Սեքսուալ ֆետիշիզմ․ կամ ինչից են գայթակղվում տղամարդիկ

BRAVO / Բոլոր ժամանակներում կանանց հագուստի կամ արդուզարդի որոշ բաղադրիչներ գայթակղել են տղամարդկանց, բայց արդյո՞ք բոլորը գիտեն, որ առաջին հայացքից անմեղ թվացող բարձրակրունկ կոշիկները, սեւ զուգագուլպաները, կարմիր շրթներկը սեքսուալ ֆետիշի դասական օրինակներ են շատ տղամարդկանց համար եւ կարող են անգամ խելքահան անել նրանց: 

Սեքսուալ ֆետիշիզմը սեքսուալ վարքի տարատեսակ է, որի ժամանակ սեռական  մղման համար  սկզբնաղբյուր եւ խթան են հանդիսանում անշունչ առարկաները` հագուստը, կոշիկները, նաեւ մարմնի որոշ մասեր եւ այլն:

Ֆետիշիզմն ի սկզբանե հոգեբանների կողմից համարվել է սեքսի ոչ ստանդարտ եւ ոչ ավանդական դրսեւորում, որի ժամանակ սեռական գրգռումն առաջանում  եւ բավարարվում է միայն ֆիզիկական որոշ գրգռիչի առկայության դեպքում: Այդ գրգռիչը, որը կարող է լինել կողմնակի երեւույթ, առարկա, իր կոչվում է ֆետիշ: Ժամանակակից աշխարհում, սակայն, այդ բառի նշանակության սահմանները շատ ավելի ընդգրկուն են դարձել, եւ այսօր արդեն ֆետիշ է համարվում անգամ անմեղ «թուլությունը»: Շատ տղամարդիկ, օրինակ, պարզապես կորցնում են իրենց գլուխը կնոջ ներքնազգեստից, մազերի բույրից, դաջվածքից, ձայնի տեմբրից: Սա թերեւս կարելի է համարել նորմալ եւ բացատրելի, քանի որ բոլոր տղամարդիկ այսպես թե այնպես ունեն իրենց սեքսուալ նախապատվությունները:  Եվ դժվար թե տղամարդուն, ում գրավում են կնոջ շքեղ բարձրակրունկ կոշիկները կամ երկար գեղեցիկ եղունգները, այսօր մոլագար համարեն: Առավելագույնը, որ կարելի է անել, ընդունել, որ նա լավ ճաշակ ունի:): 

Թեեւ ֆետիշիզմը հիմնականում վերագրում են տղամարդկանց եւ նույնիսկ կա կարծիք, որ դրանով տառապելու մենաշնորհը հենց նրանցն է, պետք է խոստովանել, որ դրա որոշակի տարրեր կարելի է նկատել նաեւ կանանց դեպքում: Գեղեցիկ սեռի շատ ներկայացուցիչների համար անվիճելի ֆետիշ կարող են լինել, օրինակ,    տղամարդկանց մարմնի զարգացած մկանները, կրծքավանդակի մազածածկույթը, դաջվածքները եւ այլն: Բայց բոլոր դեպքերում  ֆետիշների բազմազանության եւ դրանց տրվող կարեւորության առումով առաջատարները տղամարդիկ են:

Անդրադառնանք տղամարդկանց ամենատարածված սեքսուալ ֆետիշներին: 

Բարձրակրունկ կոշիկներ

Կանանց արդուզարդի այս անբաժան մասնիկը խենթացնում է տղամարդկանց մեծ մասին: Թե կանացի ոտքերի սիրահարները, եւ թե պարզապես գեղեցիկը գնահատող էսթետները չեն կարող անտարբեր անցնել այս «մանրուքի» կողքով, որի շնորհիվ գրեթե յուրաքանչյուր կնոջ քայլվածք դառնում է շատ ավելի գրավիչ: 

Սթրինգ

Նորաձեւության այս հայտնագործությունը համարվում է ամենասեքսուալ ներքնազգեստը, որ երբեւէ արտադրվել է: Սթրինգը թուլ է տալիս ի ցույց դնել հետույքն իր ողջ շքեղությամբ եւ համարվում է տղամարդկանց ամենա-ամենա ֆետիշներից մեկը: 

Զուգագուլպա

Սա կարելի է համարել անգամ ռետրո-ֆետիշ, քանի որ արդիական է եղել դեռ նախորդ դարում` չկորցնելով, սակայն, իր գրավչությունը մեր օրերում: Զուգագուլպաները սեքսուալություն են հաղորդում անգամ ամենախիստ հագուստներին: Շատ տղամարդիկ չեն կարողանում դիմակայել հատկապես սեւ դասական զուգագուլպաների հմայքին, թեեւ մեր օրերում շատերի համար  ֆետիշ է դարձել նաեւ ցանցավոր զուգագուլպան: 

Երկար վարսեր

Տղամարդկանց մի զգալի մասին գրգռում է վարսերի տեսքն ու բույրը: Միանգամայն հասկանալի թուլություն, որը կարելի է հեշտորեն բավարարել: Վարսերը երկար ժամանակ պահպանում են բույրը, իսկ տղամարդկանց մոտ ցանկալի բույրը տարբեր զգացողություններ է առաջացնում: 

Կարմիր շրթներկ 

 Շուրթերն այսպես թե այնպես տղամարդկանց ակնարկում են համբույրի մասին: Կնոջ գեղեցիկ բերանը բոլոր դեպքերում գայթակղում է տղամարդկանց, բայց այն առավել գրավիչ է դառնում կարմիր շրթներկի առկայությամբ: Շատ սեքսոլոգներ էլ համոզված են, որ շուրթերը տղամարդկանց մոտ տարբեր զուգորդություններ ու երեւակայություններ են առաջացնում:     

Փիրսինգ եւ դաջվածք

Ոչ մեծ տարածում գտած, բայց վերջին տարիներին իրենց պահանջարկն ունեցող ֆետիշներից են, որոնք գրավում են շատ տղամարդկանց: Բայց իրականում չարժե դիմել այդ քայլին միայն հակառակ սեռին դուր գալու համար, քանի որ իրականում ոչ բոլոր տղամարդկանց համար են մարմնի նման զարդարանքները ֆետիշ հանդիսանում եւ, որ ամենակարեւորն է, ոչ բոլոր աղջիկներին են դրանք սազում: 

Խնամված եղունգներ

Այս ֆետիշը հոգեբանական տեսանկյունից դժվար է ինչ-որ կերպ բացատրել, բայց փոխարենը հեշտությամբ կարելի է կիրառել: Եղունգների գեղեցիկ հարդարանքը, ընդ որում` եւ ձեռքերի, եւ ոտքերի, երբեք չի վրիպում տղամարդկանց աչքից, ավելին` գրավում է: 

Մարմնի մասեր

Աշխարհում չի գտնվի գեթ մեկ հետերոսեքսուալ տղամարդ, ում չգրգռի կնոջ մերկ մարմինը: Կուրծքը, հետույքը, ազդրերը ամենատարածված ֆետիշներն են, սակայն կան տղամարդիկ, ովքեր նախընտրում են, օրինակ, արմունկները, ոտնաթաթերը, պարանոցը եւ այլն: Իսկ երկրներում, որտեղ կանայք ստիպված են ծածկել իրենց մարմինն ու դեմքը, բավական է մերկացնեն ձեռքի դաստակը, որպեսզի խենթացնեն հակառակ սեռին: 

Կարճ կիսաշրջազգեստ

Եթե նույնիսկ աշխարհի բոլոր հագուստի մոդելավորողները եւ նորաձեւության քննադատները մի օր հայտարարեն, որ կարճ կիսաշրջազգեստն այլեւս նորաձեւ չէ, նույնիսկ վուլգար է եւ անճաշակության դրսեւորում, միեւնույն է, դա չի խանգարի տղամարդկանց առաջվա պես սիրել կանանց զգեստապահարանի այս բաղադրիչը: Այն եղել եւ շարունակում է մնալ գեղեցիկ կազմվածքն ընդգծող եւ տղամարդկանց համար միշտ ընդունելի սեքսուալ ֆետիշներից մեկը: 

Ջուր 

Հաճախ սեռական գրգիռների համար լրացուցիչ խթան է հանդիսանում հասարակ ջուրը: Գուցե այն պատճառով, որ սեփական մարմնի հետ ծանոթության առաջին փորձը հիմնականում տեղի է ունենում ջրում, իսկ գուցե այն պատճառով, որ ջուրը համարվում է սթրեսը հանելու բնական եւ ամենալավ միջոց: Ինչ էլ որ լինի, փաստ է` սեքսը ծովափին, լողավազանում, ցնցուղի տակ կամ ջակուզիում համարվում է ամենատարածված ֆետիշը թե տղամարդկանց, եւ թե կանանց համար:

Հետաքրքիր է, որ նույնիսկ մեր օրերում շատերը կարծում են, թե սեքսուալ  ֆետիշիզմը, որպես այդպիսին, հոգեբանական խնդիր է: Մի՞թե դա միանշանակ է: Գուցե կարելի է այն խնդիր համարել այն դեպքում, երբ, օրինակ, առանց բարձրակրունկ կոշիկների կամ կարմիր շրթներկի առկայության տղամարդն ընդունակ չէ լիարժեք սեռական հարաբերությունների: Բայց եթե այդ «թուլությունը» դուրս չի գալիս խելամտության սահմաններից, ապա ինչո՞ւ այն չդիտել պարզապես որպես փոքրիկ խթան ինտիմ հարաբերություններն ավելի գունեղ դարձնելու համար, հատկապես, երբ շատ կանայք ու աղջիկներ ոչ միայն ներում, այլեւ խրախուսում են իրենց սիրելի նման անմեղ «մոլությունները»:):