Երգչուհի Սոնա Շահգելդյանը խոստովանում է, որ նախկինում ընթերցանությանն ավելի մեծ ժամանակ էր հատկացնում, քան այժմ։
Wnews.am-ին տված հարցազրույցում Սոնա Շահգելդյանը խոսեց իր նախընտրած գրքերի մասին։
–Սոնա, որքա՞ն հաճախ եք զբաղվում ընթերցանությամբ։
-Պապիկս ուներ շատ լավ գրադարան, հիմա էլ կա այդ գրադարանը, տատիկս էլ է շատ կարդացել եւ կարդում է, քանի որ պատմության ուսուցչուհի է: Ես շատ հաճախ ժամանակ չեմ ունենում, բայց պարտադիր է, որ յուրաքանչյուր մարդ էլ կարդա, ուղղակի չասի, որ կարդում է կամ չիմանա այդ գրքի իմաստը։ Ես, օրինակ, վերջին շրջանում Ալեքսան Մեխակյանի «Ապաստան» գիրքն եմ կարդացել, հետաքրքիր գիրք, որը համապատասխանում է այսօրվա կյանքին։ Գարեգին Նժդեհ եմ կարդացել, ճիշտ է, շատ բարդ գիրք է, լրիվ չեմ կարդացել, բայց կարողացել եմ ինչ-որ չափով հասկանալ։ Ռուբեն Հախվերդյանի գիրքն եմ կարդացել իր կյանքի մասին, հետաքրքիր էր։ Գրքեր կան, որ սիրում եմ, կարդում եմ, բայց ժամանակ, ցավոք սրտի, չեմ ունենում, բայց պարտադիր է, որ կարդամ, բոլորի համար էլ պարտադիր է։ Հանրագիտարան, մեծ գրադարան՝ տանն ունեմ։
–Այսինքն օրվա մեջ ընթերցանությանը որոշ ժամանակ չե՞ք հասցնում տրամադրել։
-Չէ, այդպես չի լինում, որ անկեղծ ասեմ, չեմ ստի, բայց որ լինում է, ազատ եմ լինում, կարդում եմ։ Ինչ-որ մի բանով ցանկություն է առաջանում հետաքրքրվել, պարապ չմնալ, ժամանակս անիմաստ չծախսել։
-Միայն հայերենո՞վ եք կարդում։
-Այո, միայն հայերենով, քանի որ ես հայ եմ ու իմ լեզուն հայերենն է։
-Կնշե՞ք մի քանի գիրք, որոնք մեծ ազդեցություն են ունեցել Ձեզ վրա։
-Օրինակ Ռուբեն Հախվերդյանի գիրքն է շատ մեծ ազդեցություն թողել, Շառլ Ազնավուրի մասին գիրքը եւ Աշոտ Լյուդվիգովիչը իմ ծննդյան կապակցությամբ ինձ գիրք է նվիրել, որը համաշխարհային տարբեր աստղերի մասին է, դա էլ շատ մեծ ազդեցություն է թողել։ Դա ավելի շատ մայրս է կարդացել, բոլոր աստղերի կյանքը, օրինակ՝ Պավարոտիի, Մայքլ Ջեքսոնի եւ այլոց։
-Այսինքն, ինչպես հասկացա, ավելի շատ սիրում եք կենսագրական բնույթի գրքեր կարդա՞լ։
-Այո՛, ավելի շատ դա եմ սիրում, ավելի հասանելի է, բայց պատմական էլ եմ շատ սիրում, քանի որ տատիկս պատմաբան է։ Ավելի շատ Հայոց պատմությունը, դա ավելի հետաքրքիր է։
-Իսկ համաշխարհային գրականությունից ու՞մ գրքերն եք կարդացել եւ կցանկանայիք առանձնացնել։
-Տենց կոնկրետ չեմ ընթերցել որեւէ համաշխարհային, բայց կարեւորը հայկականն է, որը սիրում եմ, ինչքանով է իմ մոտ ստացվում է կարդալ, ժամանակ հատկացնել, կարծում եմ, որ նորմալ է այդ ամեն ինչը։ Շեքսպիր եմ կարդացել, Բալզակ եմ շատ սիրում։ Կարող եմ նշել անուններ, բայց իրենք ավելի դժվար են, մեծ ժամանակ պիտի տրամադրես, որ հասկանաս։
Ամբողջական հոդվածը կարող եք կարդալ այստեղ
