Ռ. Հարությունյան. Վերականգնվող էներգետիկան զարգացման նոր փուլ կթևակոխի

Past.am-ը զրուցել է «ՀՀ վերականգնվող էներգիա արտադրողների ասոցիացիայի» գործադիր տնօրեն Ռուզան Հարությունյանի հետ՝ վերջերս Աբու-Դաբի քաղաքում կայացած Հայաստան-Արաբական Միացյալ Էմիրություններ ներդրումային համաժողովի շրջանակներում Հիդրո Կորպորացիա ընկերությունների խմբի եւ Estekshaf Investment Company միջեւ կնքված փոխըմբռնման հուշագրի և Ասոցիացիայի գործունեության վերաբերյալ:

Ռ. Հարությունյանը կարևոր է համարում սույն ծրագրի իրականացումն ու ներդրումների ներգրավումը արտադրողականության ցածր մակարդակ եւ վարկային ծանր պորտֆել ունեցող, բնապահպանական նորմերի խախտումներով կառուցված ՓՀԷԿ-երի արդիականացման համար: «2016 թվականի տվյալներով ՀՀ արտադրվող էլեկտրաէներգիայի 13%-ը արտադրվում է ՓՀԷԿ-երի կողմից, որոնք կառուցված են մասնավոր ներդրումների շնորհիվ: Ասոցիացիայի կողմից իրականացված ներքին աուդիտը ցույց է տվել, որ ՓՀԷԿ-երի մեծ մասը տարբեր խնդիրների պատճառով աշխատում են արդյունավետության ցածր մակարդակով (որոշ հաշվարկների վրա հիմնվելով ՓՀԷԿ-երի ընդհանուր թվի միջին դրվածքային հզորության օգտագործման գործակիցը 0.35%-ից չի անցնում): Անգամ այս պարագայում տարեկան արտադրվում է 880.4 մլն կվտ/ժ էլեկտրաէներգիա և պետբյուջե է վճարվում 4.2 մլրդ ՀՀ դրամ միայն ԱԱՀ՝ չհաշված շահութահարկը և այլ հարկեր: Ասոցիացիան և Հիդրո Կորպորացիա ընկերությունների խումբը նպատակ ունեն փուլ առ փուլ արդիականացնել և վերազինել գործող, սակայն խնդիրներ ունեցող ՓՀԷԿ-երը՝ բարձրացնելով արտադրողականությունը և ստանալով դրական տնտեսական, էներգետիկ, ֆինանսական, սոցիալական, բնապահպանական պատկեր»,- նշեց նա:

Ռուզան Հարությունյանի դիտարկմամբ Ասոցիացիան կայուն հիմքերի վրա է պահում երկխոսությունը ՀՀ Կառավարության և մասնավոր հատվածի միջև, ինչպես նաև աջակցում ՀՀ մասնավոր հատվածի և օտարերկրյա ֆինանսական ինստիտուտների, միջազգային կառույցների միջև համագործակցության գործընթացին: «Ցավով պետք է արձանագրեմ, որ ոլորտն իրականում բարձիթողի վիճակում է. հիդրո էներգետիկայի ոլորտում չի եղել հիմնախնդիրները կոնսոլիդացնող և ռացիոնալ պահանջարկ ստեղծող հասարակական կառույց, որն իրականացված ծրագրերով ոլորտի զարգացումը կպահեր ուշադրության կենտրոնում, կպաշտպաներ ներդրողի շահերը և կօգներ խուսափել տարաբնույթ անարդար երևույթներից: Ի վերջո, եկեք չմոռանանք, որ գործ ունենք բավական լուրջ ուժ ներկայացնող և էներգետիկ անվտանգության տեսանկյունից իրենց կարևոր դերն ունեցող գործարար միջավայրի հետ»,- նշեց նա:

Նրա խոսքերով Ասոցիացիան ավարտել է ներքին աուդիտի փուլն ու սկսել իրականացնել հետազոտական բնույթի լայնամասշտաբ և լոկալ մակարդակի ծրագրեր տարբեր ուղղություններով: Հետազոտական ծրագրերին զուգահեռ իրականացվում են նաև կիրառական բնույթ ունեցող ծրագրեր, որոնցից մեկի արդյունքն է Հիդրո Կորպորացիա ընկերությունների խմբի ստորագրած հուշագիրը:

Past.am-ի հարցին, թե ինչպես կարելի է ներգրավվել Ասոցիացիայի գործունեության մեջ, Ռուզան Հարությունյանը նշեց, որ հիմնադիր խորհդրի որոշմամբ միայն ներքին աուդիտի ավարտից հետո են սկսել անդամագրել ՓՀԷԿ-երին և բավական շատ հայտեր ունեն մշակման փուլում: «Առաջիկայում նախատեսում ենք իրականացնել լայնամասշտաբ միջոցառում, որի ժամանակ կխոսվի Ասոցիացիայի ռազմավարության մասին, իրականացման փուլում գտնվող հետազոտական ծրագրերի մասին, կհրապարակվեն ներքին աուդիտի տվյալներ և այլն»,- մանրամասնեց Ռ. Հարությունյանը:

Ասոցիացիան ողջունելի է համարում ՀՀ Էներգետիկ ենթակառուցվածքների և բնական պաշարների նախարարի տեղակալ Հայկ Հարությունյանի ջանքերը վերականգնվող էներգետիկայի, մասնավորապես արևային էներգետիկայի ոլորտի զարգացման և Ocean Holding ընկերության հետ կնքած փոխըմբռնման հուշագրի փաստը: «ՀՀ Կառավարության մոտեցումների, ինչպես նաև պատասխանատու օղակներում պատրաստված կադրերի ներգրավման դրական փոփոխություններ ենք նկատում, ինչն առավել ճկուն է դարձնում համագործակցությունը ՝ պետություն- մասնավոր հատված երկխոսության շրջանակներում»,- ասաց Ռ. Հարությունյանը: