Զարուհի Փոստանջյանը կարող է դեմ լինել դաշինքով մասնակցելուն, ինչպես կարող է դեմ լինել կուսակցության ցանկացած անդամ. «Փաստ»

«Փաստ» օրաթերթը գրում է.

Մեր զրուցակիցն է «Ժառանգություն» կուսակցության փոխնախագահ Արմեն Մարտիրոսյանը

– Պարոն Մարտիրոսյան, ի՞նչ որոշում կայացրեց «Ժառանգություն» կուսակցությունը ընտրություններին մասնակցելու ձևաչափի վերաբերյալ:

– Դեռևս որոշում չենք կայացրել:

– Իսկ կուսակցությունում ընդհանուր առմամբ ի՞նչ իրավիճակ է:

– Շատ նորմալ իրավիճակ է: Աշխատանքային:

– Ե՞րբ եք նախատեսում քննարկում անցկացնել ընտրություններին մասնակցելու վերաբերյալ:

– Ամեն օր էլ դա կարող է տեղի ունենալ:

– Դու քո դիրքորոշումը չե՞ս փոխել դաշինքով մասնակցելու վերաբերյալ:

– Ո՛չ: Ես կողմնակից եմ ընտրություններին դաշինքով գնալու տարբերակին:

– Թեկուզ` ոչ գաղափարական հիմք ունեցող դաշինքո՞վ:

– Իսկ այսօր ո՞ր գաղափարական ուղղությունը կա Հայաստանում: Կամ կա՞ քաղաքական դաշտ, որ գաղափարական էլ լինի:

– Այդ դեպքում, եթե մարտավարական խնդրի շուրջ ձևավորվի դաշինքը, ապա ո՞րն է լինելու մարտավարական այդ խնդիրը` իշխանափոխությո՞ւնը:

– Իշխանափոխությունը ընդամենը նախնական քայլ է: Ամենակարևորը արմատական բարեփոխումներն են: Այն է` Հայաստանի ինքնիշխանության վերականգնումը: Նաև այնպես պետք է անել, որ երկրում լինի պայքարի դաշտ: Նվազագույնը գոնե Հայաստանի Հանրապետության քաղաքացին պայքարելու հնարավորություն ունենա:

– Իսկ առանց գաղափարական հենքի ձևավորվող դաշինքն այդ հնարավորությունը կընձեռի՞:

– Քաղաքացի պահելուց ավելի մեծ գաղափար այսօր Հայաստանում չկա:

– Արմեն, իսկ ձեր կուսակցության մեջ շատե՞րն են Ձեր կարծիքը կիսում:

– Մեծամասնությունը:

– Այդ դեպքում ինչպե՞ս է լինում, որ մեծամասնությունը չի կարողանում իր որոշումը կայացնել:

– Որովհետև դեռևս որոշում կայացնելու անհրաժեշտություն չունի:

– Իսկ Զարուհի Փոստանջյանի հայտարարությունները կամ այդքան ծավալվող խոսակցությունները միայնակ ընտրությունների գնալու վերաբերյալ, պաշտոնական քննարկումներից դուրս եղող խոսակցություննե՞ր են ընդամենը:

– Նա կարող է դեմ լինել դաշինքով մասնակցելուն: Ինչպես և կարող է դեմ լինել կուսակցության ցանկացած անդամ:

– Իսկ կուսակցության նախագահի` Րաֆֆի Հովհաննիսյանի դիրքորոշումը ո՞րն է այս հարցում:

– Որքան էլ էական լինի որևէ մեկի դիրքորոշումը, այնուամենայնիվ, կարևորը կուսակցության ամբողջական դիրքորոշումն է: Իսկ պարոն Հովհաննիսյանը այս տարիների ընթացքում իր գործունեությամբ ցույց է տվել, որ երկրում ստեղծված իրավիճակը փոխելու կողմնակից է:

– Իսկ չե՞ք վախենում, որ այս ձգձգվող, տարածվող խոսակցությունները, անվերջ հակադարձումները կարող են հանգեցնել նրան, որ կուսակցությունն ուղղակի փլուզվի և վերանա քաղաքական ասպարեզից:

– Ոչ, չի վերանա: Ինչո՞ւ պետք է վերանա:

– Իսկ մարզայի՞ն կառույցներն ինչ կարծիքի են: Չե՞ք ուսումնասիրել, ներքին հետազոտություն չե՞ք արել:

– Դրա կարիքը չի եղել: Մենք խորհրդի նիստ ենք հրավիրել, և խորհրդի անդամները ընդհանուր առմամբ կողմնակից էին համագործակցությանը, այսինքն` ընտրություններին դաշինքով մասնակցելուն:

– Քաղաքական ո՞ր ուժերը կամ արդեն ձևավորված ո՞ր դաշինքներն են ձեզ առավել հարազատ. ո՞ւմ հետ կցանկանայիք միավորվել:

– Հարազատության խնդիր չկա: Եթե այլ իրավիճակ լիներ, ամենաճիշտը կլիներ, իհարկե, ընտրություններին միայնակ մասնակցելը:

Իսկ մնացածն արդեն քննարկելու խնդիր է: Վարչությունում կքննարկենք ու կգնանք ընդհանուր եզրակացության:

– Մոտավորապես ե՞րբ կլինի կուսակցության վերջնական որոշումը:

– Չեմ կարող ասել:

Շարունակությունը` «Փաստ» օրաթերթի այսօրվա համարում: