Հերոսուհուս անունը Նելլի է, ով ամսունացած է «Մեծ Հայք»-ի Նարեկի կերպարի հետ. Սոնա Մաթևոսյանը՝ «OutDance» սիթքոմի մասին

Life.panorama.am-ն արդեն պատմել է շուտով «Շանթ Պրեմիում» հեռուստաալիքով հեռարձակվող «OutDance» սիթքոմի մասին: Այստեղ իր մասնակցությունն ունի նաեւ դերասանուհի Սոնա Մաթեւոսյանը, ով եւ Life.panorama.am-ի այսօրվա զրուցակիցն է:

-Սոնա, հայկական սիթքոմների շրջանակը եւս մեկով է ավելանում: «OutDance» սիթքմումդուք եւս ներկայանալու եք: Կխնդրեմ նախ պատմել համագործակցության մասին, առաջարկը ստանալիս ինչը ամենաշատը ոգեւորեց, որ համաձայնեք:

-  Առաջարկը ստացա անմիջապես սցենարիստից՝ Անդրանիկ Իսահակյանից, ում ճանաչում էի դեռ «Քաղաքում» հեռուստասերիալից: Քանի որ «Շանթ» հեռուստաընկերության շրջանակում մասնկացել եմ «Պարահանդես» նախագծին, Անդրանիկը հիշելով, որ պարում եմ, զանգահարեց եւ առաջարկեց մասնակցել քասթինգին: Ինձ ոգեւորեց այն փաստը, որ այս սիթքոմն իր ձեւաչափով նորություն է շուկայում, նման մտահղացում նախկինում չի եղել, եւ հետո, պարել շատ եմ սիրում, ու այն փաստը, որ որպես դերասանուհի ներկայանալուց զատ պետք է նաեւ պարեմ, ինձ շատ դուր եկավ:

-Կխնդրեմ պատնել նաեւ սիթքոմում Ձեր հորեսուհու մասին, ինչպիսի՞նն է նա:

- Հերոսուհուս անունը Նելլի է, ով ամսունացած է «Մեծ Հայք»-ի Նարեկի կերպարի հետ: Նելլին մանկուց երազել է պարուհի դառնալ, բայց երազանքն այդպես էլ իրականություն չի դարձել: Տղաների հետ միասին՝ շատ ծիծաղելի ու հետաքրքիր իրավիճակներում է հայտնվում կերպարս: Հիմա չեմ ցանկանա փակագծեր բացել, որպեսզի հեռուստադիտողը հետաքրքրությամբ հետեւի դեպքերի զարգացումներին:

-Սոնա, ինչպե՞ս եք հաղթահարել պարարվեստի հետ կապված խնդիրները, քանի որ ինչպես հասկացա, Ձեր հերոսուհին ընթացքում պետք է նաեւ պարի:

- Ինչպես նշեցի, հերոսուհիս պարել շատ է սիրում, նրան թվում է, որ պարելն իր մոտ շատ լավ է ստացվում, ու իրենից գոհ միշտ պարում է տղաների մոտ եւ փորձում է սովորել: Դեռեւես պարային լուրջ տեսարաններ չեմ ունեցել, բայց կարծում եմ, որ ամեն ինչ առջեւում է, եւ մեր շատ սիրելի սցենարիստը այդ հնարավորությունը ինձ կտա: Ես չեմ վախենում նման փորձությունից, հակառակը, անհամբեր կսպասեմ, թե ե՞րբ է Նելլին սկսելու պրոֆեսիոնալ հարթության վրա զբաղվել պարով:

-Դերասանական կազմը հեռուստադիտողին նորություն է: Արդեն ինտեգրվե՞լ եք նորթիմին ու ինչպե՞ս է ընթանում ներքին շփումը նրանց հետ:

- Շատ ուրախ եմ, որ հենց այս թիմում եմ աշխատում: Մինչեւ նկարահանումները բավականին ժամանակ ունեցանք ծանոթնալու, շփվելու միմյանց հետ: Թե դերասանական կազմը, թե նկարահանող խումբը՝ ռեժիսոր Արսեն Երեմյանի գլխավորությամբ, շատ լավն են: Ուրախ ու հետաքրքիր ժամանակ ենք անցկացնում միասին եւ իսկապես հասցրել ենք մտերմանալ: Կարծում եմ, որ համերաշխ անձնակազմը հաջողության հասնելու կարեւոր գրավականն է:

-Սոնա, ուզում եմ տեղեկանալ նաեւ Ձեզ հետ կապված այլ ծրագրերին: Բացի սիթքոմիցայս շրջանում ի՞նչ աշխատանքներով եք զբաղված:

- Բացի սիթքոմից, ինչպես միշտ, իմ կյանքում կա թատրոնը, առանց որի չեմ պատկերացնում իմ ստեղծագործական կյանքը: Աշխատում եմ Պատանի հանդիսատեսի թատրոնում, որտեղ շուտով նոր ներկայացում կցուցադրվի՝ Հրաչյա Գասպարյանի ռեժիսորությամբ. Հիմա փորձերի բուռն ընթացքի մեջ ենք ու կարծում եմ՝ հետաքրքիր արդյունք կունենանք: Նաեւ զբաղված եմ Հովհաննես Թումանյանի անվան Տիկնիկային թատրոնում. Մարտի 23-ին նորովի բեմ կբարձրանա Նիկոլայ Գոգոլի «Քիթը» պատմվածքի հիման վրա ստեղծված ներկայացումը՝ Սամսոն Մովսեսյանի բեմադրությամբ: Այս փաստի համար առանձնահատուկ ուրախ եմ, որովհետեւ, ըստ իս, այս ներկայացումը պետք է իր ուրույն տեղն ունենա  մեր թատերական իրականության մեջ: Առհասարակ, ներկայացումներ շատ կան, հանդիսատեսը կարող է խաղացանկին ծանոթանալ թատրոնի ֆեյսբուքյան էջում: Ուզում եմ մեր հանդիսատեսին ասել՝ միշտ ուրախ ենք Ձեզ տեսնել մեր թատրոնում: