Մի վճարեք տուգանքը, եթե… Dialogue.am

Dialogue.am-ի «Սոցիալական իրավունք»  շարքը շարունակում է վարչական ակտի հետ կապված իրազեկումների շարքը՝ այս անգամ անդրադառնալով  ծանուցման խնդիրներին:

Գաղտնիք չէ, որ այսօր վարչական մարմիններն հաճախ անբարեխիղճ են գտնվում իրենց լիազորությունների հանդեպ և անուղակիորեն խոչընդոտում են քաղաքացիներին օրենքով  տրված իրենց արտոնություներն իրացնելիս, քիչ չեն նաև դեպքերը, երբ նրանք պարզապես ավելորդ են համարում քաղաքացուն տեղեկություն տրամադրել իրենց իրավունքի մասին:

Մանավորապես ՝ վարչական ակտերի մասին քաղաքացիներին ինտերնետով ծանուցումները իրականացնում են խախտումներով, այսինքն առանց անձանց ուղարկելու՝ միանգամից տեղադրում են azdarar.am  կայքում:
Հասարկությանը հետաքրքրող թեման անընդհատ արծարծվում է ամենատարբեր մակարդակներում և այդպես էլ շարունակում չլուծված չմնալ:

Հասարկությանը հետաքրքրող թեման աընդհատ արծածավում է ամենատբեր մակարդակներում  և շարունակում է լուծում չստանալ:

«Իրավունքի գերակայություն» ՀԿ-ի փաստաբան Աշխեն Դաշյանը, խնդրի հետ կապված սեփական փորձի վրա հիմնվելով,  դատողություններ  ու մեկնաբանություններ  է անում Dialogue.am-ի հետ զրույցում. «Վարչական մարմինը շատ հաճախ զրկում է քաղաքացուն իր իրավունքների պաշտպանությունից՝ քաջատեղյակ լինելով, որ  հանրապետության բնակչության մեծ մասը  դեռևս չունի տեխնիկական պայմաններ՝ համակարգիչ, ինտերնետ և չի տիրապետում  դրանից օգտվելու տեխնիկական գիտելիքներին, հետևապես չունի  նաև հնարավորություններ՝ մշտապես ստուգելու ՝արդյոք առկա են վարչական ակտեր, թե ոչ: Դրա արդյունքում մարդիկ տեղյակ չեն լինում իրենց նկատմամբ կայացված ակտերի  ու ԴԱՀԿ բռնագանձումների մասին  կամ ուշացած տեղեկանում են հենց ԴԱՀԿ-ից »:

Ստացվում է, որ վարորդները մեծամասամբ հայտնվում են անորոշ իրավիճակում և ստիպված են լինում մեծ տուգանքներ վճարել հանուն ոչ մի բանի : Մինչդեռ նշենք, որ օրենսդիրը  հստակ կարգ այնուամենայնիվ սահմանել է, որով վարչական ակտը պետք է փոխանցվի հասցեատիրոջը՝

1. պատվիրված փոստով` ստանալու մասին ծանուցմամբ
2. հասցեատիրոջը ստորագրությամբ առձեռն հանձնելու
3. հասցեատիրոջ գրավոր դիմումի հիման վրա էլեկտրոնային փոստով կամ հեռահաղորդակցության (այդ թվում` բջջային հեռախոսահամարին կարճ հաղորդագրություն ուղարկելու) միջոցով:

Այսինքն, վերոգրյալից պարզ է դառնում, որ վարչական ակտի մասին  որոշումը պետք է հանձնվի անձամբ հասցեատիրոջը, իսկ հասցեատերը  անդորագրի վրա պետք է թողնի իր ստորագրությունը,  ինչը կվկայի վարչական ակտի մասին անձամբ տեղեկացված լինելու և պետության հանդեպ նյութական պատասխանատվություն ունենալ մասին հանգամանքը:
Ի, դեպ  խնդիրը առաջանում է հատկապես այն դեպքերում, երբ մեքենան փաստացի պատկանում է մի անձի, բայց այն մշտապես վարում է ուրիշ մեկը կամ, երբ անձը փոխել է բնակության վայրը, բայց մեքենան շարունակում է հաշվառված  լինել նախկին հասցեում:

«Որոշումը համարվում է անձամբ հասցեատիրոջը հանձնված նաև այն դեպքում, երբ հասցեատիրոջ գրավոր դիմումի հիման վրա այն ուղարկվել է էլեկտրոնային փոստով կամ հեռահաղորդակցության  միջոցով, և դրանք հավաստում են անձի կողմից վարչական ակտի մասին ծանուցված լինելու փաստը», – ասաց Ա. Դաշյանը:

Ի դեպ, փաստաբանի խոսքով 2016-ին, բազմաթիվ բողոքների, դիմումների  ու քննադատությունների շնորհիվ,  ի վերջո հաջողվել է ձեռք բերել  դատարանի կարևոր մի որոշում՝ ինտերնետային ծանուցման համակարգում առկա խնդիրների լուծման համար (Թիվ ՎԴ/4811/05/16)։  Վերաքննիչ դատարանը բեկանել է վարչական դատարանի կայացրած դատական ակտը և  կայացրել է նոր որոշում, որով հակահարված է տրվում ինտերնետով ծանուցման կարգին . «Այսինքն, վերաքննիչ դատարանը վկայակոչել է, որ ինտերնետով ծանուցման պաշտոնական կայքում հրապարակված լինելը ինքնին դեռևս բավարար հանգամանք չէ և  կայքում տեղադրելը դեռ չի նշանակում, որ վարչական մարմինն օրինաչափ է կատարել իր պարտավորությունները և անձը ծանուցված է»,- հայտնեց փաստաբանը:

Վերաքննիչ դատարանի այս որոշումը մեր քաղաքացիների համար կարող է հիմք ծառայել կամ, ինչու ոչ, նախադեպ դառնալ, երբ անձը  իր նկատմամբ կայացված վարչական ակտերի գոյության մասին տեղեկացել է բացառապես ԴԱՀԿ ծառայությունից: Այսինքն, այս  դեպքում դատարան դիմելով և  վկայակոչելով վերաքննիչ դատարանի որոշումը, վարորդը կարող է վերականգնել իր խախտված իրավունքը և հաջողության հասնել.

«Անձը, ի վերջո, պարտավոր չի ամեն անգամ ելնի այն կանխավարկածից, որ իրավախախտ է և ամեն անգամ  պարտադիր մտնի կայք, որպեսզի տեղեկանան արդյո՞ք իր նկատմամբ կայացվել են վարչական ակտեր, թե ոչ: Ի վերջո, օրենսդիրի  նախատեսած ծանուցման էլեկտրոնային տարբերակը  նախատեսված է այն դեպքերի համար, երբ  անձի հայտնած հասցեով ուղարկված որոշումը վերադարձվել է կամ ծանուցման փաստը չի հաստատվել կամ հասցեատերը հրաժարվել է ստանալ պատշաճ կարգով ուղարկված որոշումը և ստորագրել հրաժարվելու մասին»,- ասաց Աշխեն Դաշյանը:

Այս դեպքերում արդեն վարչական ակտի մասին որոշումը տեղադրվում է  ՀՀ հրապարակային ծանուցումների պաշտոնական ինտերնետային կայքում:

Ուշադրություն. Երբ որոշումն ուղարկվում է անձի հաշվառման հասցեով և տեղադրվում ՀՀ  հրապարակային ծանուցումների պաշտոնական ինտերնետային կայքում, այն համարվում է հանձնված (պատշաճ ծանուցված) որոշումն ինտերնետային կայքում տեղադրելու օրվան հաջորդող երրորդ օրը:

Պատրաստեց՝ Լաուրա Մամյանը