Գերմանիան Մերկելին Շուլցո՞վ կփոխարինի Եվրախորհրդարանի նախկին ղեկավար Մարտին Շուլցը

Գերմանիայի Սոցիալ–դեմոկրատական կուսակցության արտահերթ նիստում հաստատվել է որպես ԳՖՀ–ի կանցլերի թեկնածու (Կուսակցության քարտուղար Զիգմար Գաբրիելը անակնկալ կերպով ինքնաբացարկ է հայտարարել՝ հայտարարելով, թե Բրյուսելում մեծ փորձ կուտակելով Շուլցն արտակարգ թեկնածու կլինի՝ Քրիստոնյա–դեմոկրատների դեմ պայքարելու և սոցիալ–դեմոկրատների հաղթանակն ապահովելու առումով), և այժմ Անգելա Մերկելի հիմնական մրցակիցն ու քննադատներից մեկն է համարվում: Բեռլինում կայացած վերջին ասուլիսում, օրինակ, Շուլցը խիստ քննադատության է ենթարկել Մերկելին՝ նշելով, թե պատրաստվում է հակազդել հասարակության շարքերում առկա անվստահության տրամադրություններին: «Մենք ուզում ենք նախընտրական պայքարը կազմակերպել այնպես, որ Սոցիալ–դեմոկրատական կուսակցությունը վերջապես երկիրը կառավարելու մանդատ ստանա:

Հասարակության ներսում խոր անվստահություն է իշխում իշխանության նկատմամբ, և այս դժվարին ժամանակներում, իհարկե, երկիրը նոր ղեկավարության կարիք ունի»,– հայտարարել է նա: Այս որոշումն, ի դեպ, խառնել է բոլորի և հատկապես՝ Մերկելի խաղաթղթերը. նա հույս ուներ Գաբրիելին տեսնել իր մրցակցի դերում, որի առնչությամբ, համարյա բոլոր սոցիոլոգիական հարցումներում, պարզվել էր, որ գերմանացիների միայն 19%–ն է պատրաստ իր ձայնը տալ սոցիալ–դեմոկրատներին: Այժմ, Շուլցի պարագայում, այդ ցուցանիշը հասել է 36%–ի, բնականաբար, նվազեցնելով Մերկելին տրվելիք ձայների քանակը: Չխոսենք արդեն այն մասին, որ համաձայն ARD–Deutschlandtrend–ի կողմից իրականացված հարցումների՝ անձամբ Շուլցի նկատմամբ հանրության վստահության աստիճանը 57% է:

Մի բան, որ տագնապի է մատնել բնակչության շրջանում 43% համակրանք վայելող Անգելա Մերկելին: Փորձագետները նշում են, թե Շուլցն իսկապես գտածո էր Սոցիալ–դեմոկրատների համար, որովհետև 61–ամյա փորձառու քաղաքական գործչի անունն այս ամբողջ տարիների ընթացքում չի սևացել որևէ սկանդալով, բավական ազդեցիկ՝ փոքրիկ գրախանութի սեփականատիրոջից մինչև Վյուրզելենի քաղաքային պատգամավորի, Բունդեստագից մինչև Եվրախորհրդարանի քարտուղարի ճանապարհ է անցել, ուղղամիտ և ազնիվ մարդու համբավ ունի, ամուսնացել է մեկ անգամ, երկու զավակների օրինակելի հայր, սիրող–սիրված ամուսին է ընտանիքում, որևէ վնասակար սովորություն չունի՝ որքան էլ Քրիստոնյա–դեմոկրատները պնդեն, թե երիտասարդության տարիներին, իբր, ալկոհոլիզմով է տառապել: Ի միջի այլոց, Շուլցի միջոցով, Սոցիալ–դեմոկրատական կուսակցությունը, հնարավոր է, վերջ դնի նաև իր համար գլխացավանք դարձած Մեծ կոալիցիային, որում նա փոքր եղբոր դերակատարում և գաղափարական լուրջ տարաձայնություններ ուներ քրիստոնյա–դեմոկրատների հետ, որոնք այս պահին սոսկ 30%–ով են հանրության վստահությունը վայելում: Բայց, իհարկե, շատ բան է կախված նաև ձախերից, որոնք դեռ պիտի որոշեն՝ միանալ Մերկելի՞ն, թե ռադիկալ ընդդիմության շարքերում խանգարեն միաժամանակ բոլորին:

Չի կարելի մոռացության տալ նաև ավելի ռադիկալ/նոր ձևավորված եվրոսկեպտիկների՝ «Այլընտրանք Գերմանիայի համար» կուսակցությանը, որը նույնպես ի վիճակի է առնվազն 12–14% ձայն հավաքել հանրությունից: Այնպես, որ, եվրոսկեպտիցիզմի, հատկապես իշխանության կողմից վարվող միգրացիոն քաղաքականության հանդեպ հանրային դժգոհության, արտաքին տագնապների ու մարտահրավերների գիտակցման դժգոհ մթնոլորտում են անցնելու գերմանական ընտրությունները, և թե ով կգա առաջին պլան, դեռ վաղ է ասել: