բրիտանական «Հաշտության ռեսուրսներ» ոչ կառավարական կազմակերպությունն է, որի անդամները, հատուկ հրավիրվածի կարգավիճակով, նոյեմբերի 30–ին խիստ ակտիվ էին Ամցախարա կուսակցության համագումարին: Իրադարձություն, որի ժամանակ էլ որոշվեց ստեղծել ընդդիմադիրների բլոկը և իշխանափոխության կոչեր հնչեցին անմիջապես դահլիճում:

Ռուսական լրատվամիջոցները հիշելով դեպքերի այսօրինակ զարգացումը՝ հայտնաբերել են, որ վերոնշյալ կազմակերպությանը զուգահեռ՝ ընդդիմությանը ֆինանսական ու կազմակերպչական օժանդակություն են ցուցաբերում նաև Peaceful change initiative և Center of Humanitarian programs կազմակերպությունները, որոնք հակառուսական լայն քարոզչություն են իրականացնում Աբխազիայում, այժմ էլ այդ երկրի բնակչությանը գայթակղելով Վրաստանի կազմում՝ Եվրամիության հետ կապերի հրամցվելիք բարիքներով և ԵՄ–ի ազատ վիզայի ռեժիմով: Տրվում են նաև, այսպես կոչված, Աբխազիա գործուղված հրահանգիչների անուններ՝ Ռեյչել Քլոգ, Էմելի Հայնս, Քեդել Ռոնա և այլք, որոնք, իբր, ուղիղ կապ ունեն բրիտանական հետախուզության և այնտեղ կոնկրետ Աբխազիայով զբաղվող աշխատակից Քրեյգ Օլիֆանթի հետ: 

Համաձայնեք՝ ճիշտ, թե սխալ, կոնկրետ անուններն ու հատուկ ծառայությունների հիշատակումը մարդկանց վրա իսկապես ազդեցություն են ունենում, և հենց դրանից ոգևորված՝ Աբխազիայի ներկայի իշխանություններն ու Կրեմլը փորձում են ամեն բան անել, որպեսզի ընդդիմությանը հնարավորինս արագ և արդյունավետ կերպով չեզոքացնեն: Հուսանք՝ իրադարձություններն ամեն դեպքում անարյուն կզարգանան ճիշտ մեր քթի տակ, և ռեպրեսիաների ալիք չի սկսվի երկրում: 

Գոհար Սիմոնյան