Աճել է օտարերկրացի զբոսաշրջիկների հոսքը Հայաստան

CULTURE 16 December, 2016 19:39

Այս տարի նախորդ տարվա նույն ժամանակահատվածի համեմատությամբ Հայաստան այցելած զբոսաշրջիկների քանակի ավելացում է արձանագրվել: Ըստ Ազգային վիճակագրական ծառայության կայքի՝ ստացված հաշվետվությունների տվյալների և հետազոտությունների արդյունքում ձևավորված փորձագիտական գնահատումները ցույց են տալիս, որ 2016 թ. հունվար–սեպտեմբերին հանրապետություն է ժամանել 1 միլիոն 969010 զբոսաշրջիկ կամ 2015 թ. նույն ժամանակաշրջանի նկատմամբ ցուցանիշն աճել է 3,6%–ով: Վերջիններից միայն 136816–ն է տեղավորվել հյուրանոցային տնտեսության օբյեկտներում, իսկ մնացածն էլ մնացել են կամ բարեկամների ու հարազատների տանը, կամ էլ վարձով տրվող բնակարաններում:

Այս տարի մենք 33462 զբոսաշրջիկ ավելի ենք ունեցել, ինչը տնտեսության համար բավական դրական հետևանք կունենա՝ հաշվի առնելով այն, որ օտարերկրացիներն այլ երկրներ գնալու փոխարեն գալիս են Հայաստան և իրենց փողերն այստեղ են ծախսում:

2016 թ. հունվար–սեպտեմբերին զբոսաշրջության նպատակով հանրապետությունից մեկնել է 903541 մարդ կամ 2015 թ. համապատասխան ժամանակաշրջանի նկատմամբ ցուցանիշն աճել է 3%–ով: Սրանից էլ մի հետևություն կարող ենք անել, որ քիչ թե շատ հայ ժողովրդի վիճակը լավացել է և նա կարողանում է իրեն թույլ տալ հանգստանալու համար արտերկիր մեկնել: Ազգային վիճակագրական ծառայության կայքի հրապարակումից տեղեկանում ենք, որ այս տարի արտասահման մեկնած 903541 քաղաքացուց միայն 6 հազար 311–ն են օգտվել զբոսաշրջային գործակալությունների ծառայություններից: Իսկ գերակշիռ մասը նախընտրել է իր հանգիստն ինքնուրույն կազմակերպել:

Ըստ հյուրանոցային տնտեսության օբյեկտներից ստացված հաշվետվությունների տվյալների, 2016 թ. հունվար–սեպտեմբերին Հայաստան այցելած զբոսաշրջիկների 22,6%–ը բաժին է ընկել ԱՊՀ երկրներին, 26,7%–ը` ԵՄ երկրներին և 50,7%–ը` այլ երկրներին: Ըստ հրապարակված ցուցանիշների՝ 4%–ով նվազել է ԱՊՀ երկրներից Հայաստան այցելած զբոսաշրջիկների թիվը: 5%–ով էլ նվազել է ԱՄՆ–ից Հայաստան այցելող զբոսաշրջիկների թիվը: Եթե նախորդ տարվա նույն ժամանակահատվածի համար գրանցվել էր 15,4%, ապա այս տարի՝ 10,3%: Դրա փոխարեն հարևան Վրաստանի և Իրանի քաղաքացիներն են սկսել ավելի շատ Հայաստան գալ հանգստանալու նպատակով:

Վիճակագրությունը ցույց է տալիս, որ հայաստանյան հյուրանոցային տնտեսության օբյեկտներում՝ հյուրանոցներում, հյուրանոցատիպ հանգրվաններում, առողջարաններում և հանգստյան տներում հաշվառված զբոսաշրջիկների մեծամասնությունը Հայաստան է գալիս հանգստի և ժամանցի նպատակով: Այն կազմում է ամբողջի 51,1%–ը: Զբոսաշրջիկների 32,1%–ն էլ գործնական նպատակներով Հայաստան եկած քաղաքացիներն են: Իսկ կրթության և բուժման նպատակով կամ շատ քիչ են գալիս կամ առհասարակ չեն գալիս: Ըստ վիճակագրության՝ այս տարի Հայաստան այցելած զբոսաշրջիկների միայն 0,2%–ն է այստեղ բուժում ստացել:

Ներքին զբոսաշրջությունն այս տարվա տվյալներով նույնպես աճել է նախորդ տարվա նույն ժամանակահատվածի նկատմամբ: Ըստ ԱՎԾ–ի կայքում հրապարակված համապատասխան տվյալների՝ 2016 թ. հունվար–սեպտեմբերին հանրապետության տարածքում հյուրանոցային տնտեսության օբյեկտներում տեղաբաշխված զբոսաշրջիկների թվաքանակը կազմել է 867495 մարդ (ՀՀ ռեզիդենտներ), ինչը 2015 թ. նույն ժամանակաշրջանի նկատմամբ աճել է 11%–ով:

Ներքին զբոսաշրջությունն ըստ նպատակի հետևյալ պատկերն ունի՝ 141302 զբոսաշրջիկ ներգնա տուրիզմից օգտվել են գործնական, 622403–ը ժամանցի և հանգստի, 57804 քաղաքացի բուժման և 45986 հոգի էլ այլ նպատակով:

Լիլի ԹԵՎՈՍՅԱՆ