Սերժ Սարգսյան. Հայաստանը հետեւողական կերպով բարձրացնում եւ ամրապնդում է իր պաշտպանունակությունը

Հայաստանն անցել է Երրորդ հանրապետության 25-ամյա յուրօրինակ շրջափուլը՝ պետականաշինության որոշակի արժեքավոր փորձով, իր ձեռքբերումներով եւ սխալներով, բայց ապագային ուղղված վստահ հայացքով: «Իզվեստիա»-ում հրապարակված հոդվածում նշել է ՀՀ նախագահ Սերժ Սարգսյանը:

«Այդ ճանապարհը դյուրին չէր: Չնայած 1988 թվականին երկրաշարժի հետեւանքների հաղթահարման դժվարությանը, մեզ պարտադրված պատերազմին եւ փախստականների հոսքին, շրջափակմանը, արտաքին աշխարհի հետ տնտեսական կապերի խզմանը, էներգետիկ ճգնաժամին եւ բազմաթիվ այլ խնդիրներին՝ Հայաստանը վստահ քայլեր է ձեռնարկել իր անկախ պետականության վերականգնման ուղղությամբ: Հենց այդ ձգտումն է միավորել ու միավորում գրեթե 10 մլն մեր հայրենակիցներին ամբողջ աշխարհում, ովքեր միասնական են Հայաստանն անվտանգ, ժողովրդավարական եւ բարգավաճ երկիր տեսնելու իրենց ցանկության մեջ:

Լեռնային Ղարաբաղի ժողովրդի ֆիզիկական ոչնչացման շարունակվող սպառնալիքի, Հայաստանի նկատմամբ տարածքային պահանջների պայմաններում մենք սեւեռուն ուշադրություն ենք դարձրել երկրի պաշտպանունակության ամրապնդմանը: Զարմանալի չէ, որ կայացած առաջին պետական իսնտիտուտներից մեկը մեր բանակն էր, որն արդեն երկար ժամանակ համարվում է տարածաշրջանում ամենաուժեղն ու ամենամարտունակը:

Եվ այսօր՝ կազմավորումից 25 տարի անց, զինված ուժերը շարունակում են կատարելագործվել՝ ամրապնդելով իրենց օպերատիվ հնարավորութուններն ու ժամանակակից սպառազինություններով հագեցածությունը՝ համալիր զարգացնելով արդյունավետ կառավարման քաղաքացիական ժողովրդավարական վերահսկողության համակարգերը եւ միջազգային ռազմաքաղաքական համագործակցությունը:

Հայաստանը հետեւողական կերպով բարձրացնում եւ ամրապնդում է իր պաշտպանունակությունը, այդ թվում՝ իր ռազմավարական դաշնակից Ռուսաստանի հետ: Մեր կողմից ստեղծվել է միավորված զորախումբ, ձեւավորվել է հակաօդային պաշտպանության միասնական համակարգ, Հայաստանի տարածքում է տեղակայված 102-րդ ռուսական ռազմաբազան:

Հայ-ռուսական ռազմաքաղաքական համագործակցության համար նշանակալի էր 2013 թվականին ՌԴ նախագահ Վլադիմիր Պուտինի հետ մեր համատեղ այցը Գյումրիում տեղակայված 102-րդ ռուսական ռազմաբազա, որտեղ քննարկվեցին դրա ռազմատեխնիկական արդիականացման խնդիրները: Դրանց լուծման համար նպատակահարմար է Գյումրիում համատեղ պաշտպանական արդյունաբերական համալիրի նախագծի ստեղծման շահագրգռված քննարկումը հայկական եւ ռուսական կողմերի միջեւ:

Ընդ որում՝ համալիրի բազմապրոֆիլ մասշտաբը հարկավոր է հաշվարկել այնպես, որ 102-րդ ռազմաբազայի արդիականացմանը զուգահեռ, այն որպես հարթակ ծառայի Ռուսաստանի եւ Հայաստանի հետ սահմանակից երկրների միջեւ գործնական ռազմաքաղաքական համագործակցության հաստատման համար՝ Ռուսաստանի համար սպառազինությունների ավանդական շուկա մուտքով: Գյումրիում աշխատատեղերի ստեղծումը նաեւ գործոն կդառնար քաղաքում սոցիալ-տնտեսական իրավիճակի բարելավման համար:

Այս ամենն ուղղված է բացառապես երկրի երաշխավորված անվտանգության ապահովման եւ կայուն ժողովրդավարական զարգացման համար՝ չլուծված զինված հակամարտություններով պայթյունավտանգ մեր տարածաշրջանում խաղաղության եւ կայունության շահերից ելնելով»,- ընդգծել է նախագահ Սարգսյանը: