Իշխող կուսակցության ձախողումները փաստորեն ոգևորում են իր ընտրազանգվածին. «Փաստ»

«Փաստ» օրաթերթը գրում է.

Արդյո՞ք «նոնսենս» չէ, երբ այս կամ այն կուսակցության իշխանության օրոք արձանագրված տնտեսական ցուցանիշների նվազման, երկրի արտաքին ու ներքին պարտքի աճի, էկոլոգիական և այլ խնդիրների ավելացման պայմաններում, ընտրողներն իրենց ձայնը կարող են կրկին վստահել նույն այդ կուսակցությանը՝ հաշվի չառնելով, թե այդ տարիների ընթացքում երկիրն առաջ գնալու փոխարեն ինչպիսի տեմպերով է գահավիժել անդունդ: 

ԱԺ ՀՀԿ խմբակցության պատգամավոր, ԱԺ պետաիրավական հանձնաժողովի նախագահ Հովհաննես Սահակյանը պատասխանելով հարցին ասաց, որ պետք է հաշվի առնել, որ այս ընտրություններից առաջ փոխվեց «Ընտրական օրենսգիրքը» և ինչպես ընդդիմադիր կուսակցությունների անդամները, այնպես էլ միջազգային կառույցները փաստում են, որ նոր պայմաններով կարելի է անցկացնել նորմալ ընտրություններ, իսկ ընտրողները կարող են իրենց քվեն տալ այն կուսակցությանը ում նախընտրում են:
«Տեսախցիկները տեղադրված են, ստորագրված ընտրական ցուցակները հրապարակվելու են և մի շարք մեխանիզմներ կան վերահսկելու այս ընտրությունները: Այս պայմաններում ժողովուրդն ում կընտրի նա էլ կլինի իշխանություն կամ ընդդիմություն: Այս պահին տեսական դաշտում գնահատականներ պետք չէ տալ: Քարոզարշավը կմեկնարկի, կուսակցություններն իրենց մոտեցումները կհրապարակեն, արվածի և չարվածի մասին կխոսեն, հետո կերևա, թե ժողովուրդն ում է հավատում և ում է նախընտրում»,– ասաց Հ. Սահակյանը: 

Պատգամավորն ասաց, որ տնտեսական խորը ճգնաժամի պայմաններում Հայաստանին հաջողվել է սոցիալական կարևորագույն խնդիրներ լուծել և թեև փոքր, բայց՝ առաջընթաց արձանագրել: ՀՀԿ–ի ներկա կարգախոսը լինելու է «Անվտանգություն, առաջընթաց» և այդ գաղափարի ներքո էլ կուսակցությունը կներկայացնի իր առաջիկա ծրագրերը:

Խոսելով Կառավարության ներկայացրած և ներկայում ԱԺ–ում քննարկվող օրենսդրական այն նախագծի մասին, որով առաջարկվում է Կարմիր գրքում գրանցված բույսերից 1 կգ ապօրինի հավաքելու համար քաղաքացիներին տուգանել 10–20 հազար դրամով, 15 հազար դրամով տուգանել ապօրինի կորսան անդրկովկասյան մողեսիկին վնասելու դեպքում: Իսկ թիթեռների, ճպուռների, բզեզների և մրջյունների ապօրինի ոչնչացման համար գործադիրն առաջարկում է տուգանել 3000 դրամով: Տուգանքի չափերից բացի նոր նախագծով, սակայն չի խոսվում բնության հատուկ պահպանվող տարածքները հսկող աշխատակիցների անվտանգության ապահովման մասին, որը գործադիրը պետք է որ ավելի կարևորեր, քան ասենք՝ մրջյուններինը կամ ճպուռներինը, պատգամավորն ասաց, որ հարցը կարևոր է և բարձրացված խնդիրները Բնապահպանության նախարարության ու հատկապես նախարարի ուշադրության կենտրոնում են: 

«Այդ թեմայով ես զրուցել եմ նախարարի հետ: Դրանք աստիճանաբար լուծվող խնդիրներ են, բայց բավականին վայրերում արդեն կա առաջընթաց: Ազգաբնակչությունն էլ իր հերթին պետք է հետևողականորեն օգնի, որպեսզի բոլորս կարողանանք պահպանել մեր շրջակա միջավայրը և բնությունը»,– ասաց Հ. Սահակյանը: 
Օգտվելով առիթից գարնան առաջին օրվա կապակցությամբ Հ. Սահակյանը մաղթեց, որ բոլորի ընտանիքներում ծաղիկը, սերը և ջերմությունը երբեք չպակասի: 
«Գարունն իր հետ բերում է ծաղիկ, բերում է սեր, բերում է ջերմություն… Մաղթում եմ, որ նախևառաջ այդ ամենը ոչ միայն մեր բոլորի ընտանիքներում լինի, այլ՝ մեր մեծ երկրում ու հայրենիքում: Եվ հասկանանք, որ տարվա եղանակների նման քաղաքական դաշտը նույնպես պտտվում է: Ու պետք չէ միայն ցուրտ ձմռան հիշողությունները պահել, այլ հարկավոր է մնացած բոլոր եղանակների նման պայծառ ապագայի մասին մտածել»,– ասաց Հ. Սահակյանը:

 

Շարունակությունը` «Փաստ» օրաթերթի այսօրվա համարում: