«Իմ գրասենյակներից ինձ ոչ ոք չի կարող դուրս մղել». Տավրոս Գևորգյանը՝ իր ու Արման Սահակյանի բախման մասին. «Փաստ»

«Փաստ» օրաթերթը գրում է.

Մինչ Սերժ Սարգսյանը ՀՀԿ–ականներին հավաքելով, փորձում է համերաշխության ու եղբայրության դասեր տալ, «Փաստին» հասած տեղեկություններով, նախօրեին Աջափնյակում բախվել են ևս երկու ՀՀԿ–ականների՝ թիվ 2 ընտրատարածքում (Արաբկիր, Աջափնյակ, Դավթաշեն) ՀՀԿ ռեյտինգային ցուցակով առաջադրված, ՀՀ ԿԱ պետգույքի կառավարման վարչության պետ Արման Սահակյանի և ԴԱՀԿ նախկին պաշտոնյա Տավրոս Գևորգյանի կողմնակիցները։

Ցերեկը` ժամը 15:00–16:00–ի սահմաններում Աջափնյակի «15 կվարտալ» կոչվող թաղամասում, Գևորգ Չաուշի արձանի մոտ, ՀՀԿ–ական թեկնածուների կողմնակիցների կուտակումներ են եղել ու թեժ խոսակցություն, այն աստիճան, որ անգամ ոստիկանություն է եկել տարածք: 
Ոստիկանությունից «Փաստին» ասացին, որ որևէ քաղաքացի չի դիմել իրենց դեպքի առթիվ և ահազանգ չեն ստացել: Մինչդեռ կուտակումները եղել են Աջափնյակի բնակիչների աչքի առաջ: 

Նշենք, որ օրեր առաջ Աջափնյակում բախվել էին նաև «Ծառուկյան» դաշինքից առաջադրված պատգամավոր Վահան Կարապետյանի ու Արման Սահակյանի կողմնակիցները: «Փաստի» հետ զրույցում Վահան Կարապետյանը չի հերքել միջադեպը՝ ասելով, որ խնդիրը եղել է ոչ թե իր ու Արման Սահակյանի միջև, այլ կողմնակիցների՝ գրասենյակների աշխատակիցների: 

«Փաստը» զրուցեց Աջափնյակում ՀՀԿ–ից առաջադրված, ՀՀ ԱՆ ԴԱՀԿ ծառայության աճուրդի կազակերպման և գույքի իրացման բաժնի նախկին պետ Տավրոս Գևորգյանի հետ, ով ազատվել է պաշտոնից պատգամավորի թեկնածու առաջադրվելու համար:

– Պարոն Գևորգյան, տեղեկություն կա, որ բախում է եղել Ձեր և ՀՀԿ–ից առաջադրված, պետգույքի կառավարման վարչության պետ Արման Սահակյանի կողմնակիցների միջև, ի՞նչն է պատճառը: Նույնիսկ ոստիկանություն է եկել տարածք:

– Ո՞վ է ասում, չկա նման բան: Չէ, չկա, բախում չի եղել, ոչ մի բան չի եղել: Ոստիկանությանը հարցրեք: Բամբասանքեր են: Չկա տենց բան, ո՞վ ա ասում, չեմ լսել ես: Թեմա չկա, ոչ մի բախում, կուտակում, ոչ մի բան չի եղել, թեմա չկա: Ինչ ասես խոսում են, ընտրություն ա: Մենք նույն կուսակցությունից ենք, տենց բան չի կարա լինի:

– Դե այս ընտրություններում հենց նույն թիմի ներկայացուցիչների միջև է բախում լինում:

– Ես նման ինֆորմացիա չունեմ: Տեղյակ չեմ, որ մեր թիմի մեջ մարդիկ իրար խանգարում են:

– Ուզում եք ասել՝ Ձեզ Արման Սահակյանը չի՞ խանգարում:

– Չէ, չէ, չէ, չի խանգարում, մենք հանգիստ մեր ընտրությունն անում ենք:

– Հնարավո՞ր է Արման Սահակյանն ուզում է Ձեզ Ձեր գրասենյակներից ու պայքարից դուրս մղել, խնդիրներ է ստեղծում:

– Ես գրասենյակներ չունեմ դեռևս, ամսի 5–ից: Իմ գրասենյակներից ինձ ոչ ոք չի կարող դուրս մղել:

– Դուք ԴԱՀԿ նախկին աշխատակից եք, ինչո՞ւ եք ուզում դառնալ պատգամավոր, կարելի՞ է իմանալ:

– Ուզում եմ, այ քեզ բան, ինչի՞ եմ ուզում, իմ գործը չի՞ ինչի եմ ուզում:

– Նաև ընտրողներին, հասարակությանը պետք է բացատրեք, թե ինչո՞ւ եք ուզում գնալ խորհրդարան:

– Դե ես գիտեմ՝ ընտրողներին ինչ կասեմ:

– Ասել է թե՝ ուզում եք ԴԱՀԿ–ում Ձեր աշխատանքը փոխարինել պատգամավորի աշխատանքո՞վ:

– Էդ իմ գործը չի՞, այ քեզ բան:

– Դուք թեկնածու եք, հանրային դեմք եք, պիտի հասարակությանը բացատրեք՝ ինչու եք ուզում պատգամավոր դառնալ:

– Դե, ես հասարակությանը կբացատրեմ:

– Դուք համարվո՞ւմ եք Միհրան Պողոսյանի մտերիմը: Ո՞վ է Ձեզ աջակցում, Միհրան Պողոսյանը Ձեզ աջակցո՞ւմ է:

– Միհրան Պողոսյանն Աջափնյակում ինչո՞վ պետք ա աջակցի: Ինքը թեկնածու է, ինքն իրա ընտրություններով ա զբաղված: Ես շատ մարդկանց մտերիմ եմ համարվում ու կամ, ի՞նչ կապ ունի: Կամ ում ինչ գործն ա՝ ես ում մտերիմն եմ: Ես բավականին շատ ընկերներ ունեմ հայտնի մարդկանց մեջ, հետո՞, ի՞նչ կապ ունի:

– Եվ Ձեր շանսերը ինչպե՞ս եք գնահատում:

– Չեմ իմանում, նորմալ, նորմալ, լավ:

Շարունակությունը` «Փաստ» օրաթերթի այսօրվա համարում: