Վարդենյաց լեռնանցքում վերականգնվել է ճանապարհատրանսպորտային երթեւեկությունը

Մարտունի-Գետափ միջպետական ճանապարհի մաքրման եւ մշակման աշխատանքները, որոնք սկսվել են հունվարի 31-ին, շարունակվել  են նաեւ հունվարի 31-ի ընթացքում, չնայած նրան, որ ճանապարհի անցանելիությունն  ապահովվել է հունվարի 30-ի երեկոյան ժամերին: Ինչպես «Արմենպրես»-ին տեղեկացրեց ճանապարհի սպասարկումն իրականացնող «Շանթ-Սեյրան» ՍՊԸ պատասխանատու Աղասի Ղուկասյանը, հունվարի 31- ի կեսօրվա դրությամբ ընթանում են ճանապարհի դժվարանցանելի, ձյան կուտակումներով լի հատվածների մաքրման  եւ լայնացման աշխատանքները:«Մինչեւ այսօրվա երեկոյան ժամերը հիմնովին կավարտենք ճանապարհի մաքրման եւ լայնացման աշխատանքները՝ ապահովելով լիարժեք երթեւեկություն: Որոշ տեղերում ձյան  կուտակումները հասնում են մինչեւ 1 մետրի»,-ներկայացրեց  Աղասի Ղուկասյանը: Գեղարքունիքի մարզպետարանի աշխատակազմի քաղաքաշինության վարչության տրանսպորտի եւ ճանապարհաշինության բաժնի վարիչ Գեւորգ Խաչատրյանի տեղեկացմամբ՝ հունվարի 31-ի դրությամբ Գեղարքունիքի մարզում բաց եւ երթեւեկելի են բոլոր ճանապարհները, բացառությամբ Մաքենիս-Ախպրաձոր միջհամայնքային ճանապարհի, որտեղ շարունակվում են մաքրման աշխատանքները:

 

 Խոսրով Խլղաթյան