Ադրբեջանը պետք է հասկանա, որ եթե ԼՂ անվտանգությանն ու խաղաղ բնակչությանը սպառնալիք լինի, ապա «Իսկանդեր»-ը կկիրառվի. Վ. Եվսեև

Tert.am-ը գրում է

Լեռնային Ղարաբաղում նախորդ տարվա ապրիլյան իրադարձությունների կրկնության պարագայում Հայաստանը կկիրառի «Իսկանդեր» օպերատիվ մարտավարական հրթիռային համալիրը: Tert.am-ի հետ զրույցում ասաց Ռուսաստանի Դաշնության ԱՊՀ երկրների ինստիտուտի Կովկասի բաժնի ղեկավար, ռազմական փորձագետ Վլադիմիր Եվսեևը:

Օրերս Հայաստանից ամենաբարձր մակարդակով հնչեցին հայտարարություններ «Իսկանդեր»-ի կիրառելիության վերաբերյալ, որոնք տարաբնույթ մեկնաբանությունների տեղիք տվեցին: Նախ` ՀՀ պաշտպանության նախարար Վիգեն Սարգսյանը «ՌԻԱ նովոստի»‐ի հետ զրույցում հայտարարեց, որ «Իսկանդեր» հրթիռահրետանային համալիրները և դրանք կիրառելու որոշումը պատկանում է Հայաստանի Զինված ուժերին, և Հայաստանը կորոշի, թե երբ գործի դնի այն, ապա այս մասին խոսեց նաև ԼՂՀ նախագահ Բակո Սահակյանը՝ նշելով, որ «Իսկանդերները» գտնվում են ՀՀ տրամադրության տակ, ունեն ռազմաքաղաքական հավասարակշռությունը և տարածաշրջանի կայունությունն ապահովող նշանակություն: ՀՀ Նախագահ Սերժ Սարգսյանն էլ շեշտեց, որ եթե Ադրբեջանը շարունակի նույն ոգով և իրավիճակը հասցնի պատերազմականի, ապա Արցախի ժողովրդի անվտանգությունն ապահովելու համար մենք մեկ վայրկյան անգամ կանգ չենք առնի՝ կիրառելու մեր զինանոցում եղած բոլոր հնարավորությունները»:

Այս առնչությամբ Վ. Եվսեևը նշեց, որ չպետք է մոռանալ՝ «Իսկանդեր»-ը գտնվում է Հայաստանի տարածքում, բայց ռուսական ռազմաբազայում, ուստի ուղիղ կառավարում Հայաստանի կողմից չի կատարվում: Բայց, ըստ քաղաքագետի, եթե պատերազմ լինի, իսկ դա հնարավոր է ԼՂ տարածքում, ուրեմն «Իսկանդեր»-ը կգործադրվի Հայաստանի կողմից: 

«Ադրբեջանը պետք է հասկանա, որ Հայաստանը կարող է կիրառել «Իսկանդեր»-ը, եթե լարվածությունը հասնի պատերազմի: Նախորդ տարի ապրիլին Ադրբեջանի կողմից եղավ սպառնալիք, որ «Սմերչ»-ից հարվածելու են Ստեփանակերտի ուղղությամբ: Նման պայմաններում միանգամայն հավանական կլինի, որ «Իսկանդեր»-ը գործի դրվի: Եթե լինի իրական սպառնալիք, կրկնում եմ, պատերազմի իրական սպառնալիք, ապա այն կկիրառվի: Ադրբեջանը պետք է հստակ հասկանա, որ եթե լինի վտանգ, սպառնալիք Լեռնային Ղարաբաղի խաղաղ բնակչության նկատմամբ, ապա «Իսկանդեր»-ը կգործադրվի»,- շեշտեց Վլադիմիր Եվսեևը: 

Ռուսաստանցի ռազմական փորձագետը շեշտեց, թե Հայաստանն ամենևին էլ չպետք է կաշկանդվի նրանով, որ «Իսկանդեր»-ն աշխատեցվում է ռուսական զինվորների կողմից, որովհետև հրթիռահրետանային այս համալիրը գտնվում է Հայաստանում Հայաստանի անվտանգության ապահովման համար, քանի որ եղել է սպառնալիք նաև ՀՀ սահմանների նկատմամբ: Հակառակ դեպքում, Եվսեևի խոսքով, Ադրբեջանն այս հանգամանքից խուճապի չէր մատնվի: 

««Իսկանդեր»-ն այն միջոցն է, որն ապահովում է ոչ միայն Հայաստանի անվտանգությունը, այլև՝ Լեռնային Ղարաբաղի: Ուստի չպետք է մտահոգվել՝ եթե լինի անհրաժեշտություն, այն գործի կդրվի: Ադրբեջանը 94թ.-ից հետո առաջին անգամ ապրիլին կրակեց Մարտակերտի խաղաղ բնակչության ուղղությամբ: Այս բնույթի գործողությունները պետք է համարժեք պատասխան ստանան»,- նշեց Վլադիմիր Եվսեևը:

Ճշտող հարցին՝ եթե ապրիլյան իրադարձությունները կրկնվեն Հայաստանը կարող է կիրառել «Իսկանդեր»-ն առանց Ռուսաստանի թույլտվությա՞ն, թե ամեն դեպքում պաշտոնական Մոսկվան պիտի իր համաձայնությունը տա, ապա Վ. Եվսեևը պատասխանեց. «Համաձայնություն, իհարկե, պիտի լինի: Այս համակարգը հայ-ռուսական համատեղ զորքերի մաս է և կա դրա կիրառելիության հատուկ կարգ: Ռազմական կիրառելիության ժամանակ գործում է փոքր-ինչ այլ մեխանիզմ: Եվ դա այնպես չէ, որ պետք է զանգել Մոսկվային, սպասել, մինչև Մոսկվան թույլ տա: Հնարավորություն կա կիրառել զինատեսակը ռազմական ղեկավարության կողմից: Օպերատիվ ռազմական գործողությունների ժամանակ միշտ չէ, որ հնարավոր է ամեն ինչ համաձայնեցնել: Եթե լինի իրական պատերազմ, պատերազմի իրական սպառնալիք, պետք չէ մտածել, որ Ռուսաստանը կարող է թույլ տալ կամ թույլ չտալ կիրառել «Իսկանդեր»-ը: Կրկնում եմ՝ «Իսկանդեր»-ը Հայաստանի, հայ բնակչության անվտանգության ապահովման համար է և կարող է լիովին կիրառվել, եթե բնակչության անվտանգությունը վտանգի տակ է»:

Հարցին, թե այդ դեպքում՝ ո՞վ է գնահատելու սպառնալիքները, ո՞վ է որոշելու՝ ստեղծված իրավիճակում պե՞տք է կիրառել «Իսկանդեր», թե՞ ոչ, կա՞ դրա անհրաժեշտությունը, թե՞ ոչ, Վլադիմիր Եվսեևը պատասխանեց,  որ իրավիճակը գնահատվելու է համատեղ՝ Հայաստանի և Ռուսաստանի կողմից: