«Ժաննա Դ'Արկ»-ի պրեմիերային մնացել են հաշված օրեր

Past.am-ի զրուցակիցը երիտասարդ ռեժիսոր Գալուստ Ներսիսյանն է:

- Ինչպես գիտենք, «Ժաննա Դ'Արկ» եք բեմադրել: Մի փոքր պատմեք ներկայացման մասին, ո՞ր փուլում եք:

 - Հիմա փորձերի մեջ ենք, պատրաստվում ենք պրեմիերային, որը կկայանա փետրվարի 13-ին՝ Ուսանողական թատրոնում: Ներկայացումը պատմական թեմայով է, միստիկ դրամայի ժանրում է լինելու, 1 գործողությամբ: Ներկայացման մասին, առհասարակ, շատ խոսել չեմ սիրում, որովհետև ավելի շատ վստահում եմ հանդիսատեսի դատին: Ինչքան էլ հիմա փորձեմ ինչ-որ մանրամասներ հայտնել, ամեն դեպքում, հանդիսատեսը պետք է իրենը գտնի ներկայացման մեջ: Ընդամենը կասեմ, որ մտածելու տեղիք կտա անպայման: 

- Սա Ձեր բեմադրած առաջի՞ն ներկայացումն է:

- Չեմ կարող ասել՝ թվով որերորդն է, քանի որ փոքր աշխատանքներ շատ եմ ունեցել, բայց սա համարում եմ իմ երկրորդ մեծ աշխատանքը: Առաջինը եղել է դիպլոմային աշխատանք՝ Օստրովսկու «Ամպրոպը», որը ներկայացրել եմ Կապանի Ալեքսանդր Շիրվանզադեի անվան պետական դրամատիկական թատրոնում:

Ցուցադրված ներկայացում ունեմ նաև Կրասնոդարի դրամատիկական թատրոնում, որը միջազգային հարթակում ունի առաջին մրցանակ:

- Ներկայացման դերասանական կազմից խոսենք. ովքե՞ր են գլխավոր դերերում:

- Դերասանական կազմում ընդգրկված են և՛ պրոֆեսիոնալ դերասաններ, և՛ ուսանողներ. Անուշ Առաքելյանը, Իշխան Ղարիբյանը, Վահե Շահվերդյանի արվեստանոցի տղաները, Հրաչյա Գասպարյանի կուրսից 2 աղջիկներ: Ընտրությունն իմն է: Ես հիմնականում շեշտը չեմ դնում այնպիսի դերասանների վրա, որոնք, այսպես ասած, կարող են դահլիճ լցնել: 

- Ի՞նչ ակնկալիքներ ունեք ներկայացումից:

- Սպասելիքները մեծ են: Պրեմիերայից հետո ցանկություն ունենք ներկայանալու «Արտավազդ» մրցանակաբաշխությանը: Հույս ունենք, որ ներկայացումը նաև միջազգային հարթակ կհանենք:

Գիտեք, եթե ես հիմա գովաբանեմ իմ ներկայացումը, նույնն է, թե երեխայիս գովաբանեմ և կստացվի, որ այն լավագույնն է: Ես նախընտրում եմ շատ չխոսել ներկայացումից, պրեմիերայից հետո ամեն ինչ պարզ կլինի: