Քվեարկության օրը ծագած ցանկացած խնդրին պետք է արձագանքել անմիջապես. միջազգային փորձագետ

Ընտրական գործընթացն արդար և թափանցիկ կազմակերպելը բոլորի պարտքն է: «Ընտրական վարչարարության մարմինների կարողությունների ամրապնդում՝ ընտրական վեճերի լուծման գործընթացների բարելավման նպատակով» ծրագրի շրջանակում Երևանում կազմակերպված աշխատաժողովի ժամանակ այս մասին նշեց ընտրական վեճերի լուծման հարցերով միջազգային փորձագետ Ջոն Հարդին Յանգը: Նա աշխատաժողովի մասնակիցներին ներկայացրեց ընտրական վեճերի լուծման միջազգային փոր ձը:

«Ընտրություններն արդար կազմակերպելու գործընթացում կարեւոր է դիտորդների աշխատանքը: Պետք է այնպես անել, որ ընտրություններն անցնեն արդար, եւ ամեն մեկի ձայնը լինի լսելի: Մասնավորապես, եթե քվեարկության օրն ինչ-որ հարց է ծագում, ապա անհրաժեշտ է անմիջապես դրան արձագանքել, եւ դա պարտավոր են անել բոլորը՝ հանձնաժողովները, քաղաքացիական հասարակությունը: Ամեն հարց պետք է լուծվի տեղում՝ ժամանակի իրական ռեժիմով: Հետագայում հնչող բողոքների պատճառն այն է, որ դրանց տեղում արձագանք չի եղել: Օրինակ՝ ենթադրենք, ձեր տանը հրդեհ է բռնկվել: Առաջինն ինչ կանեք, ջո՞ւր կլցնեք, թե երկու օր կսպասեք, որ տունն այրվի, այնուհետև գանգատվեք, թե քնելու տեղ չունեք: Բնականաբար, ոչ, հետևաբար ընտրական գործընթացներում նույն մոտեցումը պետք է լինի»,-ասաց փորձագետը:

Արձագանքելով դիտարկմանը, թե ԸՕ-ն բարդ է եւ կարող է չարաշահումների տեղիք տալ, փորձագետն ասաց, որ անկախ նրանից, թե օրենսգիրքը որքանով է ձեւապաշտական, ընտրությունների բուն գործընթացը շատ հասկանալի է, խնդիրներին անդրադառնալու անհրաժեշտությունը՝ նույնպես: Նա ընդգծեց, որ օրենսգիրքը հնարավորություն է տալիս  եւ պահանջում, որ հանձնաժողովի անդամներն ընթացքում ծագող խնդիրները լուծեն անմիջապես:

«Օրենսգիրքը գնալով հղկվում է: Այո, պարզեցնելու տեղ ունի, բայց վստահ եմ, որ ժամանակի ընթացքում այդպես էլ կլինի: Ձայների հաշվարկը պետք է արտացոլի ժողովրդի կամքը, եւ դա բոլորի պատասխանատվությունն է՝ երաշխավորել, որ արդար ընտրություններ կանցկացվեն: Ոչ ոք չի կարող իր վրայից  գցել ընտրական գործընթացի պահապանի դերը, իսկ եթե գործընթացը ձախողվում է, ապա նշանակում է, որ մենք չենք կատարել մեր այդ գործառույթը: Չարաշահումն անընդունելի է ցանկացած տեղ, այդ թվում՝ ընտրություններում: Հուսանք, տեսախցիկները դրանց մի մասը կկրճատեն»,-ասաց փորձագետն` ընդգծելով, որ ընտրությունների օրը շատ կարևոր է նաև ԶԼՄ-ների դերը, որոնք պետք է վերահսկողի դեր կատարեն:

ԿԸՀ-ի նախագահ Տիգրան Մուկուչյանը, ողջունելով աշխատաժողովի մասնակիցներին, նշեց, որ Հայաստանի Ընտրական օրենսգրքում իրականացվել են փոփոխություններ լրացումներ, սահմանվել է վարչական վարույթի տեսակ` կապված այլ անձանց փոխարեն դիմում ներկայացնելու խնդիրների հետ:

«Այս ամենը միանշանակ ենթադրում է նաև իրազեկվածության, քննարկումների խնդիր: Այդ պատճառով հրավիրել են քաղաքացիական հասարակության, քաղաքական ուժերի ներկայացուցիչները, որոնք ընտրություններին դրսևորում են ակտիվություն, որպեսզի մանրամասն ներկայացվեն այդ հարցերը: Կարծում եմ, որ կունենանք արդյունավետ քննարկումներ, այս միջոցառումը կլինի իրազեկման գործընթացներից մեկը»,-ասաց Տիգրան Մուկուչյանը: Նա նշեց, որ ԿԸՀ-ն վարչարարության հետ կապված առանձին ձեռնարկ է մշակել, որը կտրամադրվի ընտրական գործընթացի մասնակիցներին: Այդ ձեռնար կում մանրամասն ներկայացված են վարչական վարույթի հետ կապած հարցերը:  

«Ընտրական վարչարարության մարմինների կարողությունների ամրապնդում՝ ընտրական վեճերի լուծման գործընթացներիբարելավման նպատակով» ծրագրի շրջանակներում անցկացված աշխատաժողովը կազմակերպել է ՀՀ կենտրոնական ընտրականհանձնաժողովը՝ ՀՀ-ում Բրիտանական դեսպանատան ֆինանսական աջակցությամբ: Աշխատաժողովին մասնակցում էինքաղաքական կուսակցությունների և քաղաքացիական հասարակության ներկայացուցիչներ: