ԱՄՆ արդեն վստահ չէ, որ Աշ-Շայրատ ավիաբազայում քիմիական զենք է եղել. Reuters
BLOGԱՄՆ-ը չի կարող լիարժեք վստահությամբ հաստատել, որ Սիրիայի Հոմս քաղաքի Աշ-Շայրատ ավիաբազայում, որը ենթարկվել է ԱՄՆ հրթիռակոծմանը, եղել է քիմիական զենք: Ինչպես փոխանցում է «Արմենպրես»-ը, այդ մասին հաղորդում է Reuters գործակալությունը` վկայակոչելով ամերիկյան պաշտոնատար անձանց:
Միաժամանակ, ապրիլի 6-ին Պենտագոնի ներկայացուցիչները վստահ էին իրենց գնահատականներում: Այսպես, ԱՄՆ պաշտպանական գերատեսչության ներկայացուցիչ Ջեֆ Դևիսշի խոսքով, «տվյալ ավիաբազան օգտագործվել է քիմիական զենք պահպանելու համար»:
Նա վստահեցրել է, որ ինքնաթիռներն այդ ավիաբազայից թռչել են ապրիլի 4-ին և իբր ավիահարված հասցրել` օգտագործելով քիմիական զենք Իդլիբի խաղաղ սիրիացիների ուղղությամբ:
Ավելի վաղ հաղորդվել է, որ ԱՄՆ-ը լույս ապրիլի 7-ի գիշերը «Տոմահավկ» հրթիռներով հարված է հասցրել Սիրիայի Հոմսի նահանգի օդակայանին, ինչը դարձել Է Միացյալ Նահանգների առաջին ուղղակի գրոհը Սիրիայի կառավարական զորքերի դիրքերի վրա եւ ԱՄՆ-ի նախագահ Դոնալդ Թրամփի ամենաարմատական ռազմական որոշումը պաշտոնակալությունից հետո:
Ռուսաստանի ԱԳ նախարարությունը ՄԱԿ-ի Անվտանգության խորհրդից պահանջել է արտահերթ նիստ անցկացնել ստեղծված իրադրությունը քննարկելու համար: