Էռնա Յուզբաշյանի հոբելյանական համերգը Օպերայի «Ջազզվեում»

Blognews.am-ը գրում է.

Երգչուհի Էռնա Յուզբաշյանը նշում է գործունեության 35-ամյակը։ Այս կապակցությամբ նրա գործընկերները երեկ հավաքվել էին Օպերայի «Ջազզվեում»՝ վայելելու Էռնայի կատարումները, պատմելու նրա հետ անցկացրած օրերի մասին։

Երգչուհին նկատեց, որ 35 տարվա գործունեության ընթացքում շատ բան է զոհաբերել հանուն կարիերայի, մասնավորապես՝ անձնական կյանքը։ «Անձնական կյանքս այդպես էլ չդասավորեցի: Չեմ կարող խաբել և ասել, թե երջանիկ եմ: Ես գտել եմ իմ երջանկությունն այն ռիթմի մեջ, որով հիմա ապրում եմ, ես երջանիկ եմ իմ աղջկանով, ուրախանում եմ իր հաջողություններով, յուրաքանչյուր լավ երգով, իմ ընկերներով, ուրախանում եմ, երբ ինչ-որ մեկի մոտ մի բան ստացվում է։ Ուզում եմ երջանիկ լինել, սիրահարվել... Լավ երգեր եմ ուզում, որոնք կգրեն ու կնվիրեն, ոչ թե կվաճառեն»,- նշեց Էռնա Յուզբաշյանը։

BlogNews.am-ը, օգտվելով առիթից, տկն Էռնայի հետ զրուցեց օրերս «Վաստակավոր արտիստի» կոչում ստանալու մասին։ Այժմ բուռն քննարվում է հարցը, որ «Վաստակավորի» նշաձողն իջեցվել է և, օրինակ, Արմենչիկն արժանի չէր այդ կոչմանը. «Այդ նշաձողը վաղուց է  իջել։ Այնքան անարժան մարդկանց է տրվել  այդ կոչումը, որ  այս տարվան դեպքն ամենասարսափելին  չէր։ Ես 56 տարեկան եմ,  35  տարի է՝ բեմում եմ և վաղուց եմ արժանացել նրան, ինչին պետք է արժանանամ։ Ինձ համար կոչումն առաջին հերթին իմ հանդիսատեսի սերն է։ Այս կոչումը ստանալը հաճելի էր, բայց ոչ ավելին»։

Անդրադառնալով ժամանակակից հայկական էստրադային՝ երգչուհին ասաց, որ լավ երգեր քիչ են ներկայացվում։ «Երիտասարդներից լսում եմ Էմմիին, Սիրուշոյին, Էրիկն է փայլուն  աշխատում։ Վերջերս Լիլիթ Հովհաննիսյանն է լավ ներկայանում։ Նա գեղեցիկ աղջիկ է, իր մեջ ամեն ինչ գեղեցիկ է, թեև ոչ բոլոր երգերն եմ հավանում։ Դե իսկ ավագ սերունդը՝ Արթուր Իսպիրյանը, Արամոն և էմման, Շուշան Պետրոսյանը, Նունե Եսայանը միշտ պահում են  որակը»,- նշեց նա, իսկ հարցին՝ Երևանն այսօր ջազ լսո՞ւմ է, պատասխանեց. «Որքան Երևանը ջազ և դասական երաժշտություն լսի, այնքան ավելի առողջ կլինեն մեր երիտասարդները»։

Միջոցառման կազմակերպիչ, պրոդյուսեր և ռեժիսոր Էմիլ Կարատն էլ նշեց, որ երգչուհին ելույթ կունենա ոչ միայն Երևանում, այլև Ստեփանակերտում, Գյումրիում և Վանաձորում:

«Ջազզվե» սրճարաների ցանցի մարքեթինգի բաժնի ղեկավար Սիլվա Ղամբարյանն ասաց, որ շատ ուրախ են «Ջազզվեում» ողջունել նման արտիստի։ «Շնորհակալ ենք բոլոր այն մարդկանց, ովքեր կազմակերպել են այս ամենը,  բոլոր նրանց, ովքեր այսօր ներկա են և այս ջերմ մթնոլորտում մեզ հետ նշելու են մեր շատ սիրելի երգչուհու գործունեության 35-ամյակը»,- ասաց նա ու իր շնորհակալությունը հայտնեց «Անդակո» ընկերությանը՝  հյուրասիրության համար և «Any Rose» ծաղկի սրահին՝ գեղեցիկ դեկորն ապահովելու համար։

Նյութը՝ Ամալյա Հովհաննիսյանի

Լուսանկարները՝ Կարեն Հովհաննիսյանի