Մասնակցեք ընտրությանը և քվեարկեք սեփական երկրի լավագույն ապագայի համար. «Փաստ»

«Փաստ» օրաթերթը գրում է.

2017 թ. ԱԺ ընտրությունների նախընտրական քարոզարշավի թոհուբոհը մոտենում է իր ավարտին: Ո՞ր ուժերն ու դաշինքները կստանան հնարավորություն զբաղվելու օրենսդիր գործունեությամբ և որոշելու մեր երկրի զարգացման ուղին առաջիկա հինգ տարիներին, ո՞ր թեկնածուները կստանան իրենց ընտրողների վստահության քվեն: Ընտրական քարոզարշավը փորձեցինք ամփոփել ԱԺ պատգամավորի թեկնածու Հարություն Կարապողոսյանի հետ: Նա ընդհանուր առմամբ դրական գնահատեց քարոզարշավի ողջ ընթացքը՝ այն անվանելով ևս մեկ առիթ անձամբ հանդիպելու և անմիջականորեն շփվելու քաղաքացիների հետ, չնայած դրա պակասն իր կյանքում չկա: «Ես այս շաբաթների ընթացքում ևս մեկ հնարավորություն ունեցա անձամբ շփվելու իմ համաքաղաքացիների հետ, պարզապես մի փոքր այլ կարգավիճակով: Կրկին միասին վերանայեցինք այն խնդիրների շրջանակը, որն անհանգստացնում է բնակիչներին: Դրանք անպայման պետք է ըստ պատշաճի ներկայացվեն Ազգային ժողովում և հնարավորինս շուտ ստանան լուծումներ»:

Քարոզարշավի ընթացքում բազմիցս շահարկվեց Հարություն Կարապողոսյանի՝ «Սնխչու» կոչում ունենալու հանգամանքը: Այն հարցին, թե որքանով այն կօգնի կամ կխանգարի քվեներ ստանալուն, պատգամավորի թեկնածուն պատասխանեց. «Նախ նշեմ, որ սնխչիությունը ես համարում եմ ի վերուստ տրված հնարավորություն ինչ–որ բանով ձեռք մեկնելու դրա կարիքն ունեցողին: Դա ինձ համար տարիների ընթացքում դարձել է ապրելակերպ ու մեծ հետք թողել ողջ գիտակից կյանքիս վրա: Ճիշտ եք նկատում, շատ փորձեր արվեցին շահարկելու այս հանգամանքը, սակայն ես ուշադրություն չեմ դարձրել ու չեմ դարձնելու նման հատուկ միտում ունեցող ու բացասական ռեզոնանս առաջացնելուն ուղղված չնչին փորձերին: Ես նոր մարդ չեմ քաղաքական ոլորտում: Ունեմ թե՛ կուսակցական, թե՛ անկուսակցական քաղաքական գործունեության մեծ փորձ: Շատ լավ գիտեմ՝ ինչ ասել է քաղաքականություն, ինչ շերտեր ու դրսևորումներ ունի այն: Գնահատականներ տալուց առաջ ավելի տեղին կլինի ուշադրությամբ ուսումնասիրել իմ անցած ուղին և գործունեությունը»:

Կարապողոսյանը հաճախ իր ելույթներում և հարցազրույցներում նշում է, որ ԱԺ–ում 2 հանձնաժողովներից մեկը, որում կընդգրկվի, հաստատ լինելու է գիտության, մշակույթի, երիտասարդության հարցերով զբաղվող հանձնաժողովը: Այս առումով թեկնածուն նշեց, որ դա բոլորովին էլ պատահական միտք կամ պարզապես ցանկություն չէ: «Ես հաճախ եմ հանդիպում ու շփվում մշակույթի գործիչների հետ, ունեմ շատ ընկերներ, ովքեր այդ ոլորտի տարբեր ճյուղերի ներկայացուցիչներ են: Շատ լավ տեղյակ եմ, ինչպես են ապրում, գործում, սոցիալական ինչ վիճակում են գտնվում: Շատ կարևորում եմ երիտասարդության զբաղվածության խնդրի լուծումը: Ես միշտ նշում եմ, որ մեր լուսավոր երիտասարդության համար պետք է լուսավոր ապագա ապահովենք: Վստահ եմ, որ այդպես էլ լինելու է, և սեփական ապագան մեր հաջորդ սերունդները տեսնելու են միայն իրենց երկրում»:

Վերջում խնդրեցինք, ամփոփելով իր խոսքը, որևէ ուղերձ կամ կոչ հղել ապրիլի երկուսին 9 քվեաթերթիկներից որևէ մեկի վրա նշում անելու ընտրության առաջ կանգնած ընտրողին:

«Ասել եմ ու պիտի կրկնեմ. քվեարկության պահին մեզանից յուրաքանչյուրը մնում է միայնակ ինքն իր հետ, իր խղճի, իր գաղափարների ու իր պատկերացումների հետ: Լավագույն ընտրությունը ընտրությունն է հենց համաձայն վերոնշյալ գործոնների և ոչ թե` կողմնակի: Ես պարզապես խորհուրդ կտամ մասնակցել ընտրությանը և քվեարկել առաջին հերթին սեփական երկրի լավագույն ապագայի օգտին»:

Շարունակությունը` «Փաստ» օրաթերթի այսօրվա համարում: