Հանրային սեկտորի պարտքը կաճի ավելի արագ, քան մասնավոր սեկտորի պարտքը

ECONOMICS 17 December, 2016 22:54

Արժույթի միջազգայի հիմնադրամը Հայաստանի վերաբերյալ 104 էջից բաղկացած զեկույց է հրապարակել:

Զեկույցում ԱՄՀ–ի տնօրենի տեղակալ Դևիդ Լիպտոնը նշել է, որ ՀՀ–ի վերաբերյալ հեռանկարը խրթին է, ուստի մակրոտնտեսական և ֆինանսական կայունությունն ապահովելու համար անհրաժեշտ է քաղաքական կայունություն, ինչպես նաև խթանել որպեսզի տնտեսական աճը լինի ներառական: Ակնկալվում է, որ 2016 թ. ֆիսկալ դեֆիցիտը կմեծանա:

«Այնուամենայնիվ, իշխանությունները շարունակում են հավատարիմ մնալ հարկաբյուջետային կոնսոլիդացմանը, որն ամրագրված է բյուջետային համակարգի մասին օրենքում՝ նպատակ ունենալով պարտքը պահել միջնաժամկետ հեռանկարում ՀՆԱ–ի 60%–ից ցածր մակարդակում:

Հարկային նոր օրենսգիրքը կապահովի կոնսոլիդացում, սակայն կարևոր է իրականացնել միջոցառումներ, որոնց միջոցով կվերահսկվի արտաքին ֆինանսավորմամբ կապիտալ ծախսերը և հետագայում կամրապնդի եկամուտների վարչարարությունը:

Անցած տարվա ընթացքում երկրի ԿԲ–ի վարած դրամավարկային քաղաքականությունն օգնեց նվազեցնել հիմնական տոկոսադրույքները և աջակցել բանկի վարկավորման վերականգնմանը: ԿԲ–ի նպատակը պետք է լինի ինֆլյացիան հասցնել 4 տոկոսի, միևնույն ժամանակ արտաքին ցնցումներին և ուժեղ մրցակցությանը դիմակայելու համար պահպանել փոխարժեքի ճկունություն:

Ներքին մրցակցության բարելավումը և կարգավորիչ ոլորտի բարեփոխումները առանցքային են մասնավոր հատվածի համար: Այս համատեքստում իշխանությունների կողմից նախատեսված տնտեսական մրցակցության պաշտպանության վերաբերյալ օրենքի փոփոխությունները կարևոր քայլ են»,–նշել է Լիպտոնը:

«Հեռանկար և ռիսկեր» խորագրի ներքո զեկույցում նշվում է, որ 2016 թ.–ին ակնկալվում է 2% տնտեսական աճ: Ակնկալվում է, որ տարեվերջին ինֆլյացիան կլինի բացասական, իսկ ներքին պահանջարկը՝ ցածր: Ֆիսկալ դեֆիցիտը կմեծանա և կկազմի ՀՆԱ–ի 6%–ը:

Կարճաժամկետ հեռանկարում ռիսկերը շարունակում են բարձր մնալ, թույլ արտաքին պայմանները՝ ցածր արտահանման և դրամական փոխանցումների նվազման միջոցով, կարող են էապես ազդել Հայաստանի տնտեսության վրա»: Զեկույցում նաև նշվում է, որ ՀՀ վարչապետ Կարեն Կարապետյանի կաբինետը տեխնոկրատ է: Առաջին շաբաթների ընթացքում կաբինետը խորհրդարանին ներկայացրել է 2017 թ.–ին բյուջեն և սերտ աշխատել հարկային նոր օրենսգրքի անցկացման շուրջ: ԱՄՀ–ի զեկույցում նշվում է, որ պետական պարտքը կգերազանցի ՀՆԱ–ի 50%–ը և 2016 թ.–ին այն կկազմի 55%, որը կավելանա 2017–18 թթ.–ին: Հաջորդ տարի ֆիսկալ դեֆիցտը կկազմի ՀՆԱ–ի 2,8%–ը:

Արտահանման աճը 2016–ին և 2017 թ.–ին կդանդաղի, չնայած, ակնկալվում է, որ ոսկու նոր հանքավայրը, 2018 թ.–ից սկսած արտահանման ծավալի մեծացումն էապես կխթանի:

ՀՀ–ի արտաքին պարտքը ՀՆԱ հարաբերակցությամբ շարունակում է բարձր մնալ, սակայն միջնաժամկետ հեռանկարում այն կբարելավվի: Արտաքին պարտքը ՀՆԱ հարաբերակցությամբ 2015 թ.–ին 85% էր: Ակնկալվում է, որ բազային սցենարով այդ հարաբերակցությունը դանդաղ կերպով կբարձրանա 2016 և 2017 թթ.–ին մինչև 89,5%, իսկ մինչև 2021 թ.–ի վերջ այն կնվազի հասնելով 76%–ի:

Կանխատեսվում է, որ հանրային սեկտորի պարտքը կաճի ավելի արագ, քան մասնավոր սեկտորի պարտքը: